Malasakit Center, tuloy ang serbisyo kahit sino ang maging pangulo

ni Bong Go - @Bisyo Magserbisyo | March 25, 2022

Kahit ilang buwan na lang sa puwesto si Pangulong Rodrigo Duterte ay hindi pa rin siya tumitigil sa pagtatrabaho. Nitong Marso 22, 2022 ay sinamahan ko siya sa inagurasyon ng isinagawang rehabilitasyon ng Metro Rail Transit Line 3 sa Shaw Boulevard Station sa Mandaluyong City.

Nilagdaan na rin ng Pangulo noong simula ng linggong ito ang Republic Act No. 11659, ang batas na nag-aamyenda sa Public Service Act, para mas mabuksan ang bansa sa mga nais mamuhunan o magnegosyo rito at makapagbigay ng trabaho at oportunidad sa mas maraming mga Pilipino.

Bilang inyong senador at Chair ng Senate Committee on Health, patuloy ko namang tinututukan ang pagpapalakas ng ating mga serbisyong pangkalusugan.

Nitong Marso 22, tinalakay namin sa Senado ang 27 local hospital bills na naglalayong madagdagan ang kapasidad o palawakin ang kakayahan ng ilang existing public hospitals, o magtayo ng mga bagong ospital sa iba’t ibang parte ng bansa.

Sa deliberasyon ay binigyang-diin ko na mahalagang mag-invest tayo sa mas maayos na public healthcare system para mabilis tayong makatutugon sa kasalukuyang pandemya at mga krisis pangkalusugan sa hinaharap. Natuto na tayo sa hirap na pinagdaanan natin dahil sa COVID-19 kung kaya’t dapat maging mas handa na tayo!

Bagama’t patuloy na bumababa ang mga bagong kaso ng COVID-19, kailangan nating maging handa dahil hindi natin alam kung ilang pandemya pa o bagong variants ng COVID-19 ang darating.

Huwag po nating hintayin na tuluyang bumigay ang healthcare system natin at malagay sa panganib ang buhay ng ating mga kababayan.

Kung matatandaan, nitong Marso 21, 2022 ay personal kong binisita ang Malasakit Center na nasa East Avenue Medical Center sa Quezon City. Nag-turnover ang Office of the President ng P135 milyon para sa upgrading ng kanilang mga kagamitan sa ospital habang kami naman ay nagbigay ng dagdag tulong sa frontliners at pasyente roon.

Nakatanggap din ng nasabing tulong ang National Children’s Hospital, National Kidney and Transplant Institute, Philippine Orthopedic Center, at National Center for Mental Health.

Nitong Marso 23 naman ay nagsagawa ako ng monitoring visit sa Malasakit Center sa Quirino Memorial Medical Center at nag-abot ng tulong sa mga indigent patients at mga frontliners.

Sinaksihan ko rin ang turnover ng P100 milyong pondo sa QMMC bilang tulong pinansyal mula sa opisina ni Pangulong Duterte.

Bukod sa QMMC, naroon din ang mga kinatawan ng Jose R. Reyes Memorial Medical Center, Veterans Memorial Medical Center, Dr. Jose N. Rodriguez Memorial Hospital and Sanitarium, Philippine Heart Center, Philippine Children’s Medical Center, Amang Rodriguez Memorial Medical Center at Dr. Jose Fabella Memorial Hospital. Tumanggap din ang mga ito ng tig-P100 milyong tulong pinansyal mula sa OP para sa kanilang health sector development projects. Nakatanggap naman ang VMMC ng karagdagang P100 milyon na pambili ng kanilang medical equipment.

Marami ang nagtatanong sa akin kung ano ang mangyayari sa Malasakit Center sa ilalim ng susunod na administrasyon. Ito po ay batas na, at magkakaroon ng Malasakit Center sa lahat ng DOH-run hospitals, at maging sa local hospitals basta susunod lang sila sa criteria.

Kung sa tingin ng papasok na administrasyon ay nakakatulong ito sa mga mahihirap, sana ay ipagpatuloy nila, dagdagan at i-improve pa kung kinakailangan. Para naman ito sa mga mahihirap at wala itong pinipiling pasyente.

Sa ngayon, mahigit tatlong milyong pasyente na ang natulungan ng mga Malasakit Centers at tuluy-tuloy ang serbisyo nito lalo na sa mga mahihirap at walang matatakbuhan.

Bukod sa aking trabaho sa Senado, patuloy pa rin ang aking tanggapan sa paghahatid ng tulong sa ating mga kababayang ang kabuhayan ay apektado ng pandemya.

Nitong nakaraang linggo, nag-abot tayo ng tulong sa 75 benepisyaryo sa Tukuran, Zamboanga del Sur; at 5,000 pa mula sa Hindang, Santa Fe, Tacloban City, Inopacan at Baybay City sa Leyte.

Sa Meycauyan City, Bulacan ay nakapamahagi tayo ng tulong sa kabuuang 2,448 na benepisyaryo; 140 sa Tandang Sora, Quezon City; at 1,000 sa Giporlos, Eastern Samar.

Sa Cebu, binisita natin ang mga bayan ng Catmon, Borbon, Lapu-lapu City at Carcar para ayudahan ang 3,942 na benepisyaryo. Nabigyan din ng tulong ang 1,013 pa mula sa Lucban, Quezon.

Nakatanggap din ng tulong ang 1,667 benepisyaryo sa Palayan City, Nueva Ecija; 1,000 sa Pasig City; 800 sa Caloocan City; 999 sa Quezon City. Nag-abot din tayo ng tulong sa ating mga kababayang nasunugan –10 pamilya sa Manila City at 19 pamilya sa Quezon City.

Hindi po tayo titigil sa pagseserbisyo sa inyo hanggang sa aming makakaya. Asahan po ninyo na kapakanan at interes ng mga mamamayang Pilipino ang aking laging pangunahing prayoridad. Magtulungan at magbayanihan po tayo para sa ikabubuti ng ating bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Komportableng buhay para sa lahat ng Pinoy

ni Bong Go - @Bisyo Magserbisyo | March 18, 2022

Ang pag-unlad ng isang bansa ay hindi dapat nakatuon lang sa isang lugar. Dito sa atin, sa loob ng mahabang panahon ay nakasentro ang industriyalisasyon at komersyo sa Metro Manila. Naging mabagal ang pagsulong sa iba pang rehiyon ng Pilipinas.

Nang mahalal ako bilang senador, isa sa aking mga naging adhikain ay ang magkaroon ng pantay-pantay na pagkakataon ang mga rehiyon sa ating bansa para sa pag-unlad.

Kaugnay ito ng layunin ng ating mahal na Pangulong Rodrigo Duterte na sa ilalim ng kanyang administrasyon, walang Pilipinong maiiwan sa pagkakaroon ng komportableng buhay.

Inihain natin ang Senate Bill No. 2157, o ang panukalang lilikha sa Metropolitan Davao Development Authority o MDDA. Isa ako sa may-akda at nag-co-sponsor nito.

Sa pamamagitan ng MDDA, gaganda ang koordinasyon sa pagitan ng mga local government units ng Davao City at mga karatig-lugar. Magreresulta rin ito sa mas maayos na paghahatid ng serbisyo, magkakaroon ng sama-samang pagpaplano, at iba pang aspetong pang-ekonomiya para mas lalo silang umunlad.

Ang maganda pa rito, dahil ang Davao region ang isa sa mga sentro ng kaunlaran sa Pilipinas, ang MDDA ang magsisilbing daan para mas mapalawak pa at maihatid ang pag-unlad sa iba pang rehiyon sa Mindanao — patungo naman sa lahat ng bahagi ng ating bansa.

Bilang Dabawenyo, nagpapasalamat ako sa mga kapwa ko mambabatas na sumuporta sa pag-unlad ng Davao at ng buong Mindanao. Inaasahan po na mapipirmahan na ng Pangulo itong batas na magtatayo ng MDDA sa susunod na mga araw.

Sa kabila naman ng aking mga tungkulin sa Senado ay sinisikap ko ring masuportahan ang mga kapwa kong Dabawenyo partikular na ang kanilang kalusugan para mabigyan sila ng mas magandang kinabukasan.

Nitong Marso 14, personal kong binisita ang Southern Philippines Medical Center sa Davao City kung saan nasaksihan ko ang pagbibigay ng dagdag-pondo para mas marami pang pasyenteng matulungan ng Malasakit Center sa ospital. Nagbigay din ako ng tulong sa 800 pasyente at mahigit 5,900 na frontliners ng ospital kabilang na ang utility workers at security guards.

Marso 15, dinaluhan ko rin ang blessing ng kabubukas lang na Davao Occidental General Hospital sa Malita, Davao Occidental. Isa ito sa mga ospital na aking ipinaglaban sa Senado at napirmahan ni Pangulong Duterte para maisabatas noong June 2021.

Naglaan din tayo ng dagdag na budget pambili ng medical equipment na kakailanganin sa naturang ospital. Sa araw ding iyon ay nagbigay ako ng tulong sa 1,000 benepisyaryo na kinabibilangan ng mga magsasaka, mangingisda, PWDs at senior citizens sa Malita.

Marso 16, naimbitahan naman ako ng lokal na pamahalaan ng Lupon sa Davao Oriental sa isang ribbon cutting ceremony para sa pagbubukas ng Matavisan-Lisacu Provincial Road sa Bgy. Macangao. Sa araw ding iyon ay nakapagbigay din ako ng tulong sa 4,600 na mangingisda, magsasaka, vendors, at tricycle drivers sa mga bayan ng Lupon at San Isidro sa nasabing lalawigan.

Patuloy pa rin ang aking tanggapan sa paghahatid ng tulong sa ating mga kababayan na ang kabuhayan ay apektado ng pandemya at iba pang krisis sa iba’t ibang panig ng bansa.

Nitong Marso 11, nagkaloob tayo ng ayuda sa 1,000 benepisyaryo mula sa San Juan City, at 1,000 rin mula sa Candaba, Pampanga.

Marso 12, naabutan ng tulong ang 1,000 benepisyaryo mula sa Caloocan City, at 642 mula sa Butuan City.

Marso 14, nagsagawa tayo ng relief effort para sa 1,000 benepisyaryo sa Bongabon, Nueva Ecija; 1,000 sa Capoocan, Leyte; at 1,000 sa Kananga, Leyte.

Marso 15, nahatiran din ng tulong ang 154 pamilyang nasunugan sa Bgy. Addition Hills, Mandaluyong City; at naayudahan ang 1,000 benepisyaryo mula sa General Natividad, Nueva Ecija; 1,000 sa Calubian, Leyte; 1,000 sa San Isidro, Leyte, at 1,663 sa Rizal, Zamboanga Del Norte.

Marso 16, hinandugan natin ng tulong ang 1,664 benepisyaryo sa Piñan, Zamboanga del Norte; 1,000 sa Baybay City, Leyte; 1,000 sa Mahaplag, Leyte; 832 sa Quezon, Nueva Ecija; 93 na biktima ng sunog sa Iloilo City; 857 sa Poro, at 1,264 San Francisco sa Camotes Island, Cebu.

Kahapon naman Marso 17, binisita namin ni Pangulong Duterte ang Leyte para sa inagurasyon ng Tacloban City Bypass Road at ng New Leyte Provincial Capitol. Nagkaroon din ng distribusyon ng Certificate of Land Ownership Award (CLOA) para sa mga taga-Eastern Visayas.

Personal din akong naimbitahan para saksihan ang ceremonial turn-over ng pondo mula sa national government para sa lalong pagpapalakas ng mga public hospitals sa Eastern Visayas region. Sa araw ding iyon ay nakapagbigay din ako ng tulong para sa 485 rebel returnees sa Palo, Leyte.

Patuloy lang po ang ating paglilingkod sa ating mga kababayan kahit saang sulok ng bansa upang maisakatuparan ang ating layunin na mabigyan ng mas magandang kinabukasan ang ating mga anak.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tulong medikal at pangangalaga sa kalusugan ng mahihirap, prayoridad para sa pag-unlad

ni Bong Go - @Bisyo Magserbisyo | March 16, 2022

Patapos na ang termino ng ating mahal na Pangulong Rodrigo Duterte. Makahulugan para sa ating mga Pilipino ang kanyang panunungkulan, at isang karangalan para sa akin na makapaglingkod sa inyo katuwang niya.

Makalipas ang anim na taon, nakikita na natin ang mga positibong pagbabago na naihatid ng Pangulo sa buhay ng ating mga kababayan sa kabila ng mga pagsubok na sama-sama nating hinarap. Sana ang susunod na administrasyon — sinuman ang mahalal — ay maipagpatuloy ang kanyang mga nagawa at tiyakin na ang pagsisikap ng administrasyong Duterte na makapaghatid ng komportableng buhay para sa lahat ay hindi masasayang.

Sinisikap din po ng Pangulo at ng administrasyong ito na magiging mapayapa ang halalan sa Mayo. Inatasan na niya ang militar, pulis, at iba pang kawani ng gobyerno na gampanan ang kanilang tungkulin upang maproteksyunan ang integridad at kredibilidad ng eleksyon — malinis, walang magiging takutan, at patas na laban. Ang importante dito, respetuhin natin ang will of the people.

Nakakatuwa rin naman na patuloy na lumuluwag ang mga restriksyon, at nagbubukas na ang maraming negosyo dahil sa pagbaba ng bilang ng nagkakasakit at parami nang parami ang bakunado na.

Sa nakalipas na dalawang taon ay marami tayong natutunan. Kung mapapanatili natin ang disiplina, kooperasyon at malasakit sa isa’t isa, walang dudang mabilis tayong makababangon mula sa pandemya.

Nakikita na natin ngayon ang tinatawag na “light at the end of the tunnel”. Maraming salamat po sa ating mga frontliners, medical professionals, sa pamahalaan at sa pakikiisa ng ating mga mamamayan. Masisimulan na nating maibangon ang ating mga sarili mula sa epekto ng pandemya basta lang magkaisa tayo sa iisang hangarin para sa kabutihan ng bansa.

Bilang Chair ng Senate Committee on Health, gusto kong purihin ang Coordinated Operations to Defeat Epidemic (CODE) Team, sa pangunguna ng National Task Force (NTF) Against COVID-19, sa pagsasagawa ng pambansang dayalogo kasama ang iba pang kaagapay sa laban kontra-COVID-19. Sa pamamagitan ng mga inisyatibo nila, ipinapalaganap natin ang impormasyon tungkol sa importansya ng bakuna at pangangalaga sa kalusugan lalo na sa mga kanayunan at malalayong lugar.

Sa kasalukuyan, nasa mahigit 139 milyong doses na ang naibakuna sa buong bansa. Nasa 63.2 milyong Pilipino ang nakatanggap na ng kanilang first dose, 64.7 milyon ang fully vaccinated at 11.2 milyon ang nakatanggap na ng booster shots.

Samantala, nitong March 11 ay inilunsad na ang University of the Philippines-Philippine Genome Center (UP-PGC) Visayas sa Iloilo City, at ang UP-PGC Mindanao sa Davao City.

Importante ito dahil gusto nating maging handa sa anumang krisis pangkalusugan na maaaring dumating pa. Kailangang mabigyan ng halaga ang mga inisyatibo ng ating mga Filipino scientists at medical experts at dapat patuloy tayong mag-invest sa health research.

Nitong Marso 14 naman ay personal ko ring binisita at inobserbahan ang operasyon ng Malasakit Center na nasa Southern Philippines Medical Center sa Davao City. Isa ito sa 151 na Malasakit Centers na naitayo na sa buong bansa. Sinaksihan ko rin ang ceremonial turnover ng P450 milyon mula sa Office of the President para mapaganda ang serbisyo at kagamitan ng SPMC.

Sinamahan ako ni Sen. Joel Villanueva na kapwa ko senador at naging co-author din ng Malasakit Centers Act of 2019 na aking pangunahing iniakda at in-sponsor sa Senado. Nakakatuwa na higit tatlong milyong Pilipino na ang nakabenepisyo sa Malasakit Center, sana ay masuportahan pa lalo ang programang ito sa susunod na mga taon lalo na’t maraming mahihirap ang nangangailangan ng tulong at walang ibang matakbuhan kundi ang gobyerno.

Kahit unti-unti nating nakokontina ang pandemya, dapat tayong mag-invest sa healthcare, at gawing prayoridad ang pagkakaloob ng tulong medikal sa mahihirap. Sa lahat ng nangyari sa nakaraang mga taon, lalo nating sisikaping maproteksyunan ang buhay ng bawat Pilipino.

Bilang inyong senador at Chair ng Senate Committee on Health, patuloy nating ipaglalaban na mabigyan ng sapat na tulong ang mga nagkakasakit at mapangalagaan nang husto ang kalusugan ng buong sambayanang Pilipino.

Magtulungan at magbayanihan po tayo para sa kapakanan ng ating mga kababayan. Ang isang ligtas at maginhawang buhay ang pinakaimportanteng maipamamana natin sa ating mga anak at sa susunod na henerasyon.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.