Mendoza naghari sa elite ng Go For Gold Criterium Race Series 3

ni MC @Sports News | Oct. 25, 2024

Nangunguna si MTB standout John Andre Aguja (dulong kaliwa) ng Go For Gold Cycling Team sa men’s junior MTB category ng Go For Gold Criterium Race Series 3. Naroon din sa award ceremony si Go For Gold founder Jeremy Go (nakatayo, dulong kaliwa. Photo: (G4Gpix)

Pinagharian ni Aidan James Mendoza ang makasabog-bagang madulas na ruta para kunin ang men’s elite title ng Go For Gold Criterium Race Series 3 na idinaos sa General Santos City. Ang matapang na sprinter ng Go For Gold Continental Cycling Team ay agad kumalas sa peloton bagamat kasagsagan ng malakas na ulan hanggang sa unahan ang isa pang sprinter na si Jun Rey Navarra sa makapigil-hiningang pagtatapos.

Pumangatlo si Marc Ryan Lago, isa ring Go For Gold Continental Cycling Team standout, 4 na segundo ang agwat sa kampeon na nakatawid sa meta, kaya doble ang selebrasyon ng squad sa podium.

"Masarap ang pakiramdam na naipanalo namin itong karera para sa Go For Gold,’’ sabi ni Mendoza nang maorasan ng 45 minutes at 56 seconds at makumpleto ang 1.4-kilometer loop sa harap ng city hall kung saan 40 minutong inikutan ng peloton sa dagdag na 3 laps.

"Sa umpisa pa lang alam kong magiging mahirap kaya ginawan ko agad ng paraan para kumawala,’’ dagdag ng 25-anyos na multiple podium finisher sa international races, kabilang na ang katatapos na 3rd place sa Tour of Thailand.

Ipinagmalaki rin ang MTB junior rider na si John Andre Aguja ng Go For Gold nang kunin ang MTB junior men’s crown habang si Kate Yasmin Velasco ng Standard Insurance ay nagreyna sa women’s open matapos ang 25 minutes plus three laps race.

"Our races are organized to give more opportunities for our local riders. For sure we will have more legs next year where we can hopefully find more upcoming cyclists,’’ ani Go For Gold founder Jeremy Go.

Nanguna rin si Go For Gold’s Marvin Mandac sa men’s junior race sa loob ng 20 minutes at 47 seconds, tinalo si teammates Aguja (10 seconds na kabuntot) at Justhene Navaluna na may agwat na 12 seconds. Magilas si Kathlene Dela Vega sa women’s junior division sa kanyang high-speed finish.

Morales, naghari sa Go For Gold Criterium Race

ni MC @Sports | July 10, 2024

Umuusok ang gulong at pedalan ni Jan Paul Morales nang makarating sa dulo ng meta ng finish line at hawakan ang paghahari sa Go For Gold Criterium Race Series 2 sa City Di Mare sa Cebu City. 

Nagawang manaig ng reigning national champion ng Standard Insurance continental team mula sa isang batalyon na malulupit na riders at kumalas sa final 50 meters para lampasan sina Esteve Hora Jr. ng SIP team at Go For Gold’s Marc Ryan Lago sa finish line. 

Naorasan si Morales, ang two-time local Tour champion at sprint specialist ng 55:00.79 sa men’s elite category matapos kumarera sa 35 laps ng 1.1-kilometer course  kasama si Hora, ang Go For Gold Criterium Race Series 1 champion nitong unang bahagi ng taon, habang si Lago na ilang segundo lang na kabuntot.

"Naghintay ako ng tamang pagkakataon at nabiyayaan ng maganda sa dulo,’’ ani Morales sa pagtatapos ng  day-long series ng karera na pakay na ibalik ang init ng pagtanggap sa sport sa naturang lugar.  

Ang  second phase ng three-leg race series at suportado ng Go For Gold, Scratchit, Cebu City govt at ng PhilCycling.

Umarangkada rin si Mathilda Krogg nang manguna sa women's open sa bilis na 41:04.71 (20 laps) habang ang teammates sa Standard Insurance na sina Raven Joy Valdez at Angela Joy Marie Bermejo ay dumating na segunda at tersera sa karera.

"Thank you to all Cebuano cyclists and cycling fans for coming over. Also, the support of Cebu City Vice Mayor Dondon Hontiveros made it doubly successful,” ani Go For Gold founder Jeremy Go, na nagpasalamat din sa  cycling teams ng kompetisyon. Nagwagi rin si Steven Tablizo sa men’s under-23 category at iniwan sina   Rorking Roque ng SIP at James Paul Ryan Escumbien.

Coo sumungkit ng silver sa Asian BMX Championships

ni MC @Sports | June 3, 2024

Si Patrick Coo (kaliwa) kasama ang gold winner na si Komet Sukprasert ng Thailand at bronze medalist Shimada Ryo ng Japan. (fbpix)

Pilak na medalya ang nasungkit ni Patrick Bren Coo mula sa  2024 Asian Cycling Confederation BMX Championships sa Thailand upang ganap na umangat ang kanyang potensiyal sa naturang sport. 

Ang silver medal na kanyang nakuha sa Kamol Sports Park sa Nong Chok  ay mula na rin sa unang nakuha niyang men’s elite bronze medal ng nakaraang taon sa Hangzhou Asian Games at ang gold medal na kanyang nahamig bilang junior rider noong 2019 Asian championships sa Malaysia.

“I’m so blessed and I’m happy that all my hard work are paying off,” ayon sa 22-anyos na si Coo, isang  Olympic Solidarity scholar na inilaan ang buong taon ng pagsasanay sa UCI World Cycling Center sa Aigle, Switzerland at pagdayo na rin sa iba't ibang bansa para sa kompetisyon. 

Nagtapos si Coo sa likod ni Thailand's BMX ace Komet Sukprasert, na nagwagi ng kanyang ikatlong diretsong Asian championships gold medal habang pakay nito ang  Paris Olympics.

Nakumpleto naman  Shimada Ryo ng Japan ang men’s elite podium ng championships na nilahukan ng mahigit sa 500 atleta sa Asya.

“My congratulations to Patrick, he’s been working hard and his dedication and passion for BMX is getting stronger each day,” ayon kay Philippine Olympic Committee president Abraham “Bambol” Tolentino, na pinuno ng national association for cycling, PhilCycling.

Pinasalamatan naman ni Coo si Tolentino at ang  Philippine Sports Commission sa kanilang matinding suporta sa kanyang kampanya para sa 2028 Los Angeles Olympics.