Pizza parlor sumabog, street sweeper, nadale

ni Lolet Abania | March 28, 2022

Isang street sweeper ang nasugatan matapos ang pagsabog ng isang pizza parlor sa Quezon City, ngayong Lunes ng madaling-araw.

Ayon sa Bureau of Fire Protection (BFP), pasado alas-4:00 ng madaling-araw naganap ang pagsabog sa naturang pizza parlor sa Visayas Avenue, Quezon City, kung saan umabot sa unang alarma ang sunog, subalit agad ding naapula ang apoy bandang alas-5:00 ng madaling-araw.

Kinilala ang biktima na si Sophia Rafa, street sweeper, na bahagyang nasunog ang suot niyang face mask habang agad siyang binigyan ng paunang lunas na nagtamo ng first degree burns sa kanyang mukha.

“Nagwawalis ako kanina, madilim pa. Tapos pagtapat ko dito may biglang sumabog. Kaya ‘yung face mask ko, ayan, nasunog. Nasa mukha ko ito kanina,” salaysay ng biktima.

Bukod sa pizza parlor, nadamay din ang ilang kabahayan na nasa likod lamang ng naturang restaurant .

Patuloy ang imbestigasyon ng mga awtoridad sa sanhi at pinagmulan ng sunog. Gayundin, inaalam pa ang halaga ng mga ari-arian na napinsala matapos ang sunog.

Mag-ina na-trap sa sunog, patay

ni Lolet Abania | February 9, 2022

Patay ang mag-ina matapos na ma-trap sa nasusunog nilang bahay sa Quezon City, ngayong Miyerkules ng madaling-araw.

Ayon sa Bureau of Fire Protection (BFP), sumiklab ang sunog bandang alas-5:00 ng madaling-araw sa unang palapag ng bahay ng mga biktima sa 11th St. corner Victoria St., Barangay Mariana, Quezon City.

Hindi na nakalabas ng kuwarto na nasa ikalawang palapag ng bahay ang 67-anyos na nanay at 42-anyos na anak niyang babae.

Nakaligtas naman ang kasambahay ng mga biktima nang makalabas ito mula sa nasusunog na bahay.

Natupok din ang dalawang nakaparadang sasakyan ng mga ito. Itinaas naman sa unang alarma ang sunog habang naapula ang apoy ng alas-6:20 ng umaga, ayon pa sa BFP.

Patuloy na inaalam ng BFP ang dahilan at halaga ng pinsala matapos ang sunog.

20 kabahayan natupok sa Davao City — BFP

ni Lolet Abania | January 15, 2022

Nasa tinatayang 20 kabahayan ang natupok matapos na sumiklab ang sunog sa Davao City ngayong Sabado ng umaga, ayon sa Bureau of Fire Protection.

Sa ulat ng Bucana Fire Station, gawa sa mga light materials ang marami sa mga bahay na nasunog habang mabilis na kumalat ang apoy.

Agad na isinara ang isang bahagi ng Bolton Bridge sa Barangay 76-A ng nasabing lungsod, bandang alas-9:30 ng umaga dahil sa sunog.

Batay sa mga lumabas na video mula sa mga netizens, kitang-kita ang makakapal at maiitim na usok na nanggagaling sa ilalim ng tulay habang malalaking apoy naman ang tumutupok sa mga kabahayan.

Alas-11:00 ng umaga, idineklarang fire-out ang sunog ng BFP.

Wala namang naitalang nasaktan matapos ang sunog, subalit ayon sa mga awtoridad nasa tinatayang 23 pamilya ang nawalan ng tirahan.

Ayon pa sa BFP, posibleng ang sanhi ng sunog ay faulty wiring mula sa tirahan ng isang residente ng nasabing barangay.

Gayunman, patuloy na inaalam ng mga awtoridad ang dahilan at pinagmulan ng sunog.