Hindi katanggap-tanggap na may “VIP vaccinations” sa iilang LGUs

ni Bong Go - @Bisyo Magserbisyo | April 28, 2021

Habang patuloy ang laban kontra COVID-19, nakatuon ang ating isip at puso sa magigiting na medical frontliners na araw-araw ay itinataya ang kanilang buhay upang mapanatili tayong ligtas. Hindi lingid sa ating kaalaman na marami sa mga tinamaan at kalaunan ay binawian ng buhay ay pawang mga health workers.

Kaya naman, inuuna ng gobyerno ang pagbabakuna sa medical frontliners sa gitna ng tumataas na bilang ng kaso ng COVID-19 para agaran silang mabigyan ng sapat na proteksiyon at sandata sa giyerang ito.

Gayunman, naniniwala tayong hindi natatapos dito ang mga hakbang na puwede nating gawin upang mas mapalakas ang pagtugon sa pandemya. Kamakailan, umapela tayo kay National Task Force Against COVID-19 Chief Implementer Secretary Carlito Galvez, Jr. at Health Secretary Francisco Duque III para isama ang staff ng Professional Regulation Commission na nagsasagawa ng professional board exams sa A4 priority group ng vaccination plan ng gobyerno. Sumang-ayon si Secretary Duque at Secretary Galvez sa apela nating ito.

Kung protektado ang examiners, proctors at iba pang personnel ng PRC, maisasagawa natin sa lalong madaling panahon at ligtas na paraan ang mga professional board exams. Mas mabilis nating madaragdagan ang medical frontliners sa mga ospital na may COVID-19 patients. Mas matutulungan ang mga kababayan nating maipagpatuloy ang kanilang propesyon para sa kanilang kabuhayan.

Nitong Marso lamang, marami ang nagsipagtapos sa pag-aaral at kinakailangan na lang pumasa ng board exam para maging ganap na health professional. Kaya naman, huwag na nating patagalin pa ang paghihirap ng ating frontliners. Gawin na natin ang kinakailangan para matulungan at madagdagan ang bilang nila.

Habang tinutugunan natin ang mga pangangailangan ng medical frontliners, tutukan din natin ang ibang pangangailangan ng ating mga kababayang maaaring mawalan ng kabuhayan kung patuloy na maaantala ang mga operasyon ng PRC.

Kaya ngayong tuluy-tuloy na ang ating pagbabakuna sa bansa, muli tayong umaapela sa mga kasamahan sa pamahalaan na siguraduhing makararating ang mga bakuna sa medical frontliners at pinaka-nangangailangan, tulad ng senior citizens, may comorbidities, essential workers, at mahihirap na kinakailangang lumabas ng bahay para magtrabaho.

Sumunod tayo sa patakaran. Hindi katanggap-tanggap na may mga nagaganap na “VIP vaccinations” sa iilang LGUs. Paano matatapos ang pagbabakuna ng mga frontliners kung may mga sumisingit? Alalahanin nating nagpapakahirap ang mga frontliners para isalba ang buhay ng ating mga kababayan. Kaya unahin sila sa bakuna upang masigurong hindi bumagsak ang ating healthcare system at para mas marami pang buhay ang mailigtas.

Magtiwala at sundin ang National Vaccination Program ng gobyerno dahil ang bakuna ang tanging susi tungo sa pagbalik sa normal na pamumuhay at importanteng solusyon para malampasan ang pandemyang ito.

Habang patuloy ang pagbabakuna at inaasahan nating darating na rin ang dagdag-supply sa susunod na mga araw, huwag tayong magkumpiyansa. Mas paigtingin pa ang pag-iingat at pagsunod sa mga patakaran. Magtulungan, magmalasakit, at makiisa tayo sa bayanihan para mas maproteksiyunan ang buhay, kapakanan at kabuhayan ng ating mga kababayan!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Isulong at suportahan ang bayanihan sa mga komunidad

ni Bong Go - @Bisyo Magserbisyo | April 24, 2021

Nitong mga nagdaang araw, naging usap-usapan ang community pantries at iba pang inisyatibo ng ordinaryong mamamayan para makatulong sa kapwa. Nakatutuwang makita ang patuloy na pakikipagbayanihan ng mga Pinoy sa kabila ng matinding hamon na kinahaharap ng bawat isa sa atin ngayon.

Sang-ayon ang gobyerno na dapat makiisa tayong lahat sa mga inisyatibo ng ating mga komunidad. Kaya nanawagan tayo mga kapwa lingkod-bayan, kasama na rin ang mga sundalo at kapulisan, na makisama tayo at suportahan ang mga community pantries sa pamayanan.

Kapag ang gobyerno ay may programa para sa tao, ineenganyo natin ang publiko na sumunod at makiisa. Kaya kapag ang publiko naman ang may sariling inisyatibo na makabubuti sa taumbayan, tungkulin din ng mga nasa gobyerno na magbigay-suporta, makilahok at paigtingin pa ito lalo para mas marami ang makabenepisyo.

Iisa lang naman ang hangarin nating lahat at ‘yan ay ang maiahon ang buong bansa mula sa krisis na ito. Kung sama-sama tayo tungo sa iisang layunin, mas makasisiguro tayong walang mas maghihirap, walang mas magugutom, at walang maiiwang Pilipino tungo sa ating muling pagbangon bilang matatag na sambayanan.

Nitong Martes, namahagi tayo ng tulong sa mahigit isang daang sundalo ng 10th Infantry Division sa okasyon ng kanilang blood donation sa Bgy. Tuboran, Mawab, Davao de Oro. Tinulungan din natin ang 336 kataong nasunugan sa Zone 9, Brgy. 61, Pasay City. Umabot sa 3, 582 residente naman na apektado ng nagdaang Bagyong Auring ang nabigyan natin ng ayuda sa San Agustin, Surigao del Sur sa loob ng dalawang araw.

Pagdating naman ng Miyerkules, dumayo tayo sa Sta. Praxedes, Cagayan kung saan 95 na residente na apektado ang kabuhayan ng pandemya ang ating tinulungan. Namahagi rin tayo ng tulong sa 2,622 na mga kababayang Aeta sa Porac at 51 biktima ng sunog sa Mabalacat sa probinsiya ng Pampanga.

Kahapon naman ay patuloy pa rin ang pag-iikot ng ating opisina. Nag-abot tayo ng tulong sa mga nabiktima ng sunog sa iba’t ibang parte ng bansa — 20 pamilya sa Barobo at 23 pamilya sa Tandag City, Surigao del Sur, 13 pamilya sa Quezon City at 22 pamilya sa Cagayan de Oro City. Maliban pa riyan, bumalik ang ating opisina sa Pampanga upang maghatid ng tulong sa mga kababayan nating Aeta sa Floridablanca na umabot sa 1, 320 katao. Sa mga nabiktima naman ng nagdaang bagyo sa Mindanao, nakapagdala tayo ng tulong sa 1,646 katao sa Barobo, Surigao del Sur, 559 katao sa Kitcharao, Agusan del Norte, at 187 katao sa San Francisco, Surigao del Norte. At panghuli, dumayo ang ating opisina sa Mallig, Isabela upang mag-abot ng tulong sa 228 kataong lubhang apektado ng pandemya.

Sa bawat lugar, namigay tayo ng masks, face shields, vitamins, food packs, pagkain, at iba pang klase ng tulong. Kasama na riyan ang paghati-hati sa ilang batches ng mga benepisaryo, pagkakaroon ng social distancing at iba pang mga hakbang upang maiwasan ang hawaan ng sakit.

Palagi nating isapuso na karangalan at tungkulin ng bawat Pilipinong maging parte ng bayanihan. Kung anumang kabutihan ang puwede nating gawin para sa kapwa ay gawin na natin ngayon. Kung anumang biyaya ang meron tayo, ipamahagi rin natin ito ayon sa ating kakayanan. At kung may sobra tayong kagamitan o pagkain sa bahay, ipagkaloob sa iba kaysa masira, mag-expire o mabulok. Huwag natin hayaan na masayang ang biyayang meron tayo lalo na kung mapapakinabangan ito ng ibang mas nangangailangan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Lahat tayo may papel sa bayanihan kontra COVID-19!

ni Bong Go - @Bisyo Magserbisyo | April 21, 2021

Bawat isa sa atin ay may ginagampanang papel sa laban kontra COVID-19. Tandaan na hindi lamang ito laban ng gobyerno, kundi laban ng buong sambayanang Pilipino at ng buong mundo.

Dapat maging bukas ang ating puso’t isipan, hindi lamang sa pagtulong sa kapwa, kundi pati na rin sa pagtanggap ng tulong mula sa iba’t ibang sektor ng lipunan na gustong makisama sa bayanihan at mag-ambag sa pangkalahatang layunin na malampasan ang krisis na ating hinaharap.

Bilang halimbawa, kamakailan ay nakatanggap tayo ng mga katanungan tungkol sa posibleng paggamit ng Ivermectin at iba pang gamot kontra COVID-19. Bago ang lahat, nililinaw nating hindi natin ito isinusulong o ang anumang medisina. Kailangang respetuhin ang mga eksperto na mas nakakaalam, at ang mga proseso na dapat sundin ayon sa batas upang masigurong ligtas at epektibo ang mga ito bago gamitin ng mga tao.

Ngunit ang tanging hiling lamang natin ay mapakinggan nang husto ng gobyerno ang mga grupong naghahain ng iba’t ibang suhestiyon tulad nito na nais lamang makatulong. Hinihikayat natin ang mga awtoridad na magkaroon ng maayos na dayalogo at siyentipikong pag-aaral tungkol sa mga posibleng makatulong sa ating laban kontra COVID-19.

Ang importante ay huwag pahirapan ang mga nais tumulong. Lahat tayo ay iisa lang ang layunin at ‘yun ay ang makapagligtas ng buhay at makatulong sa kapwa tao.

Matuto na tayo sa mga pinagdaanan nitong pandemya para maging mas handa ang bansa sa anumang posibleng krisis na darating sa mga susunod na taon. Tulad ng Pangulo, magtiwala tayo sa mga eksperto at maging bukas ang ating isipan. Hikayatin natin ang lahat na maging parte ng solusyon kaysa sayangin ang oras sa pagbabatikos.

Ikinatuwa natin ang mga inisyatibo, tulad ng community pantry, na nagpapakita na nananatiling buhay ang diwa ng bayanihan sa kabila ng sunud-sunod na mga pagsubok na dumating sa bansa. Tama lang na magbigay ng tulong ayon sa kakayanan ‘yung mga may sobra. Kaysa masayang o mag-expire, mabuti nang mapakinabangan ng mas nangangailangan.

Tulad ng palagi nating sinasabi, kung anumang kabutihan ang puwede nating gawin para sa kapwa ay gawin na natin ngayon. Hindi ito panahon para magsisihan, magsiraan o maglamangan pa. Panahon ito ng pagtutulungan, pagmamalasakit at pakikiisa sa bayanihan. Walang kulay, walang pinipili at walang pulitika, dapat ang pagtulong sa kapwa.

Habang nananatiling bukas ang ating isipan sa mga opinyon ng iba, huwag din sana nating sayangin ang oras natin sa mga nagkakalat ng mali at malisyosong mga balita. Bukod sa COVID-19, ang panloloko ay sakit na nakamamatay din!

Huwag hayaan na madiskaril ang ating mga pinaghirapan dahil lang sa mga batikos o paninira ng iilang mga taong sarili lang ang iniisip.

Patuloy lang tayong makiisa sa bayanihan. Naniniwala tayong walang anumang hamon o krisis ang makakatalo sa nagkakaisang sambayanang Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.