Brazil, nileksiyunan ang Gilas Women sa FIBA Cup Pre-q'fying

ni Anthony E. Servinio @Sports | August 21, 2024

Photo: Gilas Pilipinas vs Brasil / FIBA

Laro ngayong Huwebes – Kigali Arena

Pilipinas vs. Senegal 

Nahirapan ng todo ang World #8 Brazil bago maipiga ang 77-74 panalo kontra sa #40 Gilas Pilipinas, sa pagbubukas ng 2026 FIBA Women’s World Cup Pre-Qualifying Tournament Grupo C Lunes ng gabi mula sa Kigali Arena ng Rwanda. 

Galing sa timeout at tabla sa 74-74, napunta ang bola sa libreng si Khate Castillo subalit nagmintis ang 3-points na may 9 na segundo sa orasan. Napilitang bigyan ni Afril Bernardino ng foul si Caca Martins na may 1.8 segundong nalalabi at ipinasok niya ang dalawang free throw para sa huling talaan. 

Bago noon, itinabla ni Bernardino ang laro sa 74-74 at 1:21 sa orasan. Nagbukas ang pinto para sa Gilas at isang free throw lang ang naipasok ni Aline Mouras, 75-74 at tumawag ng timeout si Coach Patrick Aquino para sa huling 20 segundo. 

Nanguna sa Brazil si 6’2” sentro Leticia Soares na may 15 puntos kahit hindi naglaro sa huling 1:30 matapos patawan ng ika-5 at huling foul at lamang ang Brazil, 74-73. Nasayang ang double-double ni Jack Danielle Animam na 18 puntos at 21 rebound. Nag-ambag ng 14 si Bernardino. 

Tinatapos kagabi ang laro ng Gilas at World #16 Hungary. Ginulat ng #25 Senegal ang mga Hungarian, 63-61, upang makibahagi sa maagang liderato kasama ang Brazil. 

Sa mga laro sa Grupo D, wagi ang host Rwanda sa Lebanon, 80-62 at Argentina kontra Gran Britanya, 53-47. Ang dalawang may pinakamataas na kartada sa bawat grupo ang tutuloy sa knockout crossover semifinals sa Sabado at finals sa Linggo. 

Haharapin ng mga Pinay ang Senegal sa Huwebes para sa huling laro simula 5 p.m., oras sa Pilipinas. Tanging ang kampeon ng torneo ang tutuloy sa qualifying para sa World Cup na gaganapin sa Berlin, Alemanya mula Set. 4 hanggang 13, 2026.  

Gilas Pilipinas Women sasabak sa FIBA World Cup

ni MC @Sports | August 20, 2024

Mapapalaban ang Gilas Women sa Brazil, Hungary at maging sa Senegal. (SBP pix)

Aaksiyon ang Gilas Pilipinas Women sa FIBA Women’s Basketball World Cup Pre-Qualifying Tournament sa  Kigali, Rwanda. Kauna-unahan ito sa   women’s national basketball team na sasabak sa labas ng FIBA Asia borders. 

Nasa ranked 40th ang Pilipinas, sa  women’s division ng FIBA at ka-grupo ang Brazil (8th), Hungary (16th), at Senegal (25th). Nakakuha ang Filipina ballers ng ticket sa Rwanda nang maka-sixth-place finish sa FIBA Women’s Asia Cup 2023 sa Australia noong Hunyo. 

Heavy underdog ang Gilas women sa torneo bilang may lowest-ranked competitor sa labas ng host Rwanda pero ayon kay coach Patrick Aquino at sa buong team na habang pinag-iibayo nila ang performance mula sa inihandang programa, ibig sabihin positibo sila sa kanilang estado.

“Moving up the rankings means we’ll have to learn how to step outside our comfort zone,” ayon kay Samahang Basketbol ng Pilipinas Executive Director Erika Dy. “Our Women’s Team has shown us they can be competitive in the region but there’s still a lot of work to be done to reach the next level." 

Ayon sa FIBA article, dalawang Pinay ballers ang dapat abangan sa hanay ng 8 teams - sina April Bernardino at Jack Animam. "Known for her athleticism and relentlessness to win, Afril is one of the best players I have seen in the country. Her constant will to learn and determination to work harder than anybody else has made her who she is now,” ani Aquino hinggil sa ace players. 

Haharapin ng Pilipinas ang Brazil sa August 19 ng 8pm. Kasunod ng  showdown kontra  Hungary sa August 20 ng 11pm. Paghahandaan din nila sa  group stage assignment ang  Senegal sa August 22 ng 5pm.

Talas ng shooting ni Curry nagpa-gold sa Paris Olympics

ni Anthony E. Servinio @Sports | August 12, 2024

Photo: X / USA Basketball

Ipinamalas muli ni Stephen Curry ang kanyang matalas na shooting sa huling 3 minuto upang itulak ang U.S. sa ginto ng Paris 2024 Men’s Basketball Tournament Linggo ng umaga sa Accor Arena. Tinalo ng mga Amerikano ang host Pransiya, 98-87, para sa kanilang ika-limang sunod na kampeonato at pangkalahatang ika-17 mula pa noong Berlin 1936. 

Nagbanta ang mga Pranses sa buslo ni Victor Wembanyama, 79-82 at sinagot ito agad ng 3-points ni Curry, 85-79. Mula roon ay bumira siya ng tatlo pang-tres na ang huli ay nagbigay ng komportableng 96-87 lamang at 35 segundo sa orasan.

Photo: Victor Wembanyama at Steph Curry / Circulated / SS from video

Maganda ang simula ng mga Amerikano sa likod nina Devin Booker at reserba Anthony Edwards para makuha ang unang quarter, 20-15. Pumalag at huling tinikman ng Pransiya ang lamang, 27-26, at iyan ang hudyat para magising ang Team USA at maagaw at palakihin ang bentahe sa 61-47 sa pangatlong quarter sa tres ni Curry. 

Nagtapos si Curry na may 24, lahat galing sa walong tres. Sumunod sina Kevin Durant at Booker na may tig-15 habang nag-ambag ng 14 at 10 assist si LeBron James. 

Ito ang pang-apat na ginto ni Durant sa apat na sunod Olympics simula London 2012 habang pangatlo ito ni LBJ kasama ang Beijing 2008 at London 2012 at isang tanso sa Athens 2004. Dalawa na rin ang ginto nina Booker, Bam Adebayo, Jayson Tatum at Jrue Holiday na bumalik mula Tokyo 2020.

Samantala, napunta ang tanso sa Serbia matapos talunin ang 2023 FIBA World Cup kampeon Alemanya, 93-83. Nagsumite ng triple double si Nikola Jokic na 19, 12 rebound at 11 assist habang gumawa ng 19 din si Vasilije Micic.