Daghang salamat, Tatay Digong!

ni Bong Go - @Bisyo Magserbisyo | June 29, 2022

Hanggang ngayon ay naluluha pa rin tayo kapag naaalala ang mga naganap na eksena sa “Salamat, PRRD” thanksgiving concert sa Quirino Grandstand noong gabi ng Hunyo 26, 2022. Nagtipun-tipon muli ang mga supporters ni Pangulong Rodrigo Duterte para pasalamatan siya sa napakalaking pagbabagong nagawa niya para sa ating bansa sa nakalipas na anim na taon.

Sino ba naman ang hindi magiging emosyunal na sa kabila ng ulan ay sumugod pa rin at hindi nagpatinag ang mga dumalo para samahan ang ating Pangulo? Sa Quirino Grandstand din ginanap ang kanyang miting de-avance noong 2016 elections — kaya sa pagbabalik-tanaw natin sa mga kaganapan sa nakalipas na panahon ay talagang nakakataba ng puso ang suporta ng taumbayan sa ating minamahal na Tatay Digong.

Nagpapasalamat tayo sa mga nag-organisa at nagsidalo, lalo na ang mga kasamahan nating hindi bumitaw mula noon hanggang sa huli.

Nakakatuwa ring makita ang mga kababayan nating pumunta sa event para makita ang Pangulo at mailahad ang kanilang mga karanasan sa nakaraang anim na taon. Kayo ang testamento ng magagandang pagbabago na inihandog ng Duterte administration.

Isa sa kanila ang 18-anyos na si Agatha Tolentino, na nagpakilalang “solid Duterte supporter” sa panayam ng Philippine News Agency. Ayon kay Agatha, “Gusto kong masaksihan bago siya bumaba sa pwesto kasi ever since naging Presidente siya, di ko pa siya nakikita in person. Masyado akong na-amaze sa ginawa niya, for example, ‘yung ‘Build, Build, Build’ program, malaking tulong sa bansa natin.”

Naroon din ang 63-anyos na si William Arevalo, na taga-Caloocan City na bilib naman sa tapang ng ating Pangulo. Aniya, naging tahimik at ligtas ang ating bansa. “Ang droga, kriminal, sinugpo niya. Nabawasan ang mga adik.”

Hindi naman nagdalawang-isip ang taga-Pampanga na si Rachel Quesada sa pagdalo sa event kahit bumiyahe pa siya ng malayo. “Since this will be the last time na makikita ko si PRRD during an event, kahit galing kaming Pampanga, nag-travel kami.”

Bilib siya sa Pangulo dahil para aniya itong istriktong tatay pero may malalim na malasakit sa kanyang mga anak. “Maramdaman mo ‘yung concern niya, ‘yung care niya para sa mga Pilipino. Ang dami niyang nagawa. Ngayon ako na-in love sa Pilipinas.”

Bago naman ang nasabing pagtitipon ay tuloy pa rin ang ating Pangulo sa kanyang pagtatrabaho para mabigyan ng komportableng buhay ang bawat Pilipino.

Noong Hunyo 23 ay pinangunahan niya ang ceremonial awarding ng 640 housing units para sa mga benepisyaryong mula sa uniformed service units, government agencies at mga overseas Filipino workers sa Talomo District, Davao City. Pinangunahan din niya noong Hunyo 25 ang muling pagbubukas ng Philippine National Railways San Pablo-Lucena Inter-Provincial Commuter Service, na noong Oktubre 2013 pa nakahinto ang operasyon dahil sa bumagsak na pundasyon.

Dahil matagal natin siyang nakasama, alam nating kahit wala na siya sa puwesto ay magpapatuloy pa rin ang kanyang malasakit sa mga Pilipino. Nasa puso niya palagi ang paninilbihan sa kapwa niya tao.

Maaasahan ang kanyang presensya, lalo na sa panahon ng krisis at kalamidad. Ito ang isa sa mga natutunan natin sa kanya — ang importansya ng pagiging palaging handang tumulong, lalo na sa panahon ng pagdadalamhati, sa mga taong pinakanangangailangan.

Gusto niyang personal na nakikita ang kalagayan ng ating mga kababayan — hindi lang para pagaanin ang kanilang dalahin — kundi para ipakitang ang kanilang pinuno at ang buong pamahalaan ay palaging nariyan, na parang amang nag-aaruga sa kanyang mga anak.

Marami tayong natutunan kay PRRD at siya ang humubog sa inyong lingkod kung paano maging masipag at tapat na lingkod bayan. Kaya kahit senador na ang inyong lingkod at kung anuman ang itatakda ng tadhana, patuloy nating susuportahan si Pangulong Duterte.

Walang sapat na salita kung paano natin siya mapapasalamatan. Ngunit ang higit na magpapasaya sa kanya ay kung isasapuso natin ang ating mga natutunan at maipagpapatuloy natin ang kanyang pangarap para sa bawat Pilipino.

Maikli at makahulugan din ang kanyang naging mensahe sa ginanap na event: “Sa sambayanang Pilipino, maraming-maraming salamat sa inyo.”

Maikli man ang anim na taon para sa isang lider na malaki ang naiambag sa ating lipunan, ngunit panatag ang ating loob na ginawa niya ang lahat para sa ikabubuti ng sambayanang Pilipino. Sana lang ay maramdaman at maalala rin ng susunod na henerasyon ang mga naiwang legacy ng nag-iisang Rodrigo Roa Duterte!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Balik Probinsya, Bagong Pag-asa program

ni Bong Go - @Bisyo Magserbisyo | June 24, 2022

Isa sa magandang programang naisagawa ng Administrasyong Duterte ay ang Balik Probinsya, Bagong Pag-asa (BP2) program. Isinulong ko ito, sa pamamagitan ng Senate Resolution No. 380, noong kasagsagan ng pandemya kung kailan marami sa ating mga kababayan sa Metro Manila ang nawalan ng trabaho, nahirapang magbayad ng upa sa tinitirahan at kinapos sa pagkain.

Naawa ako nang todo sa kanila, kaya naisip natin na kung babalik sila sa kanilang probinsya ay baka mas magaan ang kanilang magiging buhay roon dahil mas presko ang kapaligiran, mayroon silang sariling bahay at lupa, o mga kamag-anak na matutuluyan. Hindi lang kaligtasan at kaginhawahan ang nais nating makamtan nila, kundi ‘bagong pag-asa’ sa kabila ng hirap na napagdaaanan natin dulot ng pandemya.

Pinalawak pa ito ni Pangulong Rodrigo Duterte sa pamamagitan ng Executive Order No. 114 na nilagdaan niya noong Mayo 2020. Sa pagpapalawak sa Balik Probinsya, ang programa ay naging isa sa magiging pundasyon para sa balanseng pag-unlad sa mga rehiyon sa ating bansa.

Mayroon ding inter-agency council na mangangasiwa at magpapatupad nito at whole-of-government na ang approach ngayon. Kabilang sa BP2 ang pagkakaloob ng sapat na serbisyo para sa mga pangangailangan ng mga tao, paglikha ng mga trabaho, pagpapalakas sa mga lokal na industriya, kasiguruhan sa pagkain at pagtatayo ng mga imprastraktura sa mga kabayanan.

Isa sa mga layunin ng Balik Probinsya program ang tiyakin na handa at kaaya-aya ang mga probinsya para sa mga bagong negosyong ipapatayo ng mga mamumuhunan.

Isa rin sa layunin ng BP2 Program ang pagkakaroon ng sapat na pamamahagi ng pondo, resources at mga oportunidad sa pamamagitan ng mga patakaran at proyekto na nagpalakas sa pag-unlad ng mga probinsya. Hindi na dapat mapag-iiwanan maging ang malalayong komunidad sa kalinga at serbisyong ipinagkakaloob ng ating national government.

Malaking dahilan kung bakit napakaraming taga-probinsya ang lumuluwas sa Metro Manila ay para makahanap sila ng maayos at disenteng trabaho o mapagkakakitaan. Ngunit marami sa kanila ang nadala na o “natagam” sa Bisaya dahil paghihirap ang nadatnan nila sa Metro Manila imbes na mabuting buhay lalo na sa panahon ng krisis.

Kung masisiguro natin na tuluy-tuloy ang paglikha ng kabuhayan para sa mga kababayan sa mga probinsya, hindi na nila kailangang magbakasakali pa sa Metro Manila.

Kaya kung isa kayo sa nais bumalik sa inyong probinsya at kuwalipikado kayo sa BP2 program, samantalahin ninyo ito. Hindi lang kayo makatutulong sa pag-unlad ng inyong uuwiang probinsya, nakatulong din kayo sa pagluwag ng Metro Manila na masyado nang siksikan ang mga tao.

Nagpapasalamat din ako sa suporta at kontribusyon ng pribadong sektor sa BP2 program. Sana ay mas marami pa ang mamuhunan para mas mapabilis ang ating regional development. Kailangan nating magtulungan at magbayanihan para sa ikatatagumpay ng programa.

Hinihikayat ko ang bagong administrasyon na ipagpatuloy at pagandahin pa ang pagpapatupad ng BP2 program na layuning mabigyan ng bagong pag-asa ang ating mga kababayan sakaling piliin nilang bumalik sa probinsya. Iisa naman tayo ng adhikain — ang masigurong mararamdaman ng bawat Pilipino ang serbisyo at komportableng buhay kahit saan mang sulok ng ating bansa.

Samantala, hindi tumitigil ang inyong Kuya Bong Go at tuloy ang 24/7 na serbisyo, lalo na sa mga sektor at komunidad na ang kabuhayan ay apektado ng pandemya at iba pang krisis. Layunin nating maiparamdam sa bawat sulok ng bansa ang malasakit at serbisyo ng gobyerno para nang sa ganun ay walang maiiwan sa ating muling pagbangon.

Agad tayong sumaklolo sa 202 residente ng Bgy. Ermita at Bgy. Risa sa Cebu na biktima ng sunog, gayundin sa 30 pamilya sa Quezon City.

Personal din akong nagtungo sa Davao Oriental para mamahagi ng ayuda at pasayahin ang 6,000 benepisyaryo mula sa Lupon; at 2,900 sa San Isidro na kinabibilangan ng TODA members, vendors, solo parents, mangingisda at mga senior citizens.

Nagbalik ako sa sa Island Garden City of Samal para muling magkaloob ng tulong sa mga mangingisda, magsasaka, senior citizens at mga kabilang sa iba’t ibang naghihirap na sektor. Nasuportahan natin ang 896 benepisyaryo mula sa Bgy. Caliclic; at 430 sa Brgy. Miranda.

Namahagi naman ang aking tanggapan ng ayuda sa iba’t ibang komunidad sa ating bansa tulad ng 9,567 residente sa Zamboanga City. Sa Davao City naman, natulungan ang 3,500 benepisyaryo mula sa Bgy. Mapula, Bgy. Salapawan, Bgy. Tapak, Bgy. Colosas, Bgy. Mabuhay, Bgy. Paradise Embac at Bgy. Pandaitan. Sa Alegria ay 1,600 benepisyaryo at 1,666 naman sa Sibonga sa probinsya ng Cebu ang ating nabigyan ng ngiti sa kanilang mga labi.

Hindi rin natin kinalimutan ang mga biktima ng Bagyong Ulysses tulad ng 666 benepisyaryo sa Dingalan, Aurora at 649 pa mula sa Arayat, Pampanga. Ang 5,200 indigent nating kababayan sa Zambales ay naabutan din ng tulong.

Tuloy lang ako sa aking tahimik, ngunit walang tigil na pagseserbisyo sa inyo, mga kababayan ko. Nakakawala ng pagod kapag nakakatulong sa kapwa at nakapag-iiwan tayo ng ngiti sa oras ng inyong pagdadalamhati, lalo na sa ating paniniwala na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mas maayos, ligtas at maginhawang buhay para sa susunod na henerasyon ng mga Pilipino

ni Bong Go - @Bisyo Magserbisyo | June 22, 2022

May mga magulang ng kabataang Pilipino na lumalapit sa atin para humingi ng tulong na maipasok sa drug rehabilitation center ang kanilang anak na nalulong sa ilegal na droga. Ramdam natin kung gaano kasakit para sa kanila na makitang nasisira ang buhay ng kanilang anak dahil sa masamang bisyo.

Marami tayong nasaksihang ganitong sitwasyon. Sa naging kampanya ni Pangulong Rodrigo Duterte kontra droga ay nakita mismo ng ating mga mata kung paano nasira ang mga pamilya dahil sa bisyong ito — na may mga nawalan ng direksyon sa buhay at naging sanhi rin ng katiwalian at kriminalidad.

Kaya kapag bumibisita tayo sa mga komunidad, palagi nating ipinapayo sa kabataan na umiwas sa droga at sa halip ay ibuhos ang kanilang oras sa eskuwela at iba pang produktibong gawain tulad ng sports. Namimigay tayo ng mga sapatos, bola at iba pang kagamitan para maengganyo sila, lalo na lumahok sa mga larong pampalakasan.

Bukod pa ang ating adbokasiya na magkaroon ang pamahalaan ng mas maayos na drug rehabilitation centers sa iba’t ibang sulok ng bansa. Naniniwala tayo na dapat pangalagaan ang karapatan ng bawat Pilipino na mabuhay ng matiwasay kasama na ang mga naligaw ang landas na nais namang magbagong buhay.

Ginagawa rin nating halimbawa sa kabataan ang ating mga sports icons tulad ni Carlos Yulo na kamakailan ay nakasungkit na naman ng tatlong medalyang ginto sa 9th Senior Artistic Gymnastic Championships na ginanap sa Doha, Qatar.

Sa pagpapalaganap ng pangmatagalang sports development, hindi lang natin mailalayo ang kabataang Pilipino sa droga, humuhubog din tayo ng susunod na henerasyon ng mga atleta na mag-uuwi ng karangalan sa ating bansa.

Isa ito sa mga dahilan kung bakit isinulong natin ang pagtatayo ng National Academy of Sports (NAS). Matagal na nating pangarap ang sports academy na tututok sa kabataang may potensyal sa sports at magkakaloob din sa kanila ng de-kalidad na edukasyon.

Naitatag ang NAS sa ilalim ng Republic Act 11470 noong 2020 na isa ako sa may-akda at co-sponsor. Ang mga pasilidad dito ay nakabatay sa international standards, kaya hindi pahuhuli sa ibang bansa ang kalidad ng training at edukasyon na nakukuha ng mga estudyante.

Noong Hunyo 17 ay magkasama naman kaming dumalo ni Pangulong Duterte sa groundbreaking ceremony ng Philippine Sports Training Center (PSTC) sa Bagac, Bataan. Bilang Vice-Chair ng Senate Committee on Finance ay isinulong natin ang pagpopondo para sa site development at preparasyon ng Master Development Plan ng PSTC na inaasahang matatapos sa 2024.

Ang NAS at PSTC ang regalo ng pamahalaan sa ating mga kasalukuyan at sa mga sumisibol na atletang Pilipino.

Bukod sa ating layunin na mailayo ang kabataan sa droga, bilang Chair ng Senate Committee on Health ay gusto rin nating mapangalagaan ang kanilang mental health — na apektado ng pandemya, lalo pa’t hindi nila nagagawa ang kanilang mga dating aktibidad.

Kailangang mag-invest ang pamahalaan sa mental health ng mga Pilipino — lalo na ng kabataan, at ipatupad nang maayos ang Republic Act 11036 o ang Mental Health Law na nilagdaan ni Pangulong Duterte noong 2018. Sa kapasidad ko bilang Vice-Chair ng Senate Committee on Finance, isinulong natin ang pagkakaroon ng karagdagang pondo para sa implementasyon nito sa ating budget noong 2021 at ngayong 2022.

Umapela rin tayo sa Department of Health na tiyakin na ang kasalukuyang Medicine Access Program for Mental Health ay mararamdaman ng mga nangangailangan ng mental health medicines lalung-lalo na sa malalayong lugar sa ating bansa.

Patuloy ang ating pakiusap sa ating mga kababayan na hindi pa bakunado laban sa COVID-19 na magpabakuna na para sa proteksyon ng lahat at manatiling sumunod sa mga health protocols. Huwag tayong magkumpiyansa. Nariyan pa ang panganib ng virus at nakapagtatala pa rin araw-araw ng mga panibagong kaso. Magtulungan tayo at magbayanihan para tuluyan na tayong makabangon mula sa pandemya.

Umaasa tayong ipagpapatuloy ng susunod na administrasyon ang Balik Probinsya, Bagong Pag-asa (BP2) program. Napakalaking tulong nito sa ating mga kababayan na nais nang umuwi sa kanilang probinsya at muling magsimulang. Dahil sa inisyatibang ito ay bibilis ang rural development at makalilikha ng maraming oportunidad para sa mga Pilipino sa lahat ng sulok ng Pilipinas.

Magtulungan tayo para maipaglaban ang kinabukasan ng ating mga anak. Sama-sama nating ilayo sila sa ilegal na droga, kriminalidad at iba pang masasamang bisyo. Isapuso natin na ang pagkakaroon ng mas maayos, ligtas at maginhawang bansa ang pinakamagandang maipamamana natin sa susunod na henerasyon ng mga Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.