- BULGAR
- Dec 9, 2020
ni Thea Janica Teh | December 9, 2020
Nagpositibo sa COVID-19 ang apat na leon sa isang zoo sa Barcelona, Spain matapos isailalim sa RT-PCR test.
Tatlong 16-anyos na babaeng leon ang mga ito na kinilalang sina Zala, Nima at Run Run at isang 4-anyos na lalaking leon na si Kiumbe.
Ayon sa mga beterinaryong tumingin sa mga leon, nakitaan umano ang apat ng ilang sintomas kaya naman agad silang isinailalim sa COVID-19 test tulad kung paano sumasailalim sa test ang mga tao.
Napag-alaman ding dalawa sa staff ng zoo ang nagpositibo rin sa COVID-19 matapos ang outbreak noong nakaraang buwan.
Sa ngayon ay nakipag-ugnayan na ang Veterinary Service of Barcelona sa Bronx Zoo sa New York na nakapagtala rin ng 3 leon at 4 na tigre na nagpositibo sa virus noong Abril pero gumaling din naman.
"The lions were given veterinary care for their mild clinical condition - similar to a very mild flu condition - through anti-inflammatory treatment and close monitoring and the animals responded well," bahagi ng Barcelona Zoo.
Samantala, patuloy pa rin ang imbestigasyon ng mga awtoridad kung paano nakuha ng apat na leon ang COVID-19.