P95M puslit na sibuyas, bawang nasabat

ni BRT | February 19, 2023

Nasabat ng mga tauhan ng pulisya, coast guard at Bureau of Customs ang nasa 250 tonelada ng mga sibuyas, bawang at monggo beans sa isang cold storage facility sa

Malabon, kamakalawa ng gabi.

Ayon sa isang opisyal, hinihinalang ilegal ang pagpasok sa mga nasabing produktong nagkakahalaga ng P95 milyon.

Hinihingi ng mga awtoridad ang proof of payment sa duties at taxes para sa mga produkto.

Bibigyan anila ng Customs ng 15 araw ang may-ari ng storage facility para makapagpaliwanag.

Nagkakahalagang P31.5 milyon... Pekeng health at beauty products, nasabat!

ni Zel Fernandez | April 26, 2022

Sinalakay ng Bureau of Customs ang ilang mga bodega at tindahan sa Sta. Cruz, Maynila na nagbebenta ng mga hindi rehistradong gamot at pampaganda.

Katuwang ang NCR National Bureau of Investigation (NBI) at Armed Forces of the Philippines (AFP), tinatayang aabot sa halagang P31.5 milyon ang mga nasabat na pekeng produkto na pawang mga ginagamit na panggamot at pampaganda.

Ito ay matapos ang isinagawang dalawang magkahiwalay na operasyon ng mga awtoridad sa mga bodega sa 1005 Ongpin St., Sta. Cruz, at Units A, B, C, at D sa 641 Fernandez St., Sta. Cruz, Maynila.

Batay sa nakalap na report, ang mga medical at cosmetic products na nasamsam ay mga brand ng Lianhua Lung Cleansing Tea, Healthy Brain Pills, Gluta Lipo, Lidan Tablets, Nin Jiom Pei Pa Koa, Vita herbs at iba pang produkto na pawang mga Chinese manufactured.

BOC, DA at DTI, joint force… Smuggled carrots, nasabat sa Divisoria

ni Zel Fernandez | April 20, 2022

Sampung kahon ng smuggled na carrots ang nasabat sa pag-iinspeksiyon ng mga operatiba sa Divisoria, kagabi.

Tinatayang aabot sa halagang ₱8,000 ang mga smuggled carrots na nakumpiska ng Bureau of Customs, kasunod ng isinagawa nitong joint operations kasama ang Department of Agriculture at Department of Trade and Industry sa mga natitinda ng agricultural products sa Divisoria.

Sa mas pinaigting pang kampanya laban sa smuggling, ipinaliwanag ng DA na matagal na nilang tinututukan ang mga nagpupuslit ng mga imported agricultural products upang matulungan ang mga lokal na magsasakang nahihirapang makapagbenta ng kanilang mga aning gulay dahil sa matinding kumpetensiya sa merkado dulot ng mga imported goods.

“Marami na kaming nahuli sa pantalan hanggang dito sa second border. ‘Pag sinabi nating second border, du’n na sa mga cold storage mismo, sinusuyod natin ang mga cold storage,” pahayag ni Serapio Garabiles, Jr., inspection officer ng Department of Agriculture.

Ayon sa BOC, ipinupuslit umano ang mga imported na gulay kasama ng mga aprubadong produkto kaya minsan ay nakalulusot ito sa inspeksiyon sa mga pantalan.

Babala pa ng DA at BOC, hindi sila titigil sa pagsawata sa mga iligal na nagpupuslit ng mga gulay sa bansa upang higit pang maprotektahan ang mga lokal na magsasaka at mga mamimili, “tandaan ninyo ‘yan pati ang mga smuggler inaalam na namin. Dalawang beses na kaming nag-operate sa palengke, pagbibigay ‘to ng warning na hindi kami titigil. Ang pangatlong operation namin may kulong na”, ani Garabiles.

Dagdag naman ni Chief Alvin Enciso, MICP Customs Intelligence and Investigation Service, “pwede ho kayong tumakbo pero hahabulin at hahabulin po namin kayo. Sayang lang ho ‘yung gagastusin n’yo para mailabas. Pagdating mo sa mga palengke, sa mga warehouses, hahabulin pa rin ho namin ‘yon”.

Sasampahan sana ng kaso ang mga mahuhuling may-ari ng mga kumpiskadong produkto ngunit wala nang umangkin sa mga ito.