Sindikato sa likod ng bentahan ng mga pekeng vaccination card online, sampulan!

ni Bong Revilla - @Anak ng Teteng | August 02, 2021

Dumating na ang pingangambahan ng mga eksperto na isang araw ay wala na tayong magagawa kundi ang ipatupad ang pinakamahigpit na puwedeng ipatupad para lamang mailigtas ang marami nating kababayan na mahawa sa Delta COVID-19 variant.

Bagama’t hindi pa tahasang ipinatutupad ay nagbigay na ng babala si Pangulong Rodrigo Duterte na magsagawa nang paghihigpit na kahit labag sa kanyang kalooban ay wala na itong magawa kundi ang magbaba ng kautusan dahil sa matinding banta ng mas nakahahawang virus na nakapasok na sa ating bansa.

Matatandaang inatasan ng Pangulo ang mga opisyal ng barangay na tiyakin ang kalagayan ng bawat indibidwal sa kani-kanilang nasasakupan at siguruhing mapigilang lumabas ng bahay ang mga hindi pa natuturukan ng bakuna laban sa COVID-19.

Literal na pinababantayan ng Pangulo sa pinakahuli niyang public address na napanood sa telebisyon ang sinumang hindi pa nababakunahan na mahuhuling nasa labas ng bahay para muling ibalik kung saan ito nakatira dahil tinagurian na silang walking spreader.

Dahil wala namang umiiral na batas para obligahing magpaturok ng bakuna ang indibidwal ay walang magawa ang pamahalaan kundi ang lakasan na lamang ang loob para ipatupad ang paghihigpit na lantad sa batikos.

Sabi nga ng Pangulo, walang magiging katapusan ang problemang ito kung pagbibigyan lahat ang gusto ng publiko, partikular ang mga ayaw magpabakuna dahil bayan umano ang pinag-uusapan dito at kung ayaw makatulong sa pamamagitan nang pagpapabakuna ay huwag nang lumabas ng bahay.

Alam naman nating napakabigat ng desisyong ito ng Pangulo at inaasahan nating tatawagin itong diskriminasyon ng mga regular na tagapuna ng Pangulo, ngunit kung sisipatin natin sa isang banda ay wala naman siyang ibang pakay kundi ang kaligtasan ng lahat.

Nauna rito ay iginigiit ng OCTA Research Team na magkaroon ng anticipatory, preventive at circuit breaker lockdown upang hindi na lumala pa ang sitwasyon na tulad nang ipinatutupad sa kasalukuyan sa mga bansang Australia at New Zealand.

Agad namang umaksiyon ang pamahalaan hinggil dito dahil hindi lang umano nito mapapababa ang kaso kung hindi maisasalba pa ang ekonomiya dahil posible umano tayong matulad sa Indonesia, India at Thailand na huli na ang lahat bago pa kumilos.

Nauna rito ay nanawagan si Presidential Adviser for Entrepreneurship Joey Concepcion na hindi umano dapat magsagawa ng lockdown dahil makaaapekto ito sa ekonomiya at sa halip ay ang taong walang bakuna lamang ang i-lockdown.

May mga lugar na umanong nagpapatupad nito dahil kamakailan lamang ay inanunsiyo ng lokal na pamahalaan sa Lapu-Lapu City sa Cebu na hindi maaaring pumasok sa mall at supermarket mula Agosto 25 ang hindi bakunadong residente.

May grupo rin ng mga negosyante na isinusulong na ang paghihiwalay ng mga taong naturukan na ng bakuna at hindi, maging sa mga opisina, restoran at iba pang establisimyento upang wakasan na umano ang pagtaas ng kaso ng COVID-19.

May ilan ding nagsusulong na panahon na umano para magkaroon ng mga buses para sa mga kababayan nating naturukan na ng bakuna dahil makapagbibigay umano ito ng kumpiyansa sa mga mananakay, partikular sa mga pumapasok sa trabaho.

Aminado naman ang Department Of Health (DOH) na tumaas ng 47 porsiyento ang kaso ng COVID-19 sa Metro Manila kumpara ng mga nakaraang linggo kaya nga sang-ayon sila sa hiling ng OCTA na magpatupad ng ‘circuit breaker’ lockdown.

Unti-unti umanong nararamdaman ang pagtaas ng kaso ng Delta variant sa maraming lugar sa bansa at apat na ang kumpirmadong nasawi hinggil dito bukod pa sa orihinal na COVID-19 na naglalaro pa rin sa halos 5,000 ang naitatalang kaso araw-araw.

Ibig sabihin, hindi lang ang Pangulo ang nakakaisip na higpitan na ang mga ayaw magpabakuna dahil marami na rin ang punding-pundi na sa mga kababayan nating ayaw magpaturok ng bakuna na sa kabilang banda ay nirerespeto rin natin ang kanilang pasya.

Ngunit dahil sa kautusang ito ng Pangulo ay nakatanggap tayo ng ulat na lumakas ang bentahan ng mga pekeng vaccination card online sa halagang P200 hanggang P300 na ginagamit sa mga sumisita na wala namang kakayahan upang makumpirma na peke ang naturang card.

Maging ang mga sindikato ng pekeng dokumento sa Recto na bahagyang tumamlay ang negosyo dahil sa pandemya ay biglang nabuhayan dahil sa pagdagsa ng mga ayaw magpabakuna na nais magkaroon ng vaccination card.

Sa ngayon na wala pang opisyal at standard vaccination card na ipinamamahagi ang pamahalaan na hindi kayang mapeke kaya makatutulong kung magbibigay ng kopya ang lokal na pamahalaan sa mga pasukan ng establisimyento sa kani-kanilang nasasakupan ng talaan ng mga naturukan na ng bakuna.

Sa ganitong paraan ay magkakaroon ng basehan ang mga bantay ng mga establisimyento para tiyaking peke o hindi ang ipinapakitang vaccination card ng nais pumasok sa mga pamilihan, restoran at iba pang mataong lugar.

Kaya tinatawagan natin ang Philippine National Police (PNP) na sana ay trabahuin ang mga gumagawa mismo ng mga pekeng vaccination card, nagbebenta at gumagamit nito dahil bukod sa isa itong serious offense ay lubhang napakadelikado na makalusot sa mga sumisita ang mga hindi nabakunahan.

Ayaw magpabakuna pero gustong lumabas ng bahay gamit ang pekeng vaccination card lalo pa at panahon na naman ng enhanced community quarantine (ECQ) dapat may masampulan dahil tiyak na sila ang magkakalat ng mas nakakahawang Delta COVID-19 variant.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Kung susuportahan ang mga atleta, makakaya nating makipagsabayan sa buong mundo

ni Bong Revilla - @Anak ng Teteng | July 28, 2021

Halos patapos na natin ang isinusulat na artikulo hinggil sa huling State of the Nation Address (SONA) ni Pangulong Rodrigo Duterte nang bigla na lamang maagaw ng atensiyon ng noon ay nakikipagtunggaling si Hidilyn Diaz.

Ang saglit na paglingon sa telebisyon ay tumagal hanggang sa matapos ang mismong laban ni Diaz at sa isang iglap ay nabago ang direksiyon ng ating pagsusulat at saglit isinaisantabi ang SONA na personal pa naman nating dinaluhan.

Maganda sa kabuuan ang SONA at halos buong bansa ay tumutok dito kaya naisip natnng unahin na ang ginawang kasaysayan ng ating weightlifter na nakasungkit ng unang gintong medalya para sa Pilipinas nang talunin nito ang world champion ng China at record holder Liao Qiuyun sa makapigil hiningang face off sa Tokyo International Forum.

Ang 30-anyos na weightlifter mula sa Zamboanga City na may taas na 4’ 11 ay inagaw ang atensiyon ng buong mundo nang buhatin nito ang kabuuang 224 kg—97 kilogram mula sa snatch at 127 kg sa clean and jerk na isang bagong record sa quadrennial sports conclave.

Halos hindi humihinga ang lahat ng nasa loob ng stadium at maging ang nanonood nating kababayan nang buhatin ni Diaz ang Olympic record na 127 kilograms sa kanyang third at final lift upang maiuwi ang gold medal sa kabuuang iskor na 224.

Kitang-kita na hindi magkamayaw sa tuwa ang maliit na grupo ng mga Pinoy na nasa loob mismo ng stadium at nag-iiyakan dahil sa tuwang dulot nang pagkakapanalo ni Diaz at maging ang social media ay napakarami ng mga pahayag ng kasiyahan.

Ramdam na ramdam ang luha ng kasiyahan ng ating mga kababayan na nanood kung paano ipaglaban ni Diaz ang ating bandila na kahit ilang sandali ay tiningala ng buong mundo dahil sa husay at kabayanihan ng atletang Pinoy.

Hindi lang basta medalyang ginto ang nasungkit ni Diaz dahil winakasan din niya ang 97-taong paghihintay ng buong Pilipinas sa Olympic gold medal sa kakaibang edisyon ng Summer Games.

Kung inyo pang naaalala ay nakakuha rin ng silver medal si Diaz sa Rio Olympics, apat na taon nang nakararaan at muntik na rin niyang maiuwi ang gintong medalya, ngunit kinapos ng kaunti ang kanyang kapalaran.

Pero matagumpay niyang naiuwi ang gold medal mula sa 2019 Southeast Asian Games kaya maituturing na talagang beterano na sa labanan si Diaz at ito na ang kanyang ika-apat na consecutive Olympic appearance.

Isipin n’yo, mula 1924 ay nagsimula na tayong sumali sa kompitisyong ito at ngayon lamang nangyari sa kasaysayan na manguna ang Pilipinas sa women’s 55-kg weightlifting event sa 2020 Tokyo Olympics noong Lunes ng gabi.

Matagal na nating hindi nararamdaman ang maluha at gapangan ng kilabot sa buong katawan na muli nating naranasan nang inaawit ang Lupang Hinirang habang nakasaludo si Diaz na isang sarhento sa Philippine Air Force (PAF) na tumutulo rin ang luha.

Nakakikilabot din na ang kakaunting bilang ng mga Pilipino sa loob ng stadium ay malakas na sinasabayan ang ating pambansang awit na malinaw na naririnig sa telebisyon.

Bukod sa makasaysayang medalyang ginto, dalawang Olympic records ay tumataginting P33-milyon ang naghihintay kay Diaz sa kanyang pag-uwi sa bansa na magmumula sa Philippine Sports Commission (PSC) at iba pang tycoons sa bansa.

Ayon sa PSC’s incentive system (RA 10699) ang Olympic gold ay nagkakahalaga ng P10-milyon at si Diaz nga ang kauna-unahang makapagbubulsa ng naturang halaga mula sa government sports agency.

Kaya lamang inabot ng P33-milyon ang naghihintay na halaga para kay Diaz dahil sa pangako nina Manny Pangilinan at Ramon Ang na kapwa magbibigay ng tig-P10-milyon bawat isa at karagdagang P3-milyon naman mula kay Deputy Speaker of the House na si Mikee Romero.

Nakatakda ring magbigay ng house ang lot si Philippine Olympic Committee (POC) president Abraham Tolentino para sa atletang mag-uuwi ng medalyang ginto sa bansa, samantalang P17- milyon naman para sa silver at P7-milyon naman para sa bronze.

Si Diaz na naging unang Pinay na double Olympic medalist dahil nagwagi na rin ito ng silver medal sa Rio Olympic ay naungusan na ang swimmer na si Teofilo Yldefonso na tanging multi-medaled Filipino Olympian matapos na manalo ng bronze sa men’s 200 meter breaststroke sa 1928 Amsterdam at 1932 Los Angeles.

Inaasahan nating mas marami pang insintibong matatanggap si Diaz mula sa mga kilalang negosyante sa bansa dahil sa makasaysayang karangalang dinala niya sa ating kapuluan.

Patunay lamang ito na kapag tututukan at bibigyan ng kaukulang suporta ang mga atleta ay kaya nating makipagsabayan sa buong mundo at sana ay ito na ang simula.

Kaugnay nito ay agad tayong nagpasa ng resolusyon sa Senado na pumupuri at kumikilala sa kanyang husay, galing at talino na naging armas niya para marating ang pinakamataas na antas ng atleta sa larangan ng weightlifting sa Olympic.

Congratulations Hidilyn Diaz, ang bagong bayani sa ating panahon!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Ika-107 anibersaryo ng Iglesia Ni Cristo

ni Bong Revilla - @Anak ng Teteng | July 26, 2021

Bukas ay nakatakdang magdiwang ng ika-107 anibersaryo ang Iglesia Ni Cristo (INC) at lahat ng kaanib nito sa buong mundo ay ginugunita ang ipinangaral ng Huling Sugo sa huling araw na si Ka Felix Y. Manalo simula ng ito ay maitala sa Pilipinas noong Hulyo 27, 1914.

Hindi lamang mahilig sa propaganda ang INC, ngunit isa sila sa may pinakamaraming naiambag para matulungan ang marami nating kababayan na dumaranas ng hirap dahil sa pandemya.

Bilang isang halal na tagapaglingkod na palaging nasa mga lugar na sinalanta ng kalamidad at dumadalo sa mga pangangailangan ng marami nating kababayan sa mga liblib na lugar ay palagi nating napapansin ang operasyon ng INC.

Tagumpay ang inilunsad nilang ‘Lingap Sa Mamamayan’, tahimik, walang publisidad, ngunit libu-libong kababayan natin ang nadalhan nila ng tulong sa iba’t ibang bayan sa mga lalawigan sa bansa, partikular ang mga nawalan ng kabuhayan sa bagyo, pagbaha at ngayong panahon ng pandemya.

Meron din silang ‘Aid To Humanity’ na inilunsad worldwide at napakaraming mahihirap na bansa ang kanilang natulungan sa kasagsagan ng pandemya at tuluy-tuloy pa rin hanggang sa kasalukuyan.

Ibig sabihin, hindi lamang sa ating bansa naghahatid ng tulong ang INC dahil maging sa ibang bansa na nagngangailangan ng tulong, partikular ang mga bansang nangangailangan ng ayuda sa panahon ng pandemya ay makikita ang INC.

Nakatataba ng puso ang tahimik nilang pagtulong sa maraming tao at isang malaking karangalan din sa atin bilang Pilipino dahil sa hindi nila alintana kahit hindi kaanib ng INC basta’t nangangailangan ng tulong ay kanilang tinutulungan.

Hindi lang direktang tulong ang natanggap ng ating mga kababayan dahil maging ang ilang lokal na pamahalaan ay tumanggap ng karagdagang ayuda mula sa INC upang mapagaan ang kanilang sitwasyon na matulungan ang kanilang nasasakupan.

Bukod sa gamot, pagkain at iba pa ay naghandog din ang INC ng milyong pisong halaga ng ayuda sa ilang lokal na pamahalaan at dito ay kitang-kita ang kanilang pagkakaisa na hindi naghihintay ng anumang pagkilala.

Alam ba ninyo na mismong ang Philippine Arena sa Bulacan na pag-aari ng INC ay ipinagamit nila bilang mega facility para sa mga positibo sa COVID-19 nang walang bayad o kahit anumang kapalit.

Ang maging ang mga umatendeng frontliner sa naturang pasilidad ay pinatira ng libre sa mga air condition na bankhouse, maging ang pagkain at lahat ng personal na pangangailangan ay walang bayad na sinagot ding lahat ng INC.

Hindi naman kataka-takang kakitaan sila ng mabuting gawain dahil sa itinataguyod naman talaga nila ang pagpapalaganap ng mga salita ng Diyos dahil sa layuning mailigtas ang kaluluwa ng mga tao sa tiyak na kapahamakan sa dagat-dagatang apoy.

Sa napakalayo nang narating na tagumpay ng INC ay maituturing na isa sa pinakamagandang alaala na kanilang isinagawa ang walang tigil na pagtulong sa napakaraming lugar sa bansa na matindi ang pangangailangan.

Matatandaan na mula sa una nitong lokal sa kapisanan ng Punta, Sta. Ana, Manila ay mabilis na kumalat ang INC hindi lang sa Kamaynilaan dahil lumaganap ito sa mga karatig-bayan hanggang tawid-dagat ng Visayas at Mindanao.

Noong April 1963 ay pumanaw na si Ka Felix, ngunit matagumpay na nitong naitatag ang ecclesiastical districts sa mahigit kalahati ng mga probinsiya sa buong bansa at naisaayos na ang kalagayang pananampalataya ng lahat ng kaanib.

Taong 1968 ang INC ay pinangunahan na ni Ka Eraño G. Manalo, na noon ay siyang tumayong Executive Minister, at matagumpay nitong naitatag ang unang dalawang kongregasyon sa labas ng Pilipinas—ito ang Honolulu, Hawaii at San Francisco, California sa Estados Unidos.

Mula noon hanggang bago magtapos ang dekada ‘70, ay lalo pang lumaganap ang INC patungo sa kontenente ng North America hanggang sa ibang estado at teritoryo tulad ng New York at Guam noong 1969, at Canada noong 1971.

Bago matapos ang dekada ’80 ay narating na ng INC ang Europe, Battersea, Australia, buong Asia hanggang sa mga bansa ng Scandinavian at mga karatig bansa hanggang sa halos buong mundo na, bago pa man sumakabilang-buhay si Ka Eraño noong Agosto 31, 2009.

Dito nagsimula ang pagkakatalaga kay Executive Minister, Ka Eduardo V. Manalo, na siya namang nagpatuloy sa mga mabubuting gawain ng INC na mapalaganap ang salita ng Diyos at patuloy din ang pagdami ng mga kaanib hanggang sa kasalukuyan.

Tikom man ang bibig ng maraming Pilipino na nabigyan nila ng tulong ay tiyak na nangungusap naman ang kanilang mga mata sa tuwing makikita nila ang naggagandahang kapilya ng INC at naniniwala ako na umuusal sila nang pagpupugay sa ika-107 anibersaryo ng INC.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com