Tanim na gulay sa Benguet, nabalot ng frost

ni Lolet Abania | November 19, 2021

Ilang pananim na mga gulay ang nabalot ng tinatawag na frost o andap sa lalawigan ng Benguet.

Sa pakiwari ng mga magsasaka, maagang nangyari ang frost sa kanilang lugar dahil anila, kadalasan ay dumarating lamang ito kapag panahon na ng amihan kung kailan nakakapagtala ng mababang temperatura sa naturang lalawigan.

Ang peak ng Amihan o Northeast Moonsoon ay karaniwang nararanasan tuwing Enero o Pebrero.

Ang andap o frost ay mga hamog na nagyelo na nangyayari kapag mababa na ang temperatura sa isang lugar, kung saan bumalot ito sa ilang pananim na gulay sa Benguet.

Gayunman, wala namang naitalang matinding pinsala sa mga gulay sanhi ng andap.

Presyo ng ilang gulay, bumaba na

ni Jasmin Joy Evangelista | October 18, 2021

Bumaba na ang presyo ng ilang gulay galing Benguet sa ilang palengke sa Metro Manila matapos mai-deliver ang mga gulay ilang araw matapos manalasa ang Bagyong Maring.

Sa Commonwealth Market sa Quezon City, kasama sa mga nagmurang gulay ang mga sumusunod:

* Repolyo - P240 kada kilo mula P360 kada kilo

* Pechay - P150 kada kilo mula P280 kada kilo

* Labanos - P200 kada kilo mula P400 kada kilo

Mas marami na rin ang namamalengke sa Commonwealth Market nitong Linggo, ikalawang araw ng Alert Level 3 sa Metro Manila.

Ito ay matapos itaas sa 50 porsiyento ang kapasidad ng mga palengke mula sa dating P30 porsiyento.

Temperature check lang ang ginagawa sa mga mamimili at hindi na hinihingan ng quarantine pass o vaccination card.

Maaari ring makapasok at mamili ang mga galing ng ibang lungsod.

Mga magsasaka dumadaing sa pagdagsa ng carrots mula China

ni Jasmin Joy Evangelista | September 26, 2021

Dumadaing ang mga magsasaka sa Benguet dahil apektado ang kanilang mga produkto sa pagdagsa ng carrots mula sa China.

“Sa ngayon, talamak na kasi. Halos lahat ng markets dito ay marami nang smuggled or imported na mga carrots talaga,” ayon kay Agot Balanoy, presidente ng kooperatiba sa isang panayam.

“We call them smuggled kasi sabi naman ni BPI [Bureau of Plant Industry] wala silang in-approve na permit na magpapasok ang Pilipinas ng mga imported vegetables. Therefore, it must be smuggled,” dagdag niya.

Bukod sa mas mura at malalaki ang carrots na galing sa China, mas matagal din daw mabulok ang naturang gulay na ipinuslit sa bansa.

Kaya para hindi malugi ang mga nagtitinda ng mga carrots na galing sa Benguet sa Divisoria, ibinababa na nila ang presyo nito.

Nasa P50 per kilo ang imported carrots kumpara sa Benguet carrots na nasa P60 hanggang P70, at kung minsan ay umaabot pa ng P120 per kilo.

Kinumpirma ng Department of Agriculture (DA), na walang inaprubahang import permits ang Bureau of Plant Industry para sa carrots.

Kaugnay nito, nilinaw din ng DA na maganda ang kalidad ng mga gulay na galing sa Pilipinas.

“‘Yan ang hindi ko nga alam, eh, kasi mura lang naman ang carrots, eh. Napakamura so hindi natin malaman kung bakit mayroon ganyan… Kung ganyan baka smuggled or whatever,” ayon kay Agriculture Assistant Secretary Noel Reyes.

Nakikipag-ugnayan na ang DA sa ibang ahensiya kaugnay sa mga imported na carrots.