Ayuda para sa transport group, ibigay na, ‘wag nang patagalin pa

ni Bong Go - @Bisyo Magserbisyo | March 11, 2022

Sa kabila ng maraming mga pagsubok na ating hinaharap sa panahong ito, patuloy lang tayong magbayanihan para sa ikabubuti ng ating bansa. Ang ating pagkakaisa at pagmamalasakit sa isa’t isa ang susi upang manaig ang katatagan ng ating pagka-Pilipino. Bawat problema ay may solusyon kung magtutulungan po tayo.

Isa pa sa mga pinagtutuunan natin ng pansin ngayon ay ang patuloy na pagtaas ng presyo ng petroleum products na nakakaapekto sa buhay ng bawat Pilipino.

Bilang inyong senador, anytime of the day, willing tayong mag-attend ng special session sa Senado kung kinakailangan para masolusyunan ang problema na apektado ang mga mahihirap — ‘yung mga kababayan natin na alam mong bawat piso, bawat sentimo ay napakahalaga sa kanila. Sa bawat pagtaas ng presyo ng krudo, lalong nababawasan ang kita na iuuwi nila sa kanilang pamilya.

Umaapela rin tayo sa Ehekutibo na gawin ang lahat ng paraan para maibsan ang epekto ng pagtaas sa presyo ng langis at iba pang bilihin. Kung may tulong na inilaan ang ating pamahalaan sa mga transport groups, ibigay na agad at huwag nang patagalin pa. Kung kailangan naman natin na magkaroon ng panibagong batas na ipasa para magkaroon ng budget at matulungan itong mga kababayan natin, aksyunan na natin ngayon at huwag nang patagalin pa ang paghihirap.

Sa kabila naman ng napakaraming problema ng ating bayan na hinahanapan natin ng solusyon, patuloy ang ating tanggapan sa paghahatid ng tulong sa mga kababayan nating apektado ng pandemya at iba pang krisis sa kabuhayan.

Ngayong linggo, naayudahan natin ang 3,000 benepisyaryo sa San Isidro, Davao Oriental; 1,833 sa Quezon City; at 1,000 rin sa Caloocan City.

Nakapaghatid din tayo ng tulong sa 1,000 benepisyaryo sa Valenzuela City; 4,000 sa Masinloc, Zambales; 3,000 sa Sta. Cruz, Zambales; at 992 sa Alcantara, Cebu.

Agad din tayong sumaklolo sa mga nasunugan: 200 market vendors sa Oton, Iloilo; 27 residente ng Iloilo City; tatlong pamilya sa Pulupandan, Negros Occidental; 38 pamilya sa Silay City, Negros Occidental, at 225 pamilya sa BASECO, Port Area, Manila na akin namang personal na binisita nitong Miyerkules.

Nakakalungkot makakita ng mga kababayan nating nasunugan o may pinagdaraanang krisis. Nagpapasalamat na rin lang tayo at hindi sila nasaktan. Ang mahalaga ay buhay sila habang sinisikap nating mabigyan sila ng suporta upang makabangon muli.

Ang nangyari sa ating mga kababayang nasunugan ang isa sa mga dahilan kung bakit natin isinulong na maisabatas ang Republic Act No. 11589, o ang Bureau of Fire Protection Modernization Act, na nilagdaan ni Pangulong Rodrigo Duterte noong Setyembre 2021. Ang inyong lingkod ang principal author at nag-co-sponsor nito sa Senado.

Nakita kasi natin ang pangangailangan para sa modernisasyon ng BFP. Sa mga nakalipas na panahon ay kulang na kulang ang kanilang mga kagamitan, maging ang kanilang mga tauhan. At upang higit na maging epektibo ang ating mga bumbero sa pagtugon sa mga insidente ng sunog, kailangan nila ng specialized training.

Sa RA 11589, palalawakin din ang pagpapalaganap ng impormasyon sa mga komunidad kung paano mag-iingat ang mga residente para maiwasan ang mga insidente ng sunog.

Sa aming isinasagawang relief activities ay laging ipinaaalala sa ating mga kababayan na patuloy pa ring mag-ingat kahit bumababa na ang mga kaso ng COVID-19.

Bilang Chair ng Senate Committee on Health, patuloy naman tayong nakikiusap sa mga puwede nang magpabakuna na samantalahin nila ang vaccination program ng pamahalaan. Kitang-kita naman natin ang resulta na dahil sa bakuna at pagsunod sa health protocols kaya unti-unti ay nakokontina na natin ang pandemya.

Unti-unti na tayong nagbabalik sa normal at nagbubukas nang muli ang ating ekonomiya.

Kasabay ng magandang balitang ito ay ang ating pakiusap na lagi tayong mag-iingat — sa COVID-19 at sa mga trahedya — para lahat tayo ay makahinga naman nang maluwag-luwag pagkatapos ng ating mga pinagdaanan.

Sama-sama tayong babangon bilang nagkakaisang mga mamamayan.

Ukol naman sa nalalapit na halalan, gamitin natin ang panahon ng kampanya upang suriin ang kakayahan at katapatan ng ating mga kandidato. Ikonsidera natin kung sino ang makapagpapatuloy ng magagandang pagbabagong nasimulan ni Pangulong Rodrigo Duterte at kung sino ang makatutulong talaga sa mga Pilipino.

Patuloy naman ninyo akong maaasahang magmamalasakit at magseserbisyo sa inyo sa abot ng aking makakaya — anuman ang mangyari sa pulitika. Mananatiling prayoridad ko ang kapakanan at interes ng kapwa ko Pilipino. Ako po ang inyong Kuya Bong Go na laging handang maglingkod sa inyo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Super health centers para sa mas mabilis na serbisyong-medikal sa mga kanayunan

ni Bong Go - @Bisyo Magserbisyo | March 9, 2022

Bilang Chair ng Senate Committee on Health, masaya ang inyong lingkod na patuloy sa pagbaba ang mga naitatalang kaso ng COVID-19 at patuloy namang tumataas ang bilang ng mga bakunado na. Nakahihinga na kahit paano ang ating mga doktor, nars at iba pang frontliners dahil kakaunti na ang mga naoospital dahil sa COVID-19.

Sa pagtutok ng pamahalaan sa isinasagawang vaccine rollout ay mas maraming kababayan natin ang nababakunahan, nasusunod ang mga ipinatutupad na health protocols, bumababa ang COVID-19 cases at unti-unti nang nakapagbubukas ang ating ekonomiya.

Gayunman, ipinagpapatuloy pa rin natin ang mga pagsisikap para mapalakas lalo ang ating health care system sa buong bansa. Marami tayong natutunan sa bawat pagsubok na ating hinarap sa mga nakaraang taon kung kaya’t ginagawa ng gobyerno ang lahat upang maging mas handa at matatag ang mga mekanismong meron tayo at maging mas handa pa sa anumang krisis na maaaring dumating.

Kaugnay nito, noong isang linggo ay binuksan na ang ika-150 Malasakit Center na nasa Batanes General Hospital sa Basco, at ang ika-151 na nasa Quirino Provincial Medical Center sa Cabarroguis.

Layunin ng mga Malasakit Centers na mapagkalooban ng tulong-medikal ang mahihirap nating kababayan. Hindi na sila mahihirapang magpalipat-lipat pa ng mga opisina ng pamahalaan dahil nasa Malasakit Center na ang tulong mula sa Department of Social Welfare and Development, Department of Health, Philippine Health Insurance Corporation, at Philippine Charity Sweepstakes Office.

Masaya rin nating ibahagi na mula nang buksan ang pinakaunang Malasakit Center sa bansa, nakapag-abot na ang programa ng tulong sa mahigit tatlong milyong Pilipino. Naisabatas na rin ang Malasakit Centers Act na tayo ang prinsipal na may-akda at nag-sponsor sa Senado.

Nananatiling prayoridad namin ni Pangulong Duterte ang kalusugan at kapakanan ng ating mga kapwa Pilipino, lalo na ang pagbibigay ng mabilis na serbisyong-medikal sa mahihirap at mga sektor na higit na nangangailangan. Sana lang ay maipagpatuloy at masuportahan pa lalo ang mga programang tulad ng Malasakit Centers sa susunod na mga taon dahil napakaraming natutulungan nito, lalo na ang mahihirap at walang ibang matakbuhan.

Kahit nararamdaman na ang resulta ng ating pagsisikap, hindi tayo dapat maging kumpiyansa. Bukod sa ating walang tigil na pag-apela sa ating mga kababayan na hindi pa bakunado na magpabakuna na sila dahil ang bakuna ang tanging solusyon laban sa pandemya, patuloy din ang ating paghahanap ng solusyon sa mga problema kung paano maihahatid ang epektibong pangangalaga ng kalusugan ng ating mga kababayan, lalo na sa malalayong lugar.

Isa sa mga isyung dapat matutukan ang serbisyong-medikal sa mga kanayunan. Maraming lalawigan ang kokonti ang mga ospital, at kulang pa sa mga tauhan at kagamitan. Dahil dito, ipinaglalaban natin ang pagpapatayo at pagpapaayos ng mga pampublikong ospital sa iba’t ibang sulok ng bansa.

Higit pa rito, nais din nating makapagpatayo ng mga Super Health Centers na tutugon sa pangangailangang pangkalusugan sa mga probinsiya. Sa pamamagitan nito, hindi na nila kailangang magpunta pa sa malalaking ospital sa kabayanan o lungsod upang magpagamot.

May pandemya man o wala, mahalaga para sa atin na maisakatuparan ang pagtatayo ng Super Health Centers dahil palagi nating kailangan ang serbisyong-medikal. Batay sa 2022 Health Facilities Enhancement Program, mayroon tayong budget na P3.587 bilyon para sa pagpapatayo ng 305 Super Health Centers. Ang P2.031 nito ay gagamitin sa pagtatayo ng mga imprastruktura, habang ang nalalabing P1.556 bilyon ay para sa pagbili ng kinakailangang kagamitan.

Bawat Super Health Center ay mas moderno at malaki kaysa sa karaniwang rural health unit. Mayroon itong lab facilities, minor operating at emergency rooms, pharmacy, birthing facilities, outpatient department, dental services, comprehensive PhilHealth outpatient department at iba pang minor services.

Sa kabila ng mga problemang hatid ng pandemya sa loob ng dalawang taon, ang mga inisyatiba at programa ng Administrasyong Duterte ay nakapagbigay ng solusyon sa mga problema, at naghatid ng pag-asa ng mas komportableng buhay para sa lahat. Ito ay pruweba ng pagtupad sa pangako ng Pangulo ng tunay at makabuluhang pagbabago sa buhay ng bawat Pilipino.

Ngayong nalalapit na ang pagtatapos ng kanyang termino, umaapela tayo na tiyaking ang pipiliin nilang bagong lider ay maipagpapatuloy ang kanyang magagandang nagawa—para masiguro natin ang mas ligtas at mas komportableng buhay para sa mga minamahal nating kababayan at susunod na henerasyon na magiging parte ng mas matatag na sambayanan!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Lahat tayo babangon basta tuluy-tuloy ang pagtulong

ni Bong Go - @Bisyo Magserbisyo | March 4, 2022

Kapag naghahatid ang ating tanggapan ng tulong sa mga komunidad na apektado ng pandemya at iba pang krisis, may mga nagsasabing, “Salamat po, Sen. Bong Go, at hindi kayo nahinto sa pagtulong sa amin.” Sagot naman nating, “Huwag kayong magpasalamat sa amin. Trabaho namin ang magserbisyo sa inyo…”

At sa abot ng ating makakaya, patuloy tayong magseserbisyo sa inyong lahat.

Noong Pebrero 28, 2022, nagkaloob ang ating tanggapan ng tulong sa 200 na benepisaryo mula sa Parañaque City; at 283 pa mula sa Quezon City.

Unang araw ng Marso ay sa Maynila namahagi ng ayuda ang ating relief team at nabiyayaan ang 166 residente mula sa Ermita; at 166 din mula sa Paco. Dagdag pa rito ang 450 na taga-Caloocan City.

Mas naging abala ang ating tanggapan noong Marso 2 at dinalaw para bigyan ng tulong ang 18 pamilya sa Talisay City, Cebu; 3,000 na benepisaryo mula sa San Isidro, Davao Oriental; 935 na taga-Guagua, Pampanga; 166 sa Blumentritt at 166 sa Pandacan — na parehong lugar sa Maynila.

Kahapon ay nag-abot din tayo ng tulong sa 1,000 kababayan natin sa Quezon City at 510 pa sa Caloocan City.

Bukod dito, tayo’y natutuwa dahil nakaabot na ang Malasakit Center sa pinakadulo ng ating bansa. Nitong Marso 1 ay binuksan na ang ika-150 na Malasakit Center sa Batanes General Hospital sa Basco. Ito ang kauna-unahang center sa probinsiya ng Batanes.

Sinundan ito ng pagbubukas ng ika-151 Malasakit Center sa Quirino Provincial Medical Center, kung saan nagbigay tayo ng tulong sa 70 indigent patients at 512 frontliners.

Kaya anuman ang mangyari sa pulitika, lalo na’t papalapit na ang eleksiyon, sana ay maipagpatuloy at mabigyan ng kaukulang suporta ang mga programang katulad ng Malasakit Centers na nakatutulong sa mahihirap, lalo na ‘yung mga walang matatakbuhan.

Samantala, nitong linggo rin ay binigyang-pugay ng ating mahal na Pangulong Rodrigo Duterte ang kanyang Gabinete na tulad niya ay nagtrabaho nang todo para mabigyan ng mas komportableng buhay ang mga Pilipino sa ilalim ng kanyang termino.

Noong Lunes, Pebrero 28, sinabi ng Pangulo na kung hindi dahil sa tulong ng kanyang Gabinete, baka kakaunti ang kanyang nagawa dahil limitado lang sa anim na taon ang kanyang termino — at sa huling dalawang taon ay may mabigat pang krisis na kinaharap dahil sa pandemya na naging limitado ang pagkilos ng lahat.

Dahil sa magandang performance ng mga ito, masaya umano ang Pangulo na maipasa sa susunod na administrasyon ang matatag na gobyerno na handang ipagpatuloy ang kanyang tungkulin na maipaglaban ang kapakanan ng buong sambayanang Pilipino kahit saan mang parte sila ng mundo.

“We are getting old. As a matter of fact, we are about to make the exit... Ang problema is the next generation. We have to protect the next generation because, if not, then they will have a serious problem in their hands,” ayon sa Pangulo at ito marahil ang pinakaimportante sa kanya — ang maisakatuparan ang ating pangako na mabigyan ng mas ligtas at maginhawang buhay ang ating mga anak.

Alam nating nalulungkot ang Pangulo dahil marami pa sana siyang gustong gawin. Para sa atin, napakaganda ng legacy na maiiwan niya. Ang tanging hinangad niya at ng kanyang administrasyon ay mailagay ang Pilipinas sa mas magandang kalagayan ngayon at sa hinaharap kumpara sa nakalipas.

Alam natin, nagtagumpay siya sa kanyang layunin pero hindi tayo titigil sa pagseserbisyo upang masigurong walang maiiiwan sa muling pagbangon ng ating bansa mula sa mga krisis na ating hinaharap. Magtulungan at magbayanihan tayo para maipagpatuloy pa ang mga magagandang nasimulan ng ating mahal na Pangulong Duterte

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.