Serbisyo sa kapwa, serbisyo sa Diyos

ni Bong Go - @Bisyo Magserbisyo | April 8, 2022

Nakakabilib talaga si Pangulong Rodrigo Duterte. Hindi nagbabago ang serbisyo at malasakit niya sa kanyang mga kapwa Pilipino kahit iilang buwan na lang ang natitira sa kanyang termino. Patuloy pa rin siya sa masigasig na pagtupad sa kanyang tungkulin at pangakong pagbibigay ng komportableng buhay sa ating mga kababayan.

At gaya ng dati, gusto niyang nakakasalamuha ang mga tao at naririnig ang kanilang mga hinaing upang agad niyang masolusyunan.

Ngayong linggong ito ay sinamahan ko ang Pangulo sa Mataas Na Kahoy, Batangas at nag-inspection kami sa itinayong Multipurpose Evacuation Center na pansamantalang tinutuluyan ng mga residenteng naapektuhan ng pagsabog ng Taal Volcano. Binisita rin namin ang mga evacuees sa Agoncillo Central School, at pinagkalooban ang mga ito ng tulong.

Magkasama rin naming sinaksihan ang pagbubukas ng Binondo-Intramuros Bridge na isa sa mga ‘Build Build Build’ projects ng Duterte administration. Nasa 30,000 motorista kada araw ang puwedeng dumaan dito, at magpapagaan ng daloy ng trapiko sa Metro Manila.

Kasama rin sa mga naging aktibidad namin ng Pangulo ang pagpapasinaya para sa groundbreaking ng OFW Center sa Las Piñas City. Ang nasabing center ay katibayan na ang mga overseas Filipino workers ay isa sa mga sektor na laging prayoridad ng kanyang administrasyon.

Sa parte ko, patuloy ang aking tanggapan sa pagkakaloob ng tulong sa ating mga kababayan na patuloy na pinapasan ang bigat na hatid ng pandemya, pagtaas ng presyo ng mga bilihin na epekto ng Ukraine-Russia war, at iba pang krisis o sakuna. Ngayong linggong ito ay ilang komunidad ang ating pinuntahan at nagbigay ng suporta sa mga residenteng nangangailangan.

Nagsagawa tayo ng serye ng pamamahagi ng tulong noong Marso 31 sa mga bayan ng San Antonio, San Narciso, San Felipe, Cabangan, Botolan, Iba, Palauig, Masinloc, Candelaria at Sta. Cruz sa Zambales kung saan 977 benepisyaryo ang natulungan. Umagapay din tayo sa 55 pamilyang nasunugan sa Caloocan City.

Noong Abril 1 ay biyaheng Island Garden City of Samal, Davao Del Norte naman tayo at inayudahan ang 1,500 benepisyaryo mula sa mga barangay ng Tagpopongan, Libuak at Cogon. Kasabay na natulungan ang 1,000 benepisyaryo mula sa Antipolo City; 660 sa Iba, Zambales; at 1,000 sa Rodriguez, Rizal.

Hindi rin natin pinabayaan ang 74 benepisyaryo mula sa Bagumbayan, Taguig City na biktima ng sunog; 800 sa Pasig City; 989 sa Caloocan City; 852 sa Santa Rosa, Nueva Ecija; at 1,000 sa Toboso, Negros Occidental na inikutan ng aking opisina noong Abril 5.

Agad tayong sumaklolo at nagbigay ng tulong sa mga naging biktima ng sunog gaya ng 110 pamilya sa Muntinlupa City; 646 katao sa Bgy. Sambag ll at 247 pa sa Bgy. San Antonio, Cebu City noong Abril 6. Nagbalik din tayo sa Island Garden City of Samal, Davao Del Norte para hatiran ng ayuda ang 1,500 benepisyaryo mula sa Bgy. Tambo, Bgy. Miranda at Bgy. Villarica.

Nakatanggap din ng ayuda ang 500 benepisyaryo sa Navotas City; 1,000 sa Cadiz City at 1,000 din sa Manapla, Negros, Occidental; gayundin ang 2,322 mula sa Clarin at 616 sa Tubigon na mga bayan sa Bohol.

Kahapon naman, Abril 7, ay naimbitahan ako sa Cardinal Santos Medical Center upang saksihan ang pagbubukas ng kanilang Center for Thoracic and Critical Care Medicine kung saan nakapag-abot din ako ng tulong sa iilang mga manggagawa. Bukod pa r’yan, nagpadala rin ako ng tulong sa 1,000 nating kababayan sa Quezon City; 1,672 sa Caloocan City; 500 sa Rodriguez, Rizal; 3,000 sa Talisay City, Silay City at EB Magalona sa Negros Occidental; 1,946 sa iba’t ibang bayan ng Bohol; at 1,500 pa sa Island Garden City of Samal sa Davao del Norte.

Bilang inyong senador at Chair ng Senate Committee on Health, patuloy naman ang aking pakiusap sa lahat na kuwalipikado na sa COVID-19 vaccine na magpabakuna na. Napatunayan po na ligtas ang mga bakuna, at ito ang tanging susi at solusyon para makabalik tayo sa ating normal na pamumuhay. Patuloy din tayong magbayanihan, maging disiplinado at sumunod sa health protocols para makabangon muli.

Ako naman po ay iisa lang ang panata tuwing sasapit ang panahon ng Kuwaresma — ang patuloy na magsakripisyo at magserbisyo sa mga kapwa ko Pilipino. Naniniwala po ako na ang serbisyo sa tao ay serbisyo sa Diyos. Minsan lang tayo dadaan sa mundong ito, kaya kung ano pong kabutihan, tulong at malasakit ang puwede nating gawin sa ating kapwa ay gawin na natin ngayon dahil hindi na tayo muling dadaan sa mundong ito.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Makiisa at magbayanihan tungo sa pagbalik sa normal na pamumuhay

ni Bong Go - @Bisyo Magserbisyo | April 1, 2022

Bilang Chair ng Senate Committee on Health, sa aking paglilibot sa buong bansa para maghatid ng tulong sa ating mga kababayang labis na apektado ng pandemya at iba pang krisis, madalas itanong sa akin kung batayan ba ang pagbaba ng alert level para masabing ligtas na tayo sa COVID-19.

Para sa akin, habang nariyan pa ang COVID-19 ay delikado pa tayo at huwag maging kumpiyansa. Kaya patuloy ang aking pag-apela sa ating mga kababayan na kailangan natin ang disiplina at patuloy na pagsunod sa mga health protocols habang tuluy-tuloy ang pagbabakuna. Importante ang buhay at kalusugan ng bawat Pilipino, kaya huwag nating hayaang tumaas na naman ang mga kaso tulad sa ibang bansa.

Sa ngayon ay 65 milyong Pilipino na ang fully vaccinated. Mahigit 72% na ito ng targeted population na dapat mabakunahan.

Nasa 243 million doses na ng bakuna ang dumating sa ating bansa. Huwag n’yo na pong sayangin ang pagkakataon. Hinihikayat ko ang mga kababayan natin sa malalayong lugar, gaya sa Mindanao na hindi pa nakakamtan ang targeted population na dapat mabakunahan, na sana ay makiisa kayo sa vaccine rollout ng ating pamahalaan. Patunayan natin na kung gusto nating bumalik sa normal na pamumuhay, magpabakuna na kayo dahil bakuna lang ang tanging susi o solusyon sa ngayon para makawala na tayo sa pandemya.

Patuloy pa rin ang aking serbisyo sa ating mga kababayan lalo na ngayong mas maraming komunidad na ang aming mapupuntahan.

Nagsagawa tayo ng serye ng relief efforts sa iba’t ibang barangay sa Island Garden of Samal sa Davao del Norte kung saan 3,000 katao ang nakatanggap ng ayuda, at personal kong nakasama. Nakarating din ang aking mga staff sa Siquijor para ayudahan ang 964 benepisyaryo, 977 benepisyaryo mula sa iba’t ibang bayan ng Zambales at 55 pamilya sa Caloocan City.

Ang mga kababayan naman nating nasunugan sa Bgy. Hagonoy at Bgy. Maharlika sa Taguig City ay aking personal na pinuntahan upang makapag-abot ng tulong sa 146 pamilya. Parehas na tulong din ang natanggap ng 353 pamilyang nabiktima ng sunog sa Arkong Bato, Valenzuela City.

Kabilang sa mga naaabutan ko ng tulong ay mga estudyante. Lagi kong ipinaaalala sa kanila na mag-aral na mabuti dahil sila ang kinabukasan ng bayang ito. Umaasa akong makapagtatapos sila ng pag-aaral dahil ang mga magulang nila ay nagpapakamatay na magtrabaho para sa kanilang edukasyon. Dapat na mag-aral silang mabuti para makapagtapos at mapasaya ang kanilang mga magulang.

Unti-unti na rin silang babalik sa face-to-face learning. Sa ngayon, kalusugan at buhay ng mga estudyante ang aking prayoridad at importante na tuluy-tuloy ang kanilang pag-aaral na hindi nailalagay sa panganib ang kanilang buhay.

Samantala, patuloy kong isusulong ang mga isinumite kong Senate Bill No. 2393, o ang Rental Subsidy Bill; at ang Senate Bill No. 1228, o ang Mandatory Evacuation Center Bill sa Senado.

Kadalasan po kasi, kapag may mga sunog at iba pang kalamidad ay ginagawang evacuation center at pansamantalang tirahan ang mga classroom. Kung may pasok ang mga estudyante, ang hirap naman ng ganoong sitwasyon na mag-aagawan sila sa puwesto.

Sa SBN 2393, tutulungan natin na makakuha ng maayos na tirahan ang ating mga kababayang ang bahay ay nawasak dahil sa natural and man-made disasters.

Sa SBN 1228 naman ay bibigyan ang mga biktima ng kalamidad ng pansamantalang masisilungan na ligtas at kumpleto sa essential goods, medisina, at personahe para matiyak na komportable sila at mapangangalagaan ang kanilang kapakanan para mas mabilis na makabangon muli mula sa trahedya.

Karamihan din sa aking mga nabibigyan ng tulong ay ang mga nasunugan. Sila po ang dahilan kaya isinulong ko ang Senate Bill No. 1832 para sa modernisasyon ng Bureau of Fire Protection. Dito ibinatay ang Republic Act 11589 na nilagdaan ni Pangulong Rodrigo Duterte para maging ganap na batas. Sa modernisasyon ng BFP, magiging mas moderno ang kagamitan ng ating mga bumbero, mas mabilis ang pagtugon sa sunog, at mapapalawak ang impormasyon kung paano maiiwasan ito.

Patuloy ko ring isusulong ang Senate Bill No. 205 na lilikha sa Department of Disaster Resilience para may isang departamento na tututok sa ating mga kababayang maaapektuhan ng bagyo, sunog, lindol at pagputok ng bulkan. Bago pa man maganap ang mga ito, may koordinasyon na ang DDR sa LGUs at nakahanda na ang mga pangunahing pangangailangan ng mga residente. Hindi na nila kailangang maghintay pa ng ilang araw o linggo bago dumating ang tulong mula sa iba't ibang ahensya ng gobyerno.

Hindi po ako mapapagod sa pagseserbisyo sa inyo, mga kapwa ko Pilipino. Tutulong ako sa abot ng aking makakaya at pupuntahan ko kayo kahit saang sulok ng bansa basta kaya ng aking panahon at katawan para mabigyan ng solusyon ang inyong mga problema, mapakinggan ang inyong mga hinaing, at mag-iwan ng ngiti sa oras ng inyong pagdadalamhati.

Ipinagdarasal ko na tuluyan na tayong makabalik sa normal na pamumuhay pagkatapos ng mga pagsubok na hinarap natin dulot ng pandemya. Pero kailangan po ay patuloy ang ating pakikiisa at pakikipagbayanihan para masigurong walang maiiwan sa ating muling pagbangon mula sa krisis.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagbati at pagkilala sa mga ambag ni Tatay Digong bilang pangulo

ni Bong Go - @Bisyo Magserbisyo | March 30, 2022

Nagdiwang ng kanyang ika-77 kaarawan ang ating mahal na Pangulong Rodrigo Duterte noong Marso 28, 2022. Siya ang aking idolo at gabay sa serbisyo-publiko. Maraming salamat sa lahat na ginawa mo para sa bayan, Mayor! Sana ay mabigyan ka pa ng mahabang buhay, maayos na kalusugan, at mas maraming oportunidad para makapagserbisyo sa kapwa.

Mahal na mahal ka ng taumbayan at hangad ko na mas maraming kaarawan pa ang darating sa buhay mo upang patuloy kang makapagsilbi sa ating kapwa Pilipino at sa bansa.

Sa loob ng ilang dekada ng kanyang paninilbihan sa sambayanang Pilipino, napakaraming buhay ang kanyang naproteksyunan at nabigyan ng mas magandang kinabukasan. Tinitingala si Tatay Digong dahil sa kanyang angking husay, tapang, at dedikasyon sa pagseserbisyo. Sa kanya ko natutunan kung paano maglingkod nang walang inaasahang kapalit, at palaging gawin ang tama para sa kapwa.

Isa sa naging pangunahing kontribusyon ni Pangulong Duterte ay ang pagkakaroon ng kapayapaan at kaginhawahan sa buhay ng mga taga-Mindanao. Kaya noong inanyayahan akong magsalita sa 2nd General Members Meeting ng Philippine Chamber of Commerce and Industry (PCCI)-Mindanao noong Marso 26, binigyan natin ng karampatang pansin ang pagsisikap ng Administrasyong Duterte na makamit ang patuloy at malawakang pag-unlad sa Mindanao, at sa lahat ng dako ng Pilipinas.

Sa mga nakalipas na taon, nakaranas ang Mindanao ng mga positibo at makahulugang pag-unlad lalo na sa imprastruktura. Maraming negosyante ang namuhunan dito. Nagkaroon ng kapayapaan, at ang mga residente ay nakaramdam na ng seguridad. Talagang isinugal ng Pangulo ang lahat para sa kinabukasan ng ating mga anak.

Tinupad ni Pangulong Duterte, magkasama kami, ang kanyang pangako at nagresulta ito sa magandang business climate, kahit pa nagka-pandemya. Buti na lang at mayroon tayong isang lider na decisive at may political will.

Bilang senador, patuloy ko namang isinusulong ang mga panukalang batas para bumilis ang pagbangon ng Mindanao mula sa pandemya at makalikha ng mga oportunidad para sa ating mga lokal na negosyante.

Inakda at isinulong ko po sa Senado ang pagtatatag ng Metropolitan Davao Development Authority. Kapapasa lang po nito. Pagagandahin nito ang koordinasyon ng mga local government units para sama-sama silang umunlad. Dahil ang Davao region ang isa sa nangungunang rehiyon sa Mindanao, ang MDDA ang magsisilbing gateway para makarating ang kaunlaran sa iba pang rehiyon sa Mindanao. Nakatakda na po itong lagdaan ng ating Pangulo para maging ganap na batas.

Bilang Chair ng Senate Committee on Health, pinangunahan ko ang pagpasa ng Republic Act 11463 o ang Malasakit Centers Act na nagtatatag ng Malasakit Centers sa lahat ng DOH-run hospitals at sa PGH para matulungan ang mga Pilipino sa kanilang mga bayarin sa ospital. Sa ngayon, sa kabuuang 151 ay may 37 Malasakit Centers na sa iba’t ibang ospital sa Mindanao. Hanggang Basilan at Jolo, para hindi na mahirapan ang ating mga kababayan—lalo na ang mga mahihirap at walang malapitan.

Patuloy din ang aking paghahanap ng solusyon para mapalakas ang ating healthcare system. Naisulong ko ang pagsasabatas ng 24 local hospital laws para ma-upgrade at makapagpatayo ng mga pampublikong ospital sa buong bansa — kabilang ang mga nasa Mindanao.

At para makamit natin ang pangmatagalang pag-unlad sa Mindanao, kailangang maipagpatuloy ang mga programa ng Administrasyong Duterte, lalo na ang Build, Build, Build program.

Ilan sa big-ticket projects ng BBB program ang “Bridge of Peace and Unity” na magpapabilis ng biyahe mula Tubod, Lanao del Norte patungong Tangub City, Misamis Occidental—na mula dalawang oras ay magiging pitong minuto na lang.

Naririyan din ang Mindanao Railway System na magkokonekta sa malalaking lungsod sa Mindanao at magdadala ng kaginhawahan sa buhay ng nasasakupan doon.

May Balik Probinsya, Bagong Pag-asa program din po tayo na inilunsad para makauwi na sa kanilang lugar ang mga taga-probinsya na ayaw nang manirahan sa Metro Manila. Kaakibat nito ang suportang pangkabuhayan at pagpapalago ng oportunidad sa kanayunan upang tunay na mabigyan ng pag-asa ang mga Pilipino ng mas maginhawang buhay sa probinsya.

Para sa kapayapaan sa buong Mindanao, pinalawig ng ating Pangulo ang termino ng Bangsamoro Transition Authority hanggang 2025 para mabigyan sila ng pagkakataong maisaayos ang kanilang mga programa at bilang pagkilala na rin sa kanilang mga karapatan at pagkakakilanlan. Patuloy ding sinusugpo ng administrasyon ang terorismo at karahasan upang mabura na ang ilang dekadang kawalan ng katarungan sa mga komunidad doon.

Sa magagandang kaganapang ito, umaapela ako sa mga bagong PCCI Mindanao regional governors na makipagtulungan sa gobyerno para mas palawakin pa ang oportunidad na pangkabuhayan sa kanilang lugar at suportahan ang mga proyektong labis na pakikinabangan ng mahigit 26 milyong Mindanaoan. Ipagpatuloy din sana natin ang suporta sa COVID-19 response ng pamahalaan lalo na sa isinasagawang national vaccination campaign.

At bilang taga-Mindanao rin, hindi ko lilimitahan ang aking sarili bilang mambabatas na nakaupo lang. Ipinangako ko na tutulungan ko ‘yung mga kababayan natin sa abot ng aking makakaya, pupuntahan ko sila kahit saang sulok ng bansa basta kaya ng aking katawan at panahon para makapagbigay ng solusyon, at makapag-iwan ng kaunting ngiti sa oras ng kanilang pagdadalamhati.

Magtulungan po tayo para masigurong walang maiiwan sa ating pag-ahon mula sa pandemyang ito at sa iba pang krisis na ating kinakaharap.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.