Revilla rumesponde sa mga nasunugan sa Tondo

ni Info @News | September 16, 2024

Nitong Linggo ng tanghali (Septyembre 15) ay agarang rumesponde ang batikang lingkod-bayan na si Senador Ramon Bong Revilla, Jr. sa mga biktima ng malawakang sunog noong Sabado (Set 14) sa Tondo, Maynila.

Halos dalawang libong pamilya ang nawalan ng tahanan matapos matupok ng apoy ang kanilang mga tirahan sa Aroma Compound sa Vitas, Tondo na isang tenement area.

Agad-agad na umaksyon si Revilla at dumalaw sa mga evacuation centers kung saan pansamantalang nananatili ang mga apektado ng sakuna.

Nagdala ang mambabatas ng libo-libong food packs, hot meals, bottled water, at mga tsinelas para makatulong sa mga labis na pangangailangan ng mga nasunugan.

“Nakakahabag man ang sinapit ng ating mga kababayan sa Tondo, nagpapasalamat pa rin ako sa Panginoon at ligtas sila,” pahayag ni Revilla.

“Kapag may mga ganitong sakuna, sinisiguro ko na agad akong makakapagpaabot ng tulong sa mga biktima dahil di ko lubos maisip ang kanilang pinagdadaanan. Sa pamamagitan man lang ng ating konting tulong ay maibsan ang tindi ng kanilang pinagdadaanan,” dagdag nito.

Sa ngayon ay nananatili ang mga biktima ng sunog sa tatlong evacuation centers — covered courts ng Barangay 105 at Barangay 106 at sa Gen. Vincente Lim Elementary School.

Hinikayat ni Revilla ang ibang mga kababayan na makapag-abot ng tulong sa mga nasunugan sa abot ng kanilang makakaya.

“Marami namang tumutulong pero marami rin talaga ang apektado ng sunog na ito. Magsisimula ulit sila dahil wala na halos gamit na naisalba. Kaya hinihikayat ko ang mga kababayan natin na may ginintuang puso na magpa-abot rin ng tulong. Oras muli para sa bayanihan,” pagwawakas ng senador. -30-

Revilla walang patid sa paghahatid ng tulong sa mga abang kababayan

ni Info @News | September 13, 2024

Walang patid ang paghahatid ng tulong ni Senador Ramon Bong Revilla, Jr. sa kanyang mga kababayan sa iba’t ibang panig ng bansa.

Nitong Miyerkules lang ng gabi (Septyembre 11) ay nagtungo ang butihing mambabatas sa kanyang sariling bayan sa Bacoor, Cavite upang tumugon sa mga biktima ng malaking sunog doon. Halos isang libong pamilya o mahigit sa apat na libong indibidwal ang lubhang apektado sa nasabing malawak na sunog at nawalan ng tirahan

Namahagi si Revilla ng hot meals sa lahat ng nasunugan na nanatili sa evacuation centers. Dagdag pa dito ay nag-abot rin siya ng damit at tsinelas para may pansamantalang magamit ang mga biktima.

“Pinuntahan natin kagabi yung mga kaawa-awa nating mga kababayan sa Bacoor na biktima ng sunog. Hindi po biro ang masunugan. Kaya buong puso akong nakikisimpatya sa ating mga kababayan at patuloy kong ipagdarasal ang kanilang kaligtasan,” ani ng mambabatas.

Agad-agad kinabukasan ay nagtungo naman si Revilla sa Lalawigan ng Catanduanes para mamahagi ng tulong pinansyal, partikular sa bayan ng San Andres at Virac.

Sa pamamagitan ng pakikipagtulungan sa Department of Social Welfare and Development (DSWD) ay nakapaghatid siya ng tulong sa libo-libong benepisyaryo.

Kasama ng batikang lingkod-bayan sina Cong. Jose “Bong” Teves, Jr., Gov. Joseph “Boboy” Cua, Vice Governor Peter “Boss Te” Cua, Mayor Leo Mendoza at Mayor Sammy Laynes.

Bukod sa tulong pinansyal, namigay rin si Revilla ng agricultural interventions sa mga magsasaka sa Catanduanes, sa tulong ng Department of Agriculture at ni Sec. Francis “Kiko” Tiu Laurel Jr.

“Binibigay lang po natin sa ating mga kababayan ang mga dapat naman talaga nilang natatanggap mula sa gobyerno. Nawa ay makatulong ito sa kanilang mga pang-arawang pangangailangan hanggang sa pag-unlad ng kanilang mga buhay,” ani ni Revilla

“Hindi po tayo magsasawang puntahan mismo ang ating mga kababayan para mag-abot ng tulong. Tungkulin po natin ito at kahit kailan ay hindi natin tatalikuran,” pagtatapos ng mambabatas. -30-

Financial literacy seminar, kailangan ng mga OFW

ni Bong Revilla @Anak ng Teteng | September 11, 2024

Nitong nakaraang araw, naging co-sponsor tayo sa Senate Bill No. 2792 na naglalayong pag-ibayuhin ang financial literacy ng mga overseas Filipino workers (OFWs). 

Ito ay dahil sa nais nating susugan ang kontribusyon ng ating mga OFW na itinuturing na mga makabagong bayani na isa sa mga dahilan kung bakit maayos ang ating ekonomiya. Layon ng naturang panukala na obligahin ang bawat OFW na bago magtungo sa ibang bansa ay sumailalim muna sa financial literacy seminars na bahagi ng kanilang Pre-Departure Orientation Seminar.

Ang bawat OFW na papasok sa bagong kontrata ay kailangang sumailalim sa Post-Arrival Training Seminars (PATS) on financial literacy. Maaari ring isama ang financial literacy training sa Pre-Migration Orientation Seminars (PMOS) para sa mga OFW family.

Ang training programs ay isasagawa ng walang bayad at ang mga ituturo ay binubuo ng mga usaping may kaugnayan sa pagpaplano hinggil sa pananalapi, pag-iipon at tamang paggasta, kabilang din ang debt management, financial products, digital financial literacy, cyber-hygiene, data integrity, fraud and scam prevention, financial consumer protection, financial patterns, practices at kultura ng bansang nais puntahan.

Ang panukalang ito ang magsisilbing daan upang hindi mauwi lang sa wala ang bawat patak ng pawis, puyat, pagod at pangungulila ng ating mga kababayang nagpapakahirap maghanapbuhay sa ibang bansa. 

Kailangang-kailangan ang financial literacy upang mabigyang proteksyon ang mga OFW. Iba ang may kaakibat na kaalaman pagdating sa tamang pagmamaniobra ng kanilang suweldo, resources, investments at remittances.

Pagdating ng araw, kapag nagbalik-tanaw sila sa mga pinagdaanan at mga pinaghirapan nila, hindi ba’t masarap isipin na katuwang tayo upang magkaroon sila ng maayos na masisilungan, edukasyon para sa kanilang pamilya at sapat na naipundar na magbibigay sa kanila ng tsansa na mamuhay ng kumportable, masaya at wala ng iba pang aalalahanin.

Wala naman tayong ibang nais kundi ang maisulong ang mga panukalang layong mapabuti ang kapakanan ng ating mga OFW.

Bilang mga moderno at ipinagmamalaking mga bayani ng ating bansa, sila ang mga haligi at ilaw ng tahanang Pilipino. Sila ang sumusugal sa iba’t ibang panig ng daigdig sa hangaring mabigyan ng mas magandang kinabukasan ang kani-kanilang pamilya. Ngunit kasabay ng kanilang ‘di matatawarang sipag at sakripisyo sa dayuhang bansa, isang mahalagang hakbang para sa kanila ang pagkakaroon ng sapat at wastong kaalaman sa pamamahala na bunga ng kanilang mga pinaghirapan — at dito papasok ang tinatawag nating financial literacy para sa OFWs. 

Hangad nating sa pamamagitan ng Mandatory Financial Literacy Training Seminar na itinatakda ng panukalang ito, tayo ay magiging instrumento upang higit na mapabuti at malagay sa tamang direksyon ang bawat sentimong pinaghihirapan ng ating minamahal na kababayang Pinoy worker abroad.

Kung maisasabatas, balang araw sa dapit-hapon ng kanilang buhay, ay matatamasa nila ang kanilang mga sakripisyo. Marami na kasi tayong kababayan na nangibang bansa ngunit sa halip na umunlad at magtagumpay sa buhay ay nauwi sa wala dahil sa kakulangan ng kaalaman sa mga bagay-bagay partikular sa paghawak ng kanilang mga kita.

Ngunit hindi rin maitatanggi na marami ang tagumpay na kuwento mula sa mga OFW na dahil marunong sa buhay ay napakalayo ng narating at dapat na tularan ng iba sa pamamagitan naman ng pagbabahagi ng kanilang kaalaman kung paano nagtagumpay. 

Ang iniiwasan lang natin ay mauwi sa wala ang pinaghirapan ng mga OFW na paulit-ulit nangyayari at tila hindi natututo ang ilan na kung hindi natangay ng mga scammer ang perang maraming taong pinag-ipunan ay naglaho lamang dahil nabuyo sa sugal at natalo.

Ang lahat ng mga posibleng makapagpahamak sa isang OFW ay tatalakayin at masusing ituturo upang hindi na mangyari pa sa kanila kung paano nalugmok at nalugi ang ibang Pinoy worker abroad.  

Kabilang din dito ang mga kababayan na hindi sanay humawak ng malaking halaga at karaniwang nabibigla kapag nakatanggap ng malaking suweldo habang natataranta kung paano gagastusin — ito ang mga malalapit sa disgrasya na sakaling natapat sa isang matamis mangusap ay maloloko lang pala.

Higit sa lahat marami sa ating mga OFW ang mapapahamak sa ibang bansa dahil sa kakulangan ng kaalaman sa kultura ng bansang kanilang pupuntahan. Minsan tumulong lang pero sila pa ang napahamak dahil sa hindi nga nila naintindihan ang kultura.

Marami pang suliraning kaakibat ang pag-a-abroad na matutugunan ng panukalang batas na ito. Mas mabuti ang naghahanda kaysa magkaproblema, at bago pa tayo humantong sa pagsagip sa kababayang nasa ibang bansa na maaaring nahaharap na sa kamatayan dahil sa kakulangan lamang sa kaalaman.

Marahil ay naiintindihan na ninyo ang kahalagahan nito kung bakit dapat natin itong suportahan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com