Tampok sina Magbanua, Ponce at Aguinaldo... P100 coins, inilabas na ng BSP

ni Lolet Abania | November 16, 2021

Inilabas na ng Bangko Sentral ng Pilipinas (BSP) ang tatlong bagong P100 commemorative coins, kung saan tampok ang mga bayaning sina Teresa Magbanua, Mariano Ponce at General Emilio Aguinaldo.

Nabatid na sa mga BSP store, ang bawat P100 coin ay nagkakahalaga umano ng P350, habang mabilis itong nauubos dahil sa rami ng gustong makakuha nito.

“Like BSP-issued coins in general circulation, commemorative coins are deemed legal tender, unless these coins have been demonetized,” ayon sa pahayag ng BSP.

Marami sa mga lumabas nang commemorative coins ng BSP ay limitado lamang ang nagawa dahil sa mas mahal na uri ng materyales ang ginamit dito upang mas maging maganda ito at mainam para sa mga collectors nito.

“Most of these commemorative coins are minted from precious metals like gold and silver making them more extraordinary and more expensive,” paliwanag pa ng BSP.

BSP: Walang bagong banknote design

ni Jasmin Joy Evangelista | November 10, 2021

Ipinahayag ng Bangko Sentral ng Pilipinas (BSP) sa publiko na hindi ito naglabas ng mga bagong disenyo ng salaping papel.

Ito ay matapos lumabas sa isang satirical news website na ibinabahagi sa social media ang 500-piso commemorative banknote na bagong gawa umano ng BSP.

Pinapaalalahanan ng BSP ang publiko na maging mapanuri at hinihikayat din na ipagbigay-alam sa pulisya o sa Payments and Currency Investigation Group ng BSP (email address: currencyinvestigation@bsp.gov.ph) ang sinumang gagamit ng naturang pekeng pera.

Sa ilalim ng Republic Act No. 10951, ang mga namemeke ng pera ng Pilipinas ay maaaring patawan ng parusang pagkakakulong ng hindi bababa sa 12 taon at 1 araw at multang hindi hihigit sa dalawang milyong piso.

Samantala, ang BSP ay regular na nagsasagawa ng public information campaigns upang ipaalam sa publiko ang design, security features, at proper handling ng Philippine currency at maging ang relevant laws, policies, at programs.​

P480K halaga ng pekeng pera nasabat ng BSP ngayong taon

ni Jasmin Joy Evangelista | November 4, 2021

Higit P480,000 halaga ng pekeng pera ang nasabat ng Bangko Sentral ng Pilipinas (BSP) sa mga nakaraang operasyon nito ngayong taong 2021.

Ayon sa BSP, 7 operasyon na ang isinagawa ng ahensiya at 16 suspek na ang naaresto kung saan 14 sa kanila ay miyembro umano ng sindikato.

“The BSP's Payments and Currency Investigation Group, which carries out said operations, has already filed criminal cases against the arrested individuals in the courts,” sinabi ng ahensiya.

“In addition to the seized counterfeit Philippine currency, the BSP also seized more than 200 pieces of counterfeit foreign banknotes during the said period,” dagdag pa nila.

Kaugnay nito ay nagbabala ang ahensiya na sa ilalim ng batas, ang mga namemeke ng pera ay maaaring makulong sa loob ng 12 taon at isang araw kasama ang fine na hindi lalampas sa P2 milyon.

Hinihikayat din nila ang publiko na ipagbigay-alam sa mga awtoridad o tumawag sa mga telephone number (02) 8988-4833 at (02) 8926-5092 sakaling makaranas ng nasabing usapin.