Tiyakin ang kaligtasan at kinabukasan ng mga Pinoy

ni Bong Go - @Bisyo Magserbisyo | March 2, 2022

Ngayong mas niluwagan na ang mga protocols sa mga lugar na isinailalim sa Alert Level 1, bilang Chair ng Senate Committee on Health, natutuwa tayo na talagang nakikita na natin ang “light at the end of the tunnel” dalawang taon mula noong tumama ang COVID-19 sa buong mundo. Gayunman, hindi pa tayo dapat magpakumpiyansa.

Hindi pa tapos ang pandemya, kaya’t sa mga hindi pa bakunado, sana ay makiisa na kayo sa isinasagawang vaccination rollout ng ating pamahalaan. Ineengganyo rin natin ang mga eligible na magpa-booster shot na.

Huwag tayo masyadong maging excited sa paglabas. Manatili tayong ligtas, lalo na kung hindi naman importante ang lakad at palaging magsuot ng facemask at sumunod sa health protocols.

Pero may mga panibagong hamon na namang dumating sa ating buhay dahil sa gulo sa pagitan ng Russia at Ukraine. Tumataas ang presyo ng petroleum products at apektado ang ating mga overseas Filipino workers doon.

Ginagawa ng pamahalaan ang lahat para maproteksiyunan sila at hangga’t maaari ay ligtas na makabalik sa ating bansa.

Ngayon natin mararamdaman ang magiging magandang bunga ng pagkakatatag sa Department of Migrant Workers (DMW).

Dahil sa Republic Act 11641, na isa ang inyong lingkod sa may akda at nag-co-sponsor sa Senado na kabilang sa mga priority legislative initiatives ni Pangulong Rodrigo Duterte, may departamento nang tututok sa mga isyung kinakaharap ng mga OFWs. Hindi na sila pagpapasa-pasahan ng iba’t ibang ahensiya, kaya umaasa tayong mabilis na mareresolba ang kanilang mga problema.

At dahil nananatiling mataas ang presyo ng petroleum products, apektado rin ang hanapbuhay ng mga nasa transport sector. Hiniling natin na sa ating pamahalaan na pagkalooban ng sapat na suporta ang mga apektadong sektor. Isa sa mga paraang ito ang pagpamahagi ng fuel subsidy, lalo pa’t lumampas na sa US$100 kada bariles ang presyo ng langis sa international market.

Sa kabila ng mga panibagong hamon na ito, patuloy ang administrasyong Duterte sa pagtatrabaho para sa kapakanan ng ating bansa upang matiyak na nasa magandang sitwasyon ang kalagayan ng bawat Pilipino.

Nakikita naman natin ang napakaraming proyektong nagawa ni Pangulong Duterte sa loob ng anim na taon — na lalo pa sigurong nadagdagan kung walang pandemya. Ang mga proyektong ito ay pakikinabangan maging ng mga susunod pang henerasyon.

Tiniyak din ng Pangulo na pinoprotektahan niya ang papalapit na halalan sa Mayo at ginagawa natin ang lahat para mapanatili ang integridad ng magiging resulta nito.

Itinalaga niya ang mga pulis, sundalo at iba pang kawani ng gobyerno para pangalagaan ang mga botante laban sa terorismo, karahasan, vote-buying at pananakot.

Sa panayam kay Pangulong Duterte noong Pebrero 25, 2022, nagpasalamat siya sa mga Pilipino sa pagsuporta dahil hanggang sa huli ay mataas ang kanyang net satisfaction rating batay sa mga pinakabagong survey na lumabas.

Aniya, “I’d like to thank the Filipino people for the continued support at paniniwala ninyo sa akin sa pagkatao ko, sa pagka-official ko. I don’t know if it is an emotional outpouring, but going by the numbers, it is huge and until now it surprises me, continues to baffle me. I may be just lucky, it might be the people, tinanggap nila yung pledge ko and naniniwala sila sa ginawa ko.”

Dagdag pa niya, “When you are an officer of the government, especially an elected official, there’s a set of rules that [are] quite rigid to follow. But once the confidence of the people or your trust is broken, then may problema ka. So I am on my— I'm winding up and I am now on [my] last days of my presidency.”

Kilalang-kilala ko si Pangulong Duterte — ang puso niya para sa mga Pilipino ang dahilan kaya mahal siya ng mga ito. Para sa kanya, kapakanan ng mga Pilipino ang dapat mauna at hindi personal na interes.

Kung may dapat maging gabay ang ating magiging bagong lider, gawin niyang inspirasyon ang pagiging totoo at makatao ni Pangulong Duterte.

Mananatili ang ating tiwala at katapatan kay Pangulong Duterte at sa ating bansa. Siya ang nagturo kung paano maglingkod.

Anuman ang mangyari sa pulitika, magpapatuloy ang pagmamahal ni Pangulong Duterte sa ating bansa at sa ating mga kababayan. Maglilingkod tayo sa abot ng ating makakaya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Hatid na tulong sa komunidad para maproteksiyunan ang buhay ng bawat isa

ni Bong Go - @Bisyo Magserbisyo | February 25, 2022

Bilang Chair ng Senate Committee on Health, naramdaman natin ang bugbog na idinulot sa ating health system ng pandemya mula nang tumama ito noong 2020. Wala tayong ibang hinahangad noon kundi ang matapos na ang krisis at makabalik na tayo sa normal na pamumuhay. Kaya naman ngayon, labis tayong natutuwa na patuloy ang pagbaba ng mga kaso ng COVID-19.

Bumababa na rin ang bilang ng severe and critical cases na naoospital.

Sa pinakahuling datos ng Department of Health, 12 hanggang 15 porsiyento na lang ng national hospital admissions ang malubha at kritikal. Patunay ito na epektibo ang COVID-19 vaccines at mga ipinatutupad na mga health protocols laban sa virus. Kaya naman, patuloy ang ating apela na sana ay magpabakuna na.

As of February 22, nasa 62.77 milyong kababayan natin ang fully vaccinated na.

Kumakatawan ito sa 69% ng target na 90 milyong Pilipino na mabakunahan bago matapos ang June 2022.

Meron namang 9.86 milyong kababayan natin ang nakatanggap na ng kanilang booster shots.

Kabilang naman sa target ng National Task Force Against COVID-19 ang makapagbigay ng 72.16 million booster shots para sa adult population (18 years old and above) at mabakunahan ang nalalabi pang tatlong milyon na senior citizens at may comorbidities.

Para maisagawa ito, umaapela tayo sa gobyerno na palawakin pa ang pagbabakuna sa mga pharmacies at medical clinics. Sikapin ding magtalaga ng vaccination sites at araw ng pagbabakuna para sa boosters shots. Patuloy din dapat na palakasin ng pamahalaan ang pagpapalaganap ng impormasyon tungkol sa importansiya ng booster shot para sa pangmatagalan at dagdag-proteksiyon sa komunidad laban sa COVID-19.

Kahit kung minsan ay para na tayong sirang-plaka na paulit-ulit, hindi tayo napapagod sa pagpapaalala na ang bakuna ang tanging solusyon laban sa pandemya at susi upang malampasan ang krisis. Nakikita naman natin ang magandang resulta.

Para sa iba’t ibang ahensiya ng pamahalaan at sektor ng ating lipunan, hinihiling natin na aktibo tayong makilahok sa isinasagawang vaccine rollout. Ngayong unti-unti na tayong nagbubukas ng ekonomiya, dapat mas maraming manggagawa ang mabakunahan para ligtas sila sa pagbabalik-trabaho, gayundin ang mga estudyante para ligtas na makapagdaos ng face-to-face classes.

Hinihikayat din natin ang mga local government units na lalong pasiglahin ang kanilang ginagawang mobile and house-to-house vaccination efforts. Kung kakayanin ay tayo na mismo ang sumundo at maghatid sa mga walang kakayahang magpunta sa vaccination sites.

At tulad ng ating pangakong 24/7 na serbisyo, patuloy ang ating tanggapan sa pagkakaloob ng tulong at suporta sa mga nangangailangan katuwang ang ilang ahensiya ng pamahalaan.

Noong Pebrero 19, nagpadala tayo ng tulong para sa 308 benepisaryo mula sa Getafe, Bohol; at sa mga biktima ng sunog tulad ng 709 na residente ng Cavite City; 30 pamilya sa Tondo, Maynila; 276 na pamilya sa Bgy. Nangka, Marikina City, at 30 pamilya sa Bgy. 121 Zone 6 District 1 Tondo, Maynila.

Pebrero 22, nag-abot tayo ng tulong sa nasunugan tulad ng 99 na pamilya sa Kinasang-an, Cebu City; 94 na pamilya sa Barangay Tisa, Cebu City, at isang pamilya sa Brgy. Buhisan, Cebu City.

Pebrero 23, nakatanggap ng ayuda mula sa ating tanggapan ang 1,662 na residente ng San Juan City; 947 mula sa Pagsanjan, Laguna; 120 mula sa Floridablanca, Pampanga; at mga nasunugan gaya ng 67 pamilya mula sa Brgy. Capitol Site, Cebu City; at 178 na pamilya mula sa Basak, San Nicolas, Cebu City.

Patuloy tayong magkaisa at magbayanihan tungo sa mas komportable at ligtas na kinabukasan para sa buong sambayanang Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Hindi pa tapos ang pandemya, laban lang nang laban

ni Bong Go - @Bisyo Magserbisyo | February 23, 2022

Kapag binabalikan natin sa isip ang mga nangyari sa nakalipas na dalawang taon mula nang ma-detect ang unang kaso ng COVID-19 sa ating bansa na dala ng isang dayuhan noong Enero 30, 2020, hanggang makumpirma na mayroon na tayong local transmission noong Marso 7, 2020, parang ang hirap paniwalaan na ang dami nang nangyari mula noon.

Nagpatupad tayo ng mga kinakailangang quarantine measures sa buong bansa. Mula noon, napakalaki ng nabago sa buhay nating mga Pilipino dahil sa pandemya.

Gayunman, kahit anong hirap ang ating pinagdaanan, kumpiyansa tayong sabihin na ginawa ng Duterte Administration ang lahat ng makakaya nito. Nagtrabaho tayo nang walang hinto para labanan ang pandemya upang sagipin ang buhay ng bawat Pilipino at makatawid sa krisis na hatid ng COVID-19.

Bilang Chair ng Senate Committee on Health, umapela tayo noon na magdeklara ng national public health emergency at para bigyang-daan ang mga kinakailangang hakbang gaya ng Social Amelioration Program 1 & 2, COVID-19 Adjustment Measures Program ng Department of Trade and Industry, Tulong Panghanapbuhay sa Ating Disadvantaged/Displaced Workers ng Department of Labor and Employment, Small Business Wage Subsidy, ang pagpapauwi sa indibidwal na stranded sa Metro Manila sa kanilang mga probinsiya, gayundin ang mga galing abroad, pamamahagi ng suporta at kagamitan sa mga health institutions, benepisyo para sa ating healthcare workers, ang pagpasa ng Bayanihan Law 1 & 2, at marami pang iba.

Napakalaki ng naitulong ng mga ito para maibsan ang epekto ng pandemya lalung-lalo na sa mahihirap at higit na nangangailangan nating kababayan. Higit sa lahat, nakapagbigay ang mga ito ng kinakailangang proteksiyon para sa ating mga frontliners upang magampanan ang kanilang tungkulin.

Sa ngayon ay patuloy pa rin sa pagbaba ang mga naitatalang kaso ng COVID-19. Sinabi ng Pangulo, kamakailan lamang na marahil tapos na ang panganib na hatid ng Omicron variant.

Isinailalim na ng Malacañang ang ating bansa sa low-risk category lalo pa at sampung rehiyon na ang naabot ang 70% vaccination rate sa kani-kanilang populasyon.

Habang naghahanda tayo patungo sa pagbabalik sa normal, kailangan nating matutong mamuhay nang ligtas kahit na may panganib pa ng virus. Kailangan nating patuloy na mag-ingat habang unti-unti nating binabawi ang mga panahong nawala sa atin sa nakalipas na dalawang taon at binubuksan muli ang ekonomiya upang umusbong, lalo na ang kabuhayan sa ating mga komunidad.

At magagawa lang natin ito kung patuloy tayong makikiisa sa pamahalaan, magmamalasakit sa kapwa, at makikipagbayanihan sa isa’t isa. Alalahanin natin, hindi pa po tapos ang pandemya.

Ang ating patuloy na pagsunod sa mga ipinatutupad na patakaran ay makapagliligtas sa ating mga mahal sa buhay.

Ngayon, patuloy ang ating apela sa ating pamahalaan na mas palakasin pa ang vaccination rollout, lalo na sa mga rehiyon na may mababang vaccination rates. Ito ay para matiyak na bawat kuwalipikadong Pilipino sa bakuna ay may proteksiyon laban sa malalang epekto ng virus.

Hindi natin mararating kung nasaan man tayo ngayon kung hindi sa sipag at dedikasyon ng ating healthcare workers, ng iba pang frontliners at ng pangkalahatang publiko.

Kinikilala natin ang inyong mga sakripisyo at palagi nating ipaglalaban ang inyong kapakanan bilang inyong representante sa Senado.

Hindi natin dapat pabayaang mawala ang unti-unting pagwawagi laban sa COVID-19 sa nakalipas na dalawang taon, lalo na’t may papasok nang bagong administrasyon sa susunod na mga buwan. At kahit papalapit na ang araw ng halalan, hindi titigil ang Administrasyong Duterte sa pagseserbisyo sa inyo hanggang sa huling araw ng kanilang termino. At ipagpapatuloy natin ito bilang inyong lingkod kahit anuman ang mangyari sa pulitika.

Muli tayong umaapela sa lahat na maging responsable tayo para sa kaligtasan at kalusugan ng ating kapwa Pilipino. Sa kabila ng ating magkakaibang paniniwala, naririto tayo para maglingkod, at ang buhay at kapakanan ng ating mga kababayan ang ating pangunahing dapat na isaalang-alang.

Sa mga kapwa natin Pilipino, manatili tayong disiplinado ngayong nagbabalik na tayo sa normal na pamumuhay, unti-unti nang nagbubukas ang ekonomiya, at nakababalik na ang mga estudyante sa paaralan. Alalahanin natin na pinakaimportante ang buhay at kaligtasan ng lahat.

Mahirap man ang ating mga pinagdaanan, tinitingnan natin ang buong sitwasyon nang may pag-asang maipapamahagi sa inyo dahil unti-unti na nating nakikita ang sinasabing “light at the end of the tunnel”. Pero sa kabila ng mga ito, hindi pa rin tayo dapat maging kumpiyansa. Sa halip, gawin natin itong malaking oportunidad para matuto at magkaisa tungo sa isang magandang bukas para sa lahat ng Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.