Resulta ng 2020-2021 Bar exams sa Abril 12 — SC

ni Lolet Abania | April 5, 2022

Nakatakdang ilabas ang resulta ng 2020-2021 Bar examinations sa Abril 12, kapag naaprubahan na rin ito ng Court En Banc, ayon sa Supreme Court (SC) ngayong Martes.

“The 2020-21 Bar Examinations Committee Chairperson, Supreme Court Associate Justice Marvic M.V.F. Leonen, today asked the Court to hold a special En Banc session next Tuesday, April 12, 2022, for the purpose of considering his report on the first-ever digitalized and regionalized Bar examinations and the release of results,” pahayag ng SC sa isang press release.

Sinabi rin ng SC na ang oath-taking ng mga matagumpay na examinees ay isasagawa sa Mayo 2, 2022. “The venue, time, and other details of the oath-taking shall be announced later,” dagdag pa ng high court.

Matatandaan na matapos ang dalawang beses na postponement dahil sa pandemya ng COVID-19, ang Bar exams ay pinal na ring naisagawa noong Pebrero 4 at 6 ngayong taon. Ito rin ang unang pagkakataon na ang Bar exams ay ginanap sa multiple venues.

Pinaigsi naman ng dalawang araw sa halip na apat, at isinagawa ito digitally ng mga examinees na dala at gamit ang kanilang mga laptops habang nagda-download ng mga questions mula sa isang secured online application. Ang nasabi ring exam ang pinakamalaking batch ng mga Bar candidates na umabot sa 96.5% turnout.

Nitong Lunes, pinawi naman ni Leonen ang mga sinasabing “unverified stories” kaugnay sa exam results at pinayuhang “rest easy” na ang mga Bar takers.

Sa Pebrero 4 at 6 na.. Bar exams, iniurong ng SC

ni Lolet Abania | January 14, 2022

Inanunsiyo ng Supreme Court ngayong Biyernes na ang nakatakdang Bar examinations ay isasagawa na sa Pebrero, kung saan ilan sa kanilang examinees ay tinamaan ng COVID-19, habang ang iba ay naka-quarantine dahil sa sakit.

Gaganapin ang Bar exams sa Pebrero 4 at Pebrero 6, na dating nakaiskedyul ng Enero 23 hanggang Enero 25.

Batay sa isang email survey, ayon sa SC nasa 16.8 porsyento ng 8,546 examinees, alinman sa kanila ay positibo sa virus, kasama sa bahay na may COVID-19, o nasa quarantine dahil sa exposure nila rito.

“They are at risk of not being able to take the Bar Examinations if the original schedule... were to push through,” nakasaad sa anunsiyo.

“Also, given the current infection rate and quarantine situation of the Bar personnel, 16 out of 31 teams that will be deployed will be critically understaffed if the current schedule were maintained,” ayon pa rito.

Hinimok naman ng SC ang mga examinees na sumailalim na sa self-quarantine hanggang Enero 20.

Una nang pinaiksi ang Bar exams ng 2 araw sa pangamba hinggil sa epekto ng Omicron variant ng COVID-19 at ang idinulot na hagupit ng Bagyong Odette.

Matatandaang noong nakaraang taon, inanunsiyo ng SC na ang Bar exams ay magiging digitalized, localized, at proctored na.

Gayundin, ang mga Bar examinees ay kukuha ng pagsusulit gamit ang kanilang sariling Wi-Fi-enabled laptops sa halip na ang traditional exams, kung saan required sa kanila na lahat ng sagot ay handwritten o sulat-kamay.

Pagtanggal sa bar exams, pinalagan ni CJ Gesmundo

ni Lolet Abania | July 8, 2021

Hindi sang-ayon si Chief Justice Alexander Gesmundo sa naging panukala ni Department of Labor Secretary Silvestre Bello III hinggil sa pag-abolish ng bar exams at iba pang katulad nito.

“I don’t see the need to abolish the bar exam. We must continue having the bar exam,” ani Gesmundo sa isang interview ngayong Huwebes.

“I respect the view of Secretary Bello but as far as the practice of law, I think we should maintain the bar examinations so that we can sift those who are competent, considering the nature of the legal profession… The legal profession is vested with public interest,” paliwanag ng chief justice.

Giit ni Gesmundo, kinakailangang masiguro na iyon lamang may kakayahan ang papayagang makapasok sa legal profession at maisagawa ang kanilang tungkulin.

“Aside from the tradition, it is important that we make sure that those who join the legal profession are competent, that they can perform their duties as lawyers, not only to the court but also to their clients and to society as a whole,” sabi ni Gesmundo.

“So the qualifying exam for legal professionals should be therein continued,” diin pa niya.

Ayon kay Gesmundo, ang legal na basehan hinggil sa pagkuha ng mandatory bar exams para sa mga nagnanais na maging abogado ay nakapaloob sa Rules of Court.

Nitong Miyerkules, iminungkahi ni Bello na alisin na ang licensure exams para sa mga nurse, bar exams sa mga lawyers at iba pa dahil aniya sa mataas na gastusin sa pag-aaral at nadaragdagan pa ng pagkuha ng board exams.

Ipinunto rin ni Bello na basta ang isang estudyante ay graduate mula sa isang institusyon na accredited ng Commission on Higher Education (CHED), hindi na kailangan pang kumuha ng licensure exams.

Pinalagan din ng Philippine Nurses Association (PNA) ang panukalang ito ni Bello.