Pasasalamat para sa pagkakataong magserbisyo sa kapwa

ni Bong Go @Bisyo Magserbisyo | Jan. 22, 2025

Ang buhay at kalusugan ay mga biyaya na dapat nating ipagpasalamat palagi sa Panginoon. 

Isang masaya at makulay na okasyon para ipahayag natin ang papuri sa Diyos ay ang mga kapistahan na idinadaos sa iba’t ibang panig ng bansa na ako ay nabigyan ng oportunidad na makisama at makisaya nitong mga nakaraang araw. 

Tulad na lamang ng Sinulog Festival sa Cebu, bilang isa ring Bisaya, nakiisa tayo nitong January 19 sa mga kababayan nating Cebuano sa ipinagmamalaki nilang pagdiriwang na talaga namang dinarayo ng mga turista mula sa loob at labas ng bansa. Ang pagdiriwang na ito ay nagbibigay-pugay sa Sto. Niño bilang pagpapahalaga sa ating Diyos. 

Bukod sa kasiyahan ng Sinulog, personal din nating dinaluhan ang inagurasyon ng itinayong Super Health Center sa Moalboal, Cebu gayundin ang Malasakit Center na nasa Vicente Sotto Memorial Medical Center sa Cebu City. Nagpalugaw tayo roon at namahagi ng tulong sa mga healthcare worker. Lubos kong ipinagpapasalamat sa Panginoon ang pagkakataong makapagsilbi sa kapwa ko Pilipino. Viva Pit Señor Sto. Niño! 

Bago ito ay dumalo tayo sa selebrasyon ng Ati-Atihan Festival sa Kalibo, Aklan sa paanyaya nina Mayor Juris Sucro at Gov. Joen Miraflores. Nakiisa tayo sa ating mga kababayan sa street dancing bilang pasasalamat sa Poong Sto. Niño sa mga biyayang ibinibigay Niya. 

Bukod sa pakikisaya, inuna rin natin ang serbisyo. Binisita natin ang Malasakit Center na nasa Dr. Rafael Tumbokon Memorial Hospital kung saan namahagi tayo ng tulong sa mga pasyente at healthcare workers, at nagsagawa ng feeding initiative. Nag-inspeksyon din tayo ng itinayong Super Health Center sa Kalibo.

Nais kong iparating ang pagsaludo sa ating mga uniformed personnel para sa mapayapang mga pagdiriwang nitong mga nakaraang araw. Hindi biro ang magbantay sa isang okasyon na dinadaluhan ng milyun-milyong tao. Napakahalaga ng papel ng ating mga pulis at sundalo sa pagpapanatili ng kapayapaan at katahimikan sa ating bansa. Kaya naman noong Lunes, January 20, bilang Vice Chairperson ng Senate Committee on Public Order, sinuportahan natin ang isang resolusyon na nagbibigay-pugay sa ating uniformed personnel. 

Co-sponsor tayo ng Senate Resolution No. 1270, na kinikilala ang kabayanihan nina Police Senior Master Sergeant Ryan Mariano at Correction Officer 1 Melvin Cabanal Magnaye ng Bureau of Corrections, kasama si PCol. Kimberly Molitas, dahil sa kanilang pambihirang katapangan at dedikasyon sa pagprotekta sa ating mga kababayan. Ang ating kasamahang si Senator Ronald dela Rosa ang principal sponsor ng naturang resolusyon. 

Si Mariano ay nasugatan noong December 31, 2024 habang naka-duty sa isang simbahan sa Zamboanga City matapos makipaglaban sa mga armadong kalalakihan. Nasaksihan iyon ni Magnaye, na agad namang ipinosisyon ang kanyang sasakyan para maprotektahan ang mga tao sa paligid. Nagpapasalamat tayo sa kanilang serbisyo at sakripisyo sa ating mga kababayan. 

Sa ilalim ng administrasyon ni dating Pangulong Rodrigo Duterte, minabuti nating unahin ang kapakanan ng ating mga uniformed personnel at law enforcement officers at itinaas ang kanilang sahod sa tulong ng mga ahensya at mga nasa Kongreso noon.

Ang serbisyong ibinibigay nila sa bansa ay hindi matutumbasan. Kaya dapat lamang na suportahan sila sa lahat ng aspeto — mula sa kanilang sahod, pasilidad, at maging sa mga programa at batas na tumutulong sa kanilang propesyon. 

Ang inyong lingkod ang principal author at co-sponsor ng RA11589, o ang Bureau of Fire Protection Modernization Act of 2021. Co-author naman tayo ng Republic Act No. 11549, na nagbawas sa height requirements ng mga gustong maging pulis. Isinumite rin natin ang Senate Bill No. 422, na kung maisabatas ay naglalayon na magkaloob ng free legal assistance sa mga sundalo at pulis na may makakaharap na isyung legal sa kanilang opisyal na pagtupad sa tungkulin.

Sa lahat ng ito, iisa lang naman lagi ang hiling natin sa ating mga pulis at sundalo — gawin lagi ang tama, at unahin ang kapakanan ng mga Pilipino at interes ng bansang ating pinaglilingkuran. Simula’t sapul ay prayoridad ko na ang kapayapaan at kaayusan ng ating bansa — na pundasyon para sa ating pagsulong at pag-unlad. 

Patuloy naman ang inyong Senator Kuya Bong Go sa paghahatid ng serbisyo sa mga nangangailangang Pilipino. Inalam natin ang kalayagan at nagbigay tayo ng tulong noong January 18 sa 327 residenteng naging biktima ng insidente ng sunog sa Brgy. 458, habang 67 naman ang binigyan natin ng tulong sa Brgy. 459, Sampaloc, Manila. 

Ang 216 residente ng Bacoor City, Cavite na naging biktima ng sunog naman ang ating personal na binisita at pinagkalooban ng tulong noong January 20. 

Sinaksihan naman ng aking opisina ang groundbreaking ceremony ng Super Health Center sa Oroquieta City, Misamis Occidental. 

Ipinadala ko rin ang aking Malasakit Team para maghatid ng tulong sa ating mga kababayan. Naalalayan natin ang isang residente ng Lupon, Davao Oriental na nasunugan. Nabigyan ng dagdag na tulong ang 371 scholars ng Cebu Technological University - Danao City Campus, Cebu. 

Natulungan din ang 854 nawalan ng hanapbuhay sa Candijay, Guindulman, Mabini, Valencia, Garcia Hernandez, at Duero, mga bayan sa Bohol na nabigyan din ng pansamantalang trabaho. 

Tuluy-tuloy din ang ating palugaw sa mga ospital na may Malasakit Center para sa mga pasyente, kanilang bantay at hospital staff. 

Tandaan natin na minsan lang tayong dadaan sa mundong ito, kaya kung ano mang kabutihan ang puwede nating gawin sa ating kapwa, gawin na natin ngayon dahil hinding-hindi na tayo babalik sa mundong ito. 

Bilang inyong Mr. Malasakit, patuloy akong magseserbisyo sa inyo dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tuloy ang serbisyo at malasakit para sa mga Pilipino

ni Bong Go @Bisyo Magserbisyo | Dec. 21, 2024

Masarap sa pakiramdam kapag ang ating mga inisyatiba para magkaroon ng mga reporma sa ating healthcare system ay nagkakaroon ng suporta mula sa hanay ng ating mga kapwa manggagawa sa gobyerno.

Noong December 17 ay naglabas ang Department of Health ng public advisory kung saan kinukumpirma nito ang kanilang commitment na siguraduhing hindi maantala ang medical assistance programs na kaugnay ng Republic Act No. 11463, o ang Malasakit Centers Act of 2019. Tayo ang principal sponsor at may-akda ng batas na ito.

Alinsunod sa RA 11463, maaaring dumulog ang nangangailangan ng medical assistance sa mga Registered Social Worker sa mga Malasakit Center ng ospital na mayroon nito. Malaking ginhawa ang naibibigay ng Malasakit Centers sa mga kababayan nating walang kakayahang magbayad ng gastusin sa ospital. Sa isang kuwarto lang, nandiyan na ang mga ahensya na tutulong para mabawasan ang pasanin nila.

Kaya paalala ko sa mga ahensya na ipatupad ang batas nang tama upang hindi mapabayaan ang mga kababayan nating naghihingalo dahil sa sakit at sa bayarin ng pampagamot.

Ang Malasakit Centers program na ating isinulong ay nagsisilbing one-stop shop kung saan pinagsama-sama na sa iisang bubong ang representatives mula sa DSWD, DOH, PhilHealth, at PCSO para hindi na magpapalipat-lipat pa ng mga opisina at pipila nang mahaba ang mga benepisyaryong nangangailangan ng tulong medikal.

Batay sa datos ng DOH, mahigit 15 milyong kababayan na natin ang natulungan ng programa at may 166 Malasakit Centers na ang operational sa buong bansa. Pera ng taumbayan iyan, ibinabalik lang sa kanila sa pamamagitan ng mabilis at epektibong tulong pangkalusugan.

Hindi na dapat kailangang mahirapan pa ang ating mga kababayan sa paglapit sa gobyerno para humingi ng tulong, magsanla ng kalabaw o mangutang para lang sa pampaospital. Bilang mga lingkod bayan, ilapit natin ang serbisyo sa taong nangangailangan bilang pagmamalasakit sa kanilang mga pinagdadaanan. Huwag na dapat pahirapan pa ang mahirap na!

Samantala, patuloy pa rin tayo sa paghahatid ng serbisyo lalo na ngayong panahon ng Kapaskuhan.

Binisita natin noong December 19 ang mga kababayan natin sa Cagayan. Guest of honor tayo sa Cagayan Provincial Health Awards bilang chairperson ng Senate Committee on Health. Pinangunahan din natin ang pamamahagi ng tulong sa 1,281 estudyante at 400 mahihirap sa Tuguegarao City katuwang si Mayor Maila Ting, na sa ating inisyatiba, napagkalooban din sila ng tulong mula sa lokal na pamahalaan. Sinaksihan din natin ang inagurasyon ng itinayong Super Health Center sa Peñablanca kung saan nagbigay tayo ng suporta sa 80 barangay health workers doon.  Nagpapasalamat ako sa pagdedeklara sa akin bilang adopted son ng Tuguegarao City at Peñablanca, Cagayan.

Kahapon, December 20, nasa Rizal province tayo upang mamahagi ng tulong sa 2,820 estudyante ng Binangonan. Sa ating pakikipagtuwang kay Gov. Nina Ricci Ynares, nabigyan din ang mga benepisyaryo ng tulong mula sa lokal na pamahalaan. Matapos ito ay dumiretso tayo sa San Mateo at nag-inspeksyon sa itinayong Super Health Center. Katuwang si Mayor Omie Rivera, namahagi rin kami ng rice packs at iba pang tulong sa libu-libong residente roon. Pagkatapos ay nakipagtulungan din tayo sa ilang mga barangay official sa Pasig City upang mas mailapit ang serbisyo sa mga tao sa paanyaya ni Kap. Jigs Servillon.

Sinaksihan naman ng aking opisina ang turnover ng Super Health Center sa Esperanza, Agusan del Sur at ang groundbreaking ng itatayong Super Health Center sa Cuenca, Batangas.

Ipinadala ko naman ang aking Malasakit Team sa iba’t ibang komunidad para maalalayan ang mga nangangailangan tulad ng 55 na naging biktima ng sunog sa Talisay City, Cebu; at sa dalawang biktima sa Governor Generoso, Davao Oriental.

Nag-abot din tayo ng dagdag na suporta bilang Senate Youth Committee chairperson sa 189 iskolar sa Bulacan State University; 41 sa National College of Business Administration sa Taytay, Rizal; at 553 sa iba’t ibang sangay ng Cebu Technological University. Napagkalooban din ng suporta ang 200 TESDA scholars sa Iligan City.

Natulungan din natin ang 23 kooperatiba sa Region 10 katuwang ang Cooperative Development Authority sa ilalim ng programang Malasakit sa Kooperatiba na ating isinulong.

Namahagi rin ng tulong ang aking opisina para sa mga benepisyaryo sa isinagawang Dental and Medical Mission at Feeding Program sa Pasay City.

Ilang araw na lang at Pasko na, sana ay maging ligtas at mapayapa ang pagsapit ng espesyal na okasyong ito sa ating lahat. Bilang inyong Mr. Malasakit, sana ay magkaroon ang lahat ng happy and healthy holiday season!

Ako na inyong Senator Kuya Bong Go ay patuloy na magseserbisyo sa inyo dahil bisyo ko ang magserbisyo, at naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pangalagaan ang kaligtasan, kalusugan, at dignidad ng mga biktima ng kalamidad

ni Bong Go @Bisyo Magserbisyo | Sep. 21, 2024

Sa tuwing may mga kalamidad, gaya ng bagyo, baha, lindol, pagputok ng bulkan, o kaya’y sakuna, gaya ng sunog, doble ang hirap na pinagdaraanan ng ating mga kababayan. Bukod sa hamon ng muling pagtatayo ng nasira nilang mga bahay, maraming mahihirap na evacuees ang walang choice kundi ang sumilong muna sa evacuation centers.

Sa aking pag-iikot sa bansa upang ilapit ang serbisyo sa mga nangangailangan, saksi ako sa malungkot na sitwasyon sa ibaba sanhi ng kakulangan ng angkop na imprastraktura sa ngayon. Kalimitang nagsisilbing evacuation centers ang eskwelahan, basketball court, o kaya’y multi-purpose hall ng komunidad. Karaniwan ay walang maayos na comfort room, walang gamot, walang supply ng malinis na tubig at pagkain, walang privacy, siksikan, kaya marami ang nagkakasakit. Mahirap na ngang maging biktima ng sakuna, mas napapahirapan pa sila.

Kapag nataon naman na may klase, naaantala ang pag-aaral ng mga estudyante dahil ginagamit ang mga silid-aralan. Apektado rin ang ibang mga gusali na pansamantalang nagiging tirahan ng evacuees.

Oras na para solusyunan ito! Titiyakin natin, hindi lang ang kaligtasan at kalusugan ng evacuees, kundi pati na ang kanilang dignidad upang mas mabilis silang makabangon.

Kaya naman isinulong natin sa Senado ang Senate Bill No. 2451, o ang Ligtas Pinoy Centers Bill. Base ito sa Mandatory Evacuation Centers Bill na ating nai-file noon. Layunin ng panukalang ito na sa bawat munisipalidad at siyudad ay magkakaroon ng dedicated at maayos na evacuation center. Ang inyong Senator Kuya Bong Go ang principal author at co-sponsor nito, na naipasa na sa pangalawang pagbasa noong Miyerkules.

Dahil ang Pilipinas ay laging dinadaanan ng natural disasters, kailangang maging mas handa tayo. Isinusulong din natin ang SBN 188, na naglalayong itatag ang Department of Disaster Resilience (DDR) upang may nakatutok bago pa man dumating ang kalamidad, habang nananalasa ito, sa rescue and recovery period, hanggang sa restoration of normalcy para matiyak na mas maayos ang koordinasyon ng mga sangay ng gobyerno.

Hindi natin mapipigilan ang mga kalamidad pero nasa kamay natin kung paano tutugon sa mga ito at kung paano matitiyak na ligtas ang bawat Pilipino. May kalamidad man o wala, hindi tayo tumitigil sa paglalapit ng serbisyo sa ating mga kababayan.

Noong September 19, bumisita tayo sa Camarines Sur at personal na pinangunahan ang pamamahagi ng tulong para sa 1,000 nawalan ng hanapbuhay sa Naga City, na sa ating inisyatiba ay nabigyan din ng pansamantalang trabaho. Sinaksihan natin ang pagdaraos ng Peñafrancia Voyadores Festival and Street Dance Competition sa paanyaya ni Mayor Nelson Legacion, at nagtungo tayo sa Naga Cathedral.

Nasa Lapu-Lapu City tayo kahapon, September 20, at nagkaloob ng tulong sa mga miyembro ng 23 kooperatiba sa ilalim ng isinulong nating programang Malasakit sa Kooperatiba katuwang ang Cooperative Development Authority. Dumiretso tayo sa bayan ng San Fernando, Cebu at nagbigay ng tulong para sa 656 na BHWs, nutrition scholars at fire victims katuwang si Mayor Mytha Canoy. Sa ating pagsisikap ay nakatanggap din ang mga benepisyaryo ng tulong pinansyal mula sa lokal na pamahalaan. Sinaksihan din natin ang groundbreaking ng itatayong Super Health Center sa lugar na ating isinulong.

Sa araw ding iyon ay nagkaloob ng tulong ang aking opisina kasama ang ating kaibigang si Philip Salvador para sa 500 residente ng Cebu City na nawalan ng hanapbuhay, katuwang si Acting VM Dondon Hontiveros.

Mula Cebu ay bumiyahe tayo papuntang Davao City at muling inayudahan ang 382 residenteng naging biktima ng sunog. Nakatanggap din sila ng emergency assistance mula sa NHA sa ilalim ng programang ating isinulong para may pambili sila ng materyales sa pagpapatayong muli ng kanilang tahanan. Dumalo rin tayo sa PDP National Assembly na pinamunuan ng aming party chairman na si dating Pangulong Rodrigo Duterte.  

Ipinadala ko naman ang aking Malasakit Team sa iba’t ibang komunidad para maghatid ng tulong sa ating mga kababayang nangangailangan tulad ng 17 residente ng Tagoloan, Misamis Oriental na naging biktima ng sunog.

Binalikan at muling inayudahan natin ang mga nawalan ng tahanan sa Davao del Norte kabilang ang tatlo sa Panabo City; anim sa New Corella; at 16 sa Island Garden City of Samal. May 51 naman sa Brgy. Culiat, Quezon City; at 66 sa Sta. Mesa, Manila. Dagdag pa riyan ang 189 residente sa Bacoor City, Cavite na ang tahanan ay nasira ng kalamidad. Sa ating inisyatiba ay nakatanggap din ang mga ito ng tulong pinansyal upang maipaayos ang kanilang mga bahay.

Nabigyan natin ng tulong ang 340 residente ng Caloocan City na kapos ang kita kasama ang sectoral leaders ng kanilang komunidad.

Tuluy-tuloy din ang ating pagsuporta sa mga nawalan ng hanapbuhay, na sa ating inisyatiba ay nabigyan ng pansamantalang trabaho ng gobyerno. Sa Davao del Sur, naging benepisyaryo ang 651 residente ng Digos City at 563 sa Padada katuwang si VG Riafe Cagas-Fernandez, mga board members, mayors, vice mayors at konsehal ng kanilang mga lugar.

Sa Batangas, nasuportahan natin ang 50 manggagawa sa Mataas na Kahoy kaagapay si VM Jay Ilagan; at 50 sa Nasugbu kasama si BM Armie Bausas. Sa Iloilo, 54 sa Miag-ao, katuwang si VM Doc Mac Napulan; at 88 sa Santa Barbara kaagapay si Coun. Ramon Sullano.

Mga manggagawa rin ang natulungan natin kabilang ang 306 sa Villanueva, Misamis Oriental katuwang si VM Jeric Emano, mga konsehal at mga kapitan ng barangay; 98 sa Pagudpud, Ilocos Norte kaagapay si Mayor Raffy Benemerito; 243 sa Calauag, Quezon kasama ang mga konsehal na sina Marlon Noscal, Melvin Labasan, Marina Umali, Mildred Villareal at ang kanilang 31 kapitan ng mga barangay; at 69 sa Brgy. Caniogan, Pasig City katuwang sina TODA President Enrico Tolentino at Andy Cheng. Dagdag pa rito ang mga natulungan nating 50 katao sa General Trias City, Cavite; 50 sa Binangonan, Rizal at 155 kababaihan sa Tantangan, South Cotabato.

Lubos akong nagpapasalamat sa ating mga kababayan sa patuloy na tiwala at suporta. Ito ay inspirasyon para lalo kong ipagpatuloy ang pagseserbisyo sa inyo. Hindi ko sasayangin ang oportunidad na ibinibigay ninyo sa akin, at sa abot ng aking makakaya ay patuloy kong ipaglalaban ang kapakanan ng bawat Pilipino at magseserbisyo sa aking kapwa lalo na sa mga mahihirap at pinakanangangailangan. Bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.