Epektibo ang trabaho ng contact tracer

ni Bong Revilla - @Anak ng Teteng | July 23, 2021

Nakababahala ang lumalaking balita hinggil sa hindi mapigilang pagpasok ng Delta variant sa ating bansa at maging ang mga galaw ng Inter-Agency Task Force for the Management of Emerging Infectious Diseases (IATF-EID) ay ramdam ang mga biglaang pagbabago.

Kabilang na ang mariing pagtutol ng pamahalaan na payagan ang face-to-face classes at maging ang maliliit na pagtitipon sa mga bahay-bahay kabilang ang mga inuman ay pinababantayan na sa mga opisyal ng barangay dahil mahigpit na itong ipinagbabawal.

Nagpahayag na rin ang Palasyo na anumang oras ay hindi sila magdadalawang-isip na muling magdeklara ng enhanced community quarantine (ECQ) sa mga lugar na kakailanganin ng paghihigpit sakaling hindi na talaga mapigilan ang pagpasok ng Delta variant.

Inihahanda na rin ng Department of Health (DOH) ang mga pagamutan sa bansa kabilang na ang supply ng mga gamot, supply ng oxygen at iba pang pangunahing kakailanganin sakaling magkaroon nang pagsirit ng kaso ng mas nakahahawang COVID-19.

Base sa karanasan ng maraming bansa na nagkaroon ng daluyong ng Delta variant ay dumoble ang kanilang pangangailangan sa oxygen na dahil sa kakapusan ay naging dahilan ito ng kamatayan ng maraming nahawa sa virus.

Hindi rin natin dapat balewalain ang ulat ng OCTA Research Group na ayon sa kanilang pagsubaybay sa sitwasyon ay nakararanas na naman umano ang Metro Manila ng pagtaas ng kaso sa kasalukuyan.

Noong araw ng Linggo ay mahigit umano sa 900 na bagong kaso ang naiulat sa buong Kamaynilaan na naitalang pinakamataas na bilang ng bagong kaso sa loob ng mahigit sa isang buwan.

Pumalo naman sa 1.06 ang reproduction number sa rehiyon na naitalang pinakamataas mula noong Abril at huwag naman sanang mangyari, ngunit inaasahang tataas pa ito sa mga darating na araw.

Bukod sa Makati at Maynila na kinakikitaan ng pagtaas ng kaso ay mataas din ang one week growth rate ng Valenzuela, Pasay, Marikina at Parañaque, samantalang nasa 100 porsiyento naman ang utilization rate ng intensive care unit sa Taguig.

Ayon sa DOH ay posibleng may local transmission na ang Delta variant, ngunit hindi pa lamang umano makumpirma hanggang sa kasalukuyan na labis na nagpapabigat sa sitwasyon.

Matapos kasing i-test muli ang ilan sa napaulat na kaso ng Delta variant ng COVID-19 noong Linggo ay lumabas na walo sa mga ito ang positibo pa rin kaya itinuturing sila ng DOH na nasa active cases pa rin.

Apat sa kanila ang nagmula sa Cagayan De Oro, isa sa Maynila, isa sa Misamis Oriental at dalawa ang balikbayang overseas Filipino workers (OFWs) na bagama’t nakarekober na umano ay iba ang pinaiiral na protocol kapag variant of concern ang tumama.

Lumalabas na sa tatlong namatay sa Delta variant ay dalawa sa mga ito ang hindi naturukan ng bakuna at kasalukuyan pang iniimbestigahan kung naturukan ng COVID-19 vaccine ang isa pa.

Sa kasalukuyan ay may kabuuang 91 close contacts na ang isinumite ng DOH ng mga lokal na pamahalaan na may kaso ng Delta variant at patuloy ang pagsisikap na isinasagawa ng mga contact tracer hinggil dito.

Kaya malakas ang panawagan ng Metro Manila mayors na palawigin pa ang kontrata ng mga contact tracers na karamihan ay magtatapos na sa Agosto 3 dahil isa sila sa mga inaasahan para mabilis na matukoy ang pagtaas ng kaso ng COVID-19, partikular ang Delta variant.

Hindi lang masyadong napagtutunan ng pansin, ngunit malaki ang naitutulong ng 5,775 contact tracers para matukoy ang mga bagong kaso ng COVID-19 sa Metro Manila upang mabigyan ng kaukulang pagtugon at mabilis na mapababa ang kaso.

Lalo na ngayong may Delta variant na sobrang lakas makahawa, bukod sa medical frontliner ay malaki ang ginagampanang papel ng mga contact tracers na daig pa ang mga sundalong sumusugod talaga sa labanan para lamang habulin ang mga nahawa.

Maging ang Department of Labor and Employment (DOLE) ay nagpahayag na limitado lamang umano ang pondo ng kanilang tanggapan, ngunit sisikapin umano nilang maglaan ng P200-milyon para sa karagdagang dalawang buwan na pagpapalawig sa kontrata ng contact tracers.

Ubos na rin ang pondong nakuha sa Bayanihan 2 kaya hanggang ngayong Agosto 15 na lang din ang contact tracers ng Department of the Interior and Local Government (DILG) na pumapalo sa 15,000 nationwide at 2,381 sa mga ito ang naka-deploy din sa Metro Manila.

Maging ang sariling pondo ng DILG paubos na rin kaya humihingi na sila ng P1.7 bilyon sa Office of the President para palawigin ang kontrata ng contact tracer hanggang Disyembre 2021.

Plano rin ng naturang kagawaran na panatilihin ang kasalukuyang bilang ng contact tracers hanggang 2022 kaya magiging bahagi ito ng hinihingin nilang budget para sa susunod na taon.

Ganito kahalaga ang contact tracer sa kasalukuyang pandemya kaya marapat lamang na ibigay natin ang ating suporta dahil inilalaan nila ang kanilang buhay para sa kaligtasan ng iba!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Kung tingin ng iba wa’ ‘wenta ang online… Mas walang kuwenta ang wala talagang ‘learning’

ni Bong Revilla - @Anak ng Teteng | July 21, 2021

Kamakailan ay may lumabas na ulat para sa school year 2020-2021 o ang tinatawag na ‘the pandemic school year’ na umabot sa tatlong milyong mag-aaral ang hindi na nag-enroll o mas piniling huminto sa pag-aaral dahil sa pangamba na mahawa sa COVID-19.

Hindi lamang mag-aaral kung hindi may ilang magulang pa mismo na mas pinili ang manatili na lamang sa bahay ang kanilang anak na dumagdag sa bilang ng mga nasa sitwasyon ng ‘gap year’.

Ang polisiya ng pamahalaang “no student left behind” ay nanatiling polisiya na lamang at hindi ito ganap na naisakatuparan dahil sa ilang problema sa programa ng “blended learning” na siyang nagtaguyod ng online classes, printed materials at lessons broadcast sa television at social media.

Isa sa lumutang na dahilan sa discussion paper ng Philippine Institute for Development Studies (PIDS), 1 porsiyento lamang mula sa mahirap na pamilya, 6 na porsiyento mula sa may mababang kita at 27 porsiyento mula sa lower middle-income households ang may sariling computers.

Hindi pa kabilang dito ang napakamahal na singil sa napakabagal na koneksiyon ng internet sa bansa na hanggang ngayon ay hindi pa rin nareresolba kung paano maisasayos ng mga telecommunications company ang kanilang hindi maayos na serbisyo.

Idagdag pa ang napakarami nating kababayan na nawalan ng kabuhayan at hanapbuhay na isa sa napakalaking dahilan kaya mas pinili nilang ihinto na muna ang pag-aaral ng kani-kanilang anak dahil mas prayoridad nila ang pagkain sa araw-araw.

Nitong unang linggo ng Hulyo ay naglabasan sa ilang pahayagan ang ulat ng World Bank hinggil sa poor performance umano ng ating mga mag-aaral sa tatlong international assessments na ating nilahukan, ngunit kalaunan ay humingi rin ng paumanhin ang Word Bank dahil sa maling ulat.

Gayunman, nabahala pa rin ang Palasyo hinggil sa walang katotohanang ulat at sa halip ay pinatutukan pa rin ang sitwasyon upang masigurong maayos at hindi nahuhuli ang mga batang mag-aaral sa ating bansa.

Sa pinakahuling anunsiyo ni Pangulong Rodrigo Duterte ay hindi pa rin niya pinayagan ang proposal ng Department of Education (DepEd) na subukan na ang face-to-face classes kahit patuloy pa umanong nadaragdagan ang mga guro at ilang mag-aaral na maturukan na ng bakuna laban sa COVID-19.

Maging ang pakiusap ng DepEd na subukan man lamang ang face-to-face classes kahit sa mga lugar na walang kaso o mababa ang kaso ng COVID-19 ay hindi pinayagan ng Pangulo upang higit na mapangalagaan ang mga mag-aaral.

Mahigit sa 20 milyong estudyante ang naobligang pumalaot sa online at module-based learning mula noong Marso ng nakaraang taon at ang mga batang limang taon pataas ay pinayagan nang makalanghap ng hangin sa labas ng bahay ay nito lamang nagdaang linggo.

Alam naman natin kung gaano katindi ang naging epekto ng online learning sa ating mga estudyante na bukod sa humina ang sistema ng edukasyon ay marami na ang napilitang huminto sa pag-aaral na may kaugnayan sa pandemya ang mga kadahilanan.

Lalo pa at kumpirmadong may local cases na ng mas nakahahawang Delta variant ng COVID-19 sa bansa at nagpalabas ng pahayag ang OCTA Research Group sa mga magulang nang dobleng pag-iingat sa pagpapalabas sa mga bata.

Kahit bata at mas malaki ang posibilidad na malabanan ang mga sakit ay maaari silang makaranas ng tinatawag na ‘long COVID’ o ‘yung sintomas ng COVID-19 kahit negatibo sa virus.

Nasa sampung porsiyento o 1 sa bawat 10 ang nagkaroon ng COVID-19 ang nakaranas ng long COVID at maging sa ibang bansa ay napakataas umano ng insidente ng infection sa mga bata kaya kailangan talaga ng matinding pag-iingat.

Handa man ang gobyerno na mabigyan ng bakuna ang nasa 39 milyong bata sa bansa ay hindi pa rin ito naisasakatuparan dahil sa kakulangan ng bakuna at iba pang problemang kinahaharap hinggil dito.

Nasa gitna na ng pag-aaral ang mga bakunang inihahanda para sa mga bata at ito ay ang Pfizer para sa edad 12 hanggang 15, Moderna para sa edad 15 hanggang 17 at Sinovac para sa edad 3 pataas.

Alalahanin natin na nadaragdagan na ang mga kaso ng nahahawa sa COVID-19 kahit kumpleto na ang bakunang itinurok kaya huwag tayong masyadong kampante na hindi mahahawa dahil may tinatawag na tsamba kahit nabakunahan na.

Kaya sa pagbubukas ng klase ay mananatili tayo sa online learning at nasimulan na naman nating pagtulung-tulungan na maitawid ito sa tulong ng masisipag na guro at mga magulang kaya mas lalo pa nating itong pag-ibayuhin para patunayang kahit kailan ay hindi talaga nahuhuli ang mga batang Pinoy pagdating sa edukasyon.

Kung sa tingin ng marami ay walang kuwenta ang online learning, mas walang kuwenta ang wala talagang learning dahil tiyak na ito na ang inyong ending!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Bilang na ang araw ng mga manufacturer ng pekeng LPG

ni Bong Revilla - @Anak ng Teteng | July 19, 2021

Bilang na ang araw ng mga manufacturer ng pekeng liquefied petroleum gas (LPG) cylinder matapos maresolba ng Bicameral Conference Committee ang mga hindi nagtutugmang probisyon sa Senate Bill No. 1955 at House Bill No. 9323.

Ang Senate Bill 1955 na tinaguriang LPG ACT o ang ‘An Act Providing for the National Energy Policy and Regulatory Framework for the Philippine Liquefied Petroleum Gas Industry' na isinumite noong Disyembre 15, 2020 ay isa ang inyong lingkod sa mga co-author.

Dahil dito ay humantong ang pagkakaresolbang ito sa panukalang-batas na aayos at mag-aatas ng tamang pamantayan sa industriya ng LPG na matagal nang problema ng marami nating kababayan na gumagamit nito.

Malaking tulong ito sa ginagawang pagbabantay ng Department of Trade and Industry (DTI) dahil hanggang sa kasalukuyan ay talamak pa rin ang bentahan ng mga pekeng LPG na lubhang napakadelikado.

Parang hindi natatakot ang mga fly-by-night manufacturer ng mga pekeng LPG kahit may standards enforcement campaigning at market monitoring ang DTI sa buong Metro Manila at mga karatig lalawigan.

Ang pobre nating mga kababayan kasi ang biktima nito, partikular ‘yung mga kapos sa kaalaman at ang tanging pinagbabasehan lamang ay ang presyo na mas mura kumpara sa mga lehetimong LPG sa merkado.

May ilan namang pikit-matang binibili ang mga pekeng LPG kahit alam nilang delikado dahil sa maling pagtitipid at naniniwala silang depende naman ang aksidente kung paano nag-iingat ang gumagamit.

Ngunit taliwas ito sa kampanya ng DTI na maigting ang panawagang huwag bumili ng mga pekeng LPG at para makasigurong ligtas, dapat may tatak na ICC at PS ang LPG tank upang hindi malagay sa panganib ang buhay ng bumili.

Sa kasalukuyan ay ang Philippine Standard (PS) at Import Commodity Clearance (ICC) ang siyang palatandaan na ligtas gamitin ang LPG tank na pasadong makapal ang bakal, walang butas o kalawang na taliwas sa mga pekeng naglipana sa pamilihan.

Noon pa man ay may mga lehitimong manufacturer ng LPG tank ang naghain na ng pormal na reklamo sa DTI dahil sa hindi nga makontrol ang pagkalat ng mga pekeng LPG tank na walang tatak ng PS at ICC.

Lumalabas sa datos na maraming sunog na ang naganap na ang tanging dahilan ay ang pagsabog ng pekeng LPG tank, ngunit tila hindi naman natututo ang mga mamimili dahil marami pa rin ang patuloy na tumatangkilik ng substandard na tangke.

Alam n’yo ba na ang pagtangkilik sa mga pekeng LPG tank na ito ay isang malaking epekto sa ating ekonomiya dahil sa hindi naman nagbabayad ng buwis ang mga ito bukod pa sa napakadelikado.

Sa kasalukuyan ay umaasa lamang tayo sa Fair Trade Enforcement Bureau (FTEB) sa pamamagitan ng Surveillance and Monitoring Division na masusing binabantayan ang mga manufacturer ng LPG tank, ngunit marami pa rin ang nakalulusot, partikular sa mga lalawigan.

Umaasa lamang ang marami sa Fair Trade Law at sa mga batas sa product standards bilang suporta sa Bureau of Philippine Standards kaya nga hinihimok na lang natin ang publiko na isumbong sa FTEB kung may alam silang mga bodega na pinaglalagakan ng mga pekeng LPG tank.

Maraming fly-by-night manufacturer na nakatago lamang sa mga liblib na lugar ang kanilang mga pagawaan at madali itong malaman dahil sa maingay, pukpukan nang pukpukan habang gumagamit ng welding machine na madalas ay umaalingasaw ang amoy ng LPG sa kapiligiran.

Pero sa oras na mapagtibay na ng House at ng Senado ang Bicameral Conference Committee report hinggil sa niresolbang panukala ay agad itong ipadadala sa Palasyo para sa lagda ni Pangulong Rodrigo Duterte.

Napakalaking tulong nito dahil sa layon ng naturang panukala na makapagtakda ng standards at safety protocols para sa industriya ng LPG partikular sa mga importers, bulk suppliers, distributors, haulers, refillers, trademark owners, marketers, dealers at retail outlets.

Nakapaloob din sa ‘LPG Industry Regulation Act’ na magkaroon ng tamang proseso sa cylinder exchange and swapping program upang magkaroon ng pagkakataon ang consumers na makabili ng LPG brand na kanilang gusto.

May mga pagkakataon kasi na ang konsumer ay magpapa-deliver ng LPG at karaniwan ay napapalitan ng substandard o lumang LPG tank at kapag muling naubos ay muli silang magpapa-deliver at hindi na ito tatanggapin ng delivery boy dahil luma na umano, samantalang sa kanila rin nanggaling ang bulok na LPG tank.

Sa pamamagitan ng LPG Industry Regulation Act ay mahihinto na ang illegal trade ng substandard ng LPG cylinder at magkakaroon pa ng proteksiyon ng mga kumukonsumo nito at magkakaroon na ng tamang panuntunan sa pagpapatupad nito.

Nakalulungkot na ang mga fly-by-night manufacturer na ito ay nagsisiyaman habang ang mamimili ay parang nag-uwi ng bomba sa kanilang tahanan na kahit anong oras ay puwedeng sumabog at maging mitsa pa ng kamatayan ng mga mahal nila sa buhay!

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com