10 milyong piraso ng bagong 1K bill, inilabas na – BSP

ni Zel Fernandez | April 28, 2022

Naglabas na ng 10 milyong piraso ng bagong P1,000 polymer banknotes na mayroong imahe ng Philippine Eagle ang Bangko Sentral ng Pilipinas (BSP).

Batay sa pahayag ng BSP, katumbas ito ng 0.7% ng tinatayang pinagsamang bilang ng mga papel at polymer o plastic na P1,000 bill sa sirkulasyon sa bansa.

Nauna rito, nagsagawa ang central bank ng technical briefings sa mga bank personnel, machine suppliers, at cash-in-transit service providers para turuan tungkol sa disenyo at security features ng polymer banknotes na magsisilbing bagong hitsura ng isanlibong piso sa Pilipinas.

Samantala, nasa kabuuang 500 milyong piraso ng polymer banknotes ang inaasahan namang ilalabas ng BSP kasama ang kasalukuyang P1,000 perang papel pagdating ng 2023.

Sa paggunita ng kabayanihan ni Jose Rizal... ‘125-Piso’ commemorative coin, inilabas na ng BSP

ni Lolet Abania | March 11, 2022

Inilabas na ng Bangko Sentral ng Pilipinas (BSP) ngayong Biyernes ang limited edition ng “125-Piso” commemorative coin bilang paggunita sa ika-125 anibersaryo ng kabayanihan ni Dr. Jose Rizal.

Sa Facebook post ng BSP, ipinakikita ng coin si Rizal bilang pagkilala na isang “global Filipino hero.” “His life and legacy serve as inspiration for people from all walks of life,” pahayag ng BSP.

Ayon sa BSP, ang 34-mm commemorative coin, na gawa sa nordic gold, ay mayroong larawan at lagda ni Rizal na may bigat na 15 gramo at nagtataglay ng gold-plated finish.

“Inscriptions 125 years and Martyrdom of Jose Rizal are on the obverse side while the Rizal Monument, the BSP logo, 125 Piso and Republika ng Pilipinas are on the reverse side,” saad ng BSP.

Sinabi rin ng BSP na available ang coin sa limitadong dami lamang para sa P1,000, kung saan maaaring mag-order sa official website ng kagawaran.

Matatandaang si Rizal ay binitay noong Disyembre 30, 1896, sa pamamagitan ng firing squad sa Bagumbayan Field (Rizal Park na ngayon) sa Maynila, kung saan ipinag-utos ng mga Spanish authorities.

Ginunita naman ng Pilipinas ang ika-125 anibersaryo ng kamatayan ng Pambansang Bayani noong nakaraang Disyembre.

BSP nagbabala sa pekeng pera sa mga ATM

ni Jasmin Joy Evangelista | January 27, 2022

Nagpaalala ang Bangko Sentral ng Pilipinas (BSP) sa publiko na palaging suriin ang perang na-withdraw sa automated teller machines (ATMs) para maiwasang mabiktima ng mga pekeng pera.

Sa advisory na inilabas ng BSP, nagpaalala ang central bank na suriin ang pera na mawi-withdraw batay sa “feel, look, tilt” upang malaman kung ito ay peke.

“Should a banknote dispensed by an ATM be suspected as a counterfeit, the holder is advised to immediately report it to the bank that owns the machine,” pahayag ng BSP.

“The bank will then conduct a thorough investigation to verify whether the banknote was indeed dispensed by the bank’s ATM,” dagdag pa nito.

Sakaling ma-verify na peke ang perang hawak ng isang nag-withdraw, sinabi ng BSP na kailangan itong palitan ng bangko.

Ayon pa rito, lahat ng mga bangko ay gumagamit ng sapat na risk management measures para maiwasan ang mga ganitong insidente.

“Aside from the installation of cameras at ATM areas, cash handlers and service providers tasked to refill ATMs are trained to detect counterfeit banknotes or verify their genuineness before placing them in ATMs,” sabi ng BSP.

Sa ilalim ng Republic Act 10951, posibleng maparusahan ng hindi bababa sa 12 taon na pagkakulong at multang hindi hihigit sa P2 milyon ang sinomang mahuli na namemeke ng pera sa Pilipinas.

Mula Enero hanggang Setyembre noong nakaraang taon, nasamsam ng BSP ang mahigit 500 pekeng perang papel na may notional value na P480,000 kung saan ang pitong enforcement operations nito ay nagresulta rin sa pagkakaaresto sa 16 na suspek, 14 dito ay miyembro ng crime syndicates.