Bakuna ang susi sa pagtatapos ng pandemya

ni Bong Go - @Bisyo Magserbisyo | February 18, 2022

Patuloy ang pagpasok ng magagandang balita para sa ating bansa ngayon. Noong Pebrero 15, 2022 ay sinabi ng Malacañang na nasa low-risk classification na ang National Capital Region at ang buong Pilipinas. Bagama’t hindi tayo dapat maging kumpiyansa, ito ay nagbibigay ng pag-asa na nasa tamang direksiyon tayo patungo sa pag-ahon sa krisis na dulot ng COVID-19.

Batay sa tala ng Department of Health, ang average daily cases mula Pebrero 8 hanggang Pebrero 14 ay mababa ng 56 porsiyento kumpara sa mga kaso noong Pebrero 1 hanggang Pebrero 7.

Sa tantiya ng DOH, kung magpapatuloy ang ganitong trend, sa kalagitnaan ng buwan ng Marso ay baka nasa 83 bagong kaso na lang ang maitala kada araw kung magiging disiplinado ang lahat at susunod sa mga patakaran bilang kooperasyon sa gobyerno at sa buong komunidad.

Bilang Chair ng Senate Committee on Health, nagpapasalamat tayo sa DOH, sa ating mga frontliners, at sa lahat ng ahensiya ng pamahalaan na nakikipagbayanihan para tuluyan nang masugpo ang COVID-19 pandemic at makabalik na tayo sa normal na pamumuhay.

Unti-unti na rin nating nakakamit ang population protection. Batay ito sa sinabi ni vaccine czar Secretary Carlito Galvez kay Pangulong Rodrigo Duterte noong Pebrero 14 na sampung rehiyon sa ating bansa ang nakapagbakuna na ng mahigit 70% ng kani-kanilang populasyon.

Kaya patuloy tayong nakikiusap sa mga kababayan natin na hindi pa bakunado pero kuwalipikado, magpabakuna na kayo. Ngayon ay nakikita natin na tanging ang bakuna ang solusyon para tuluyan na tayong makawala sa mga krisis na dulot ng pandemya.

Hanggang noong Pebrero 15, nasa 223,229,820 na ang dumating na bakuna sa Pilipinas.

Ang total doses administered ay umabot na 132,426,394 doses. Sa bilang na ito, 61,331,438 na sa ating mga kababayan ang nakatanggap ng kanilang first dose; 61,828,468 ang fully vaccinated na; at 9,266,488 ang nakatanggap na ng booster shots.

Dahil din sa patuloy na pagbaba ng mga kaso sa ating bansa, nagsisimula na tayong tumanggap muli ng mga turista mula sa ibang bansa.

Nito lang Pebrero 15, batay sa tala ng Department of Tourism ay nagkaroon tayo ng 10,676 foreign travelers mula nang magbukas tayo ng border noong Pebrero 10.

Tandaan po natin na sa turismo, may negosyo at may trabaho.

Kapag muling sumigla ang ating tourism industry, magti-trigger ito ng tinatawag na multiplier effects. Magbubukas muli ang iba pang negosyo, unti-unting makababangon ang service sectors at lalakas muli ang ating ekonomiya.

Kaya patuloy ang ating apela sa mga ahensya ng pamahalaan at LGUs na mas pabilisin pa ang pagbabakuna habang unti-unting nagbubukas ang turismo at iba pang negosyo.

Kailangan po nating mamuhay na kung saan bahagi na nito ang COVID-19. Ang pinakaimportante lang na dapat nating siguraduhin ay huwag bumagsak ang ating healthcare system.

Pero kahit bumababa na ang mga kaso at natatanaw na natin ang “light at the end of the tunnel” ay hindi ko pa rin kinakaligtaan ang aking pangakong 24/7 na serbisyo sa ating mga kababayang nangangailangan ng tulong, lalo na ang mga apektado ng pandemya ang kabuhayan at mga dumanas ng sakuna at ang mga sektor na higit na nangangailangan.

Simula Pebrero 10-17, nakapaghatid ang ating tanggapan ng ayuda sa mga sumusunod na benepisaryo: 1,816 na residente ng Panglao, Trinidad at Bien Unido sa Bohol; 1,000 solo parents mula sa San Pablo City, Laguna, at 1,000 na bangkero sa Pagsanjan, Laguna; 799 micro-entrepreneurs mula sa Bagulin, Burgos, Naguilian, Bacnotan, San Juan, San Fernando City, Luna, Bangar, San Gabriel at Balaoan sa La Union; 125 micro-entrepreneurs sa Tinglayan, Kalinga; 578 indigents sa Quezon City; 750 indigents sa Marikina City; 11,936 na residente ng iba’t ibang barangay sa Carmen, Bohol na hinagupit ng Bagyong Odette; at 400 na biktima ng diarrhea outbreak sa Caraga, Davao Oriental.

Naabutan din ng tulong ang walong pamilya mula sa San Pedro City, Laguna na nasunugan; 44 sa Davao City; 14 sa San Fernando, La Union; 118 sa Tandag City, Surigao del Sur; at pitong pamilyang nasunugan sa Valenzuela City.

Kahit anuman ang mangyari sa pulitika, ipagpapatuloy natin ang serbisyong ating nakasanayan at natutunan kay Tatay Digong—ang walang tigil, walang pili, at walang takot na paglilingkod sa bayan na may buong tapang at malasakit.

Sama-sama nating itawid ang ating bansa tungo sa mas maginhawang buhay. Walang dapat maiwan sa ating pag-ahon sa krisis!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pahalagahan ang kalusugan, mga natutunan sa pandemya, susi para sa mas matatag na Pilipinas

ni Bong Go - @Bisyo Magserbisyo | February 16, 2022

Bilang Chair ng Senate Committee on Health, natutuwa tayo sa pinakahuling resulta ng Social Weather Stations survey na isinagawa noong Disyembre 12-16, 2021. Sinasabi sa ulat na 57 percent ng adult Filipinos ang mas pinipili ang kanilang magandang kalusugan kumpara sa pag-ibig at pera.

Patunay ito na sa panahon ngayon, mas binibigyang-halaga na talaga natin ang kalusugan kumpara sa ibang bagay. Ito siguro ang positibong resulta ng COVID-19 pandemic dahil naging conscious na tayo kung paano mapapanatiling ligtas ang ating sarili sa iba’t ibang sakit, at maging ang ating pamilya at komunidad. Ito ang isa sa mga natutunan natin mula sa pandemya na dapat nating mas pahalagahan para makamit ang mas matatag na Pilipinas.

Nagkaroon kasi tayo ng takot at pangamba nang dumating ang krisis pangkalusugan na dulot ng COVID-19. Nakita nating wala itong sinisino, at kahit ano ang kalagayan sa buhay ay puwedeng dapuan nito at maaaring mauwi sa kamatayan. Nagugulat na lang tayo kapag nabalitaan na ang isa nating malapit na kaibigan, kamag-anak, kakilala o sikat na personalidad ay pumanaw na pala dahil sa COVID-19.

Nakatulong sa pagkakaroon ng ganitong mentalidad ang lagi nating pagpapaalala sa ating mga kababayan na panatilihing malusog ang kanilang mga sarili. Wala ring humpay ang ating pakiusap sa lahat na laging sumunod sa mga ipinatutupad na health protocols anumang oras.

Sa ating pagkakaloob ng tulong sa mga komunidad na aking pinupuntahan, kabilang palagi sa ating ipinamamahagi ang mga facemasks, alcohol at bitamina para hindi na makadagdag pa sa gastusin ng ating mga kababayan, lalo na ng mga higit na nangangailangan, para sa dagdag na proteksyon nila sa araw-araw. Maliit na bagay kung tutuusin, pero nakakatulong para mapangalagaan nila ang kanilang sarili at komunidad.

Isa pang magandang balita. Noong Lunes, Pebrero 14, 2022 ay nakapagtala ang Department of Health ng 2,730 lamang na bagong kaso ng COVID-19. Pinakamababa ito sa mga naitatala ngayong taon. Bagama’t hindi pa naman natin sinasabi na ito ay tuluyang downward trend na, nakikita naman natin ang magagandang resulta ng halos dalawang taon nating sakripisyo habang nakikipaglaban sa pandemya.

Kapag ganito ang sitwasyon, nakahihinga nang maluwag ang ating mga medical frontliners.

Nagkakaroon din ng pagkakataon ang mga kababayan nating may ibang sakit na magpakonsulta sa ospital na mas konti ang pangamba.

Umaasa ako na patuloy pang bababa ang mga kaso ng COVID-19 kung mas marami pang kababayan natin ang mababakunahan. Kaya wala tayong tigil ng pakikiusap sa ating mga kapwa Pilipino kapag naglilibot ako sa iba’t ibang komunidad sa buong bansa na kung hindi pa sila bakunado ay agad nang magpabakuna, lalo na kung kuwalipikado naman. Ganito rin ang pakiusap ko sa mga senior citizens na nag-aalinlangan pa at pati mga magulang ng mga batang limang taon hanggang 11 na ngayon ay kasama na sa mga maaaring bakunahan.

Paulit-ulit din nating sinasabi dahil kailangan itong maunawaan at tumatak sa isip, lalo na ng mga may agam-agam pa na ang bakuna lamang ang tanging susi o solusyon sa ngayon upang unti-unti tayong makabalik sa ating normal na pamumuhay, at tuluyang makapagbukas ang malaking bahagi ng ating ekonomiya.

Sinisikap natin na sa mga susunod na araw at buwan ay mas bumaba pa ang bilang ng mga kaso.

Gayunpaman, hindi tayo dapat maging kumpiyansa. Kailangan pa rin ang sapat na pag-iingat, pagsunod sa mga patakaran, at pakikipagbayanihan upang tuluyan na tayong makaahon mula sa krisis na ito.

Kung magpapatuloy ang pagpapahalaga ng ating mga kababayan sa kanilang kalusugan, at mananalig ang malaking bahagi ng ating populasyon sa bakuna, talagang unti-unti na nating masisilayan ang sinasabing “light at the end of the tunnel". Lahat ito ay maaabot natin kung patuloy tayong magmamalasakit sa kapwa upang tuluyang malampasan ang krisis bilang isang mas matatag na bansa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Patuloy ang serbisyo hanggang sa huli

ni Bong Go - @Bisyo Magserbisyo | February 11, 2022

Noong Martes, Pebrero 8, 2022, nagsimula na ang opisyal na pangangampanya ng ating mga kandidato para sa national positions sa darating na eleksiyon. Alam nating marami sa atin ang sabik na sabik na ipakita ang suporta para sa ating susunod na mga pinuno.

Ngunit, sa kabila ng ingay at kaganapan, huwag nating kalimutan ang kapakanan ng bansa.

Tingnan nating mabuti ang kanilang plataporma, kaalaman at karanasan upang mailagay natin ang mga karapat-dapat na kandidato sa tamang puwesto at masigurong maipagpapatuloy ang magagandang nasimulan ng administrasyong ito.

Nalulungkot man ang karamihan, ngunit patapos na ang termino ni Pangulong Rodrigo Duterte.

Ganun naman talaga ang buhay — lahat ng mga bagay ay may pagtatapos.

Sa natitirang ilang buwan, nangangako si Tatay Digong na hindi siya titigil sa pagseserbisyo hanggang sa huling araw niya bilang Pangulo. Tinitiyak niyang walang oras ang masasayang sa kanyang paglilingkod.

Bukod pa rito, sinisiguro rin ni Pangulong Duterte na magkakaroon ng maayos na transisyon patungo sa susunod na administrasyon, na kung sinuman ang pipiliin ng taumbayan sa halalan ay mabibigyan ng maayos na pundasyon para mamuno, maitawid ang bansa mula sa krisis at maipagpatuloy ang magagandang programa ng gobyerno na nakatutulong sa tao.

Mainit man ang labanan sa pagkakampanya, hindi natin nakakalimutan ang mga kababayan nating nangangailangan ng tulong. Mula ika-7 hanggang ika-10 ng Pebrero, nag-ikot tayo sa iba’t ibang lugar para mag-abot ng ayuda, tulad sa La Union kung saan tinulungan natin ang 77 na benepisaryo sa Sto. Tomas; 99 sa Rosario; 31 sa Pugo; 54 sa Tubao; 105 sa Agoo; 89 sa Aringay; 43 sa Caba at 144 sa Bauang. Tinulungan din namin ang 126 nating kababayan sa Bacoor City, Cavite at 96 naman sa Calatagan, Batangas.

Nag-abot din tayo ng tulong sa 3,798 nating kababayang nabiktima ng Typhoon Odette sa Carmen, Bohol.

Samantala, bilang Chair ng Senate Committee on Health, masaya nating ibalita na tuluy-tuloy na ang pagbaba ng bilang ng mga bagong kaso ng COVID-19 araw-araw. Bagama’t hindi natin sinasabi na confirmed downward trend na ito, alam nating ang mababang bilang ng mga bagong kaso ay nangangahulugan na manageable na ang sitwasyon ng pandemya sa bansa. Noong Miyerkules, Pebrero 9, nagkapagtala lang tayo ng 3,651 na bagong kaso. Napakaliit ng bilang na ito kung ikukumpara noong nakaraang mga linggo na umaabot tayo ng mahigit dalawampung libong bagong kaso araw-araw.

Kaya sa pag-uumpisa ng kampanya, patuloy ang ating panawagan na sundin ang mga itinakdang health protocols. Huwag tayong magkumpiyansa dahil ayaw nating biglang tumaas na naman ang bilang ng mga bagong kaso kada araw. Huwag nating isugal ang kaligtasan at kalusugan ng ating mga kababayan.

At sa mga kuwalipikadong magpabakuna, ngunit nag-aalangan pa, kasama na ang mga magulang ng ating mga menor-de-edad, hinihikayat natin magpaturok na sa lalong madaling panahon. Libre ang bakuna na tanging susi natin ngayon upang malampasan na natin ang pandemya at makabalik na tayo sa normal nating pamumuhay.

Patuloy tayong magtulungan, magbayanihan at magkaisa para malampasan ang mga pagsubok na kinakaharap natin ngayon at sa mga susunod na taon. Magkakaiba man ang ating pananaw sa pulitika, iisa lamang ang ating hangarin na maipaglaban ang kapakanan ng kapwa nating Pilipino at gawing mas matatag ang ating bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.