Batanes niyanig ng magnitude 5.2 na lindol

ni Jasmin Joy Evangelista | March 27, 2022

Niyanig ng magnitude 5.2 na lindol ang Basco, Batanes nitong Sabado ng gabi, ayon sa Philippine Institute of Volcanology and Seismology (PHIVOLCS).

Ayon sa PHIVOLCS ang epicenter ng lindol, na tumama bandang 9:53 p.m., ay 40 kilometers northeast ng Basco.

Ito ay tectonic na may lalim na 29 kilometers, at naramdaman ang Intensity III sa Basco.

Nagpaalala naman ang ahensiya na posibleng makaranas ng aftershocks matapos ang naturang lindol.

Sa panayam sa Super Radyo dzBB ngayong Linggo, sinabi ni PHIVOLCS Director at Science Undersecretary Renato Solidum Jr. ang ang lindol ay dulot ng nabuong fault dahil sa pagtama ng kontinente ng Asya sa tip ng northern Luzon.

"Sa Batanes kasi maraming fault sa lupa, at ito ay dulot ng collision ng kontinente ng Asia doon sa dulo ng northern Luzon. Ang Batanes at Taiwan island ay collision zone, binabangga, kaya paminsan-minsan ay may lindol sa dagat na nararamdaman ng mga isla malapit sa Batanes," ani Solidum.

Batanes, niyanig ng magnitude 5.1 na lindol

ni Lolet Abania | February 12, 2022

Isang magnitude 5.1 na lindol ang yumanig sa baybayin ng Sabtang, Batanes ngayong Sabado, ayon sa Philippine Institute of Volcanology and Seismology (PHIVOLCS).

Batay sa bulletin ng PHIVOLCS, alas-8:41 ng umaga naitala ng lindol.

Matatagpuan ang epicenter ng lindol sa 20.15°N, 121.53°E - 041 km S 60° W ng munisipalidad ng Sabtang.

Ayon pa sa PHIVOLCS, tectonic ang pagyanig na may lalim na 51 kilometers.

Naramdaman ang Intensity IV sa Sabtang, Batanes; Intensity III naman sa Uyugan, Ivana, Mahatao at Basco sa Batanes; at Intensity I sa Itbayat, Batanes.

Wala namang naitalang pinsala sa lugar matapos ang lindol subalit, babala ng PHIVOLCS na posibleng magkaroon ng mga aftershocks.

Batanes muling nakapagtala ng COVID-19 case

ni Jasmin Joy Evangelista | January 5, 2022

Muling nakapagtala ng COVID-19 case ang Batanes nitong Martes.

Ayon sa provincial government, dalawang residente na umuwi sa probinsya sakay ng Philippine Airlines noong Disyembre 30, 2021 ang nagpositibo sa COVID-19. 

Mayroon silang nararanasang mild symptoms ng sakit noong sila ay dumating kaya sumailalim sila sa RT-PCR Test.

Kasalukuyan nang nasa isolation facility ang dalawang pasaherong nagpositibo.

Isinailalim na rin sa quarantine ang kanilang close contacts at nakasabay sa biyahe sa kani-kanilang bayang inuwian.