3 patay, 2 pinaghahanap sa hagupit ni Vicky sa Surigao del Sur

ni Thea Janica Teh | December 21, 2020

Patay ang 3 katao matapos malunod at 2 pa ang pinaghahanap sa Surigao del Sur sa pananalanta ng Bagyong Vicky nitong weekend, ayon kay Governor Alexander Pimentel ngayong Lunes.

Nasa 17 barangay sa probinsiya ang nalubog sa baha at halos 5,000 pamilya ang naapektuhan at inilikas sa evacuation center.

Dagdag pa ni Pimentel, lubos na naapektuhan ang bayan ng Madrid at Hinatuan dahil malapit umano ito sa Baganga, Davao Oriental kung saan unang nag-landfall ang Bagyong Vicky noong Biyernes.

Ibinahagi ni Pimentel na isa sa mga dahilan ng pagbaha sa kanilang probinsiya ay dahil marami umanong illegal miners lalo na sa bayan ng Barobo. Aniya,

“Inisyuhan ko last year pa ng cease and desist order kasi meron silang illegal gold mining diyan, mga bahay diyan along the riverside, 30 kabahayan ang na-washout."

Tinatayang nasa P20 milyong halaga ng imprastraktura sa probinsiya ang nasira ng Bagyong Vicky. Sa ngayon ay hinihintay na lamang ni Pimentel ang rekomendasyon ng provincial disaster office upang magdeklara ng state of calamity.

3,500 inilikas sa Cagayan at Isabela dahil sa Bagyong Vicky

ni Lolet Abania | December 20, 2020

Tinatayang nasa 3,500 indibidwal ang nagsilikas ngayong Linggo sa Cagayan at Isabela dahil sa matinding pagbaha na epekto ng Bagyong Vicky at ang tail-end ng isang Frontal System (Shear Line) na iniulat ng PAG-ASA.

Ayon kay Cagayan Gov. Manuel Mamba mayroong 2,500 evacuees sa kanilang lalawigan, kung saan 1,400 ang nasa Tuguegarao City at ang natitirang iba pa ay sa Enrile at Solana. Ang 1,400 evacuees sa Tuguegarao ay mula sa 15 barangay. "Dumadami ang aming mga evacuees," ani Mamba.

"Medyo mabilis tumaas ang tubig galing sa Cagayan River," dagdag ni Mamba at sinabing ang lebel ng tubig sa ilog ay umabot sa 11 meters ngayong alas-11:00 ng umaga. "Last time, umabot tayo ng 13 meters," sabi ni Mamba.

"Kaya nag-a-anticipate din kami na 'pag hindi humupa ang ulan, talagang mauulit ang nangyari sa amin one month ago." Dagdag ni Mamba, inilagay na sa red alert ang buong lalawigan ng Cagayan.

Samantala, ayon kay Isabela Gov. Rodito Albano, tinatayang nasa 1,000 ang evacuees sa ngayon at may report na isa ang nawawala kasabay ng pagbaha sa Isabela. "May isa. Mataas ang ilog, rumaragasa, lumangoy pa, tumawid.

Ayun, nawala," sabi ni Albano at sinabing pinaghahanap na ito ng awtoridad Imino-monitor din nila ang Pinacanauan River, ayon kay Albano. "'Yung tubig sa Pinacanauan River sa bandang Sierra Madre, mukhang rumagasa.

'Pag 'yung tributary na 'yun namamaga, naaapektuhan ang Cagayan, nagkakaroon ng catch basin na naman," paliwanag ni Albano. Dagdag ni Albano, naiulat din na ang bahagi ng national highway sa Cabagan ay hindi na madaanan sa baha. "Nahati ang national highway," sabi ni Albano.

Nasa sampung bayan na raw ang apektado ng pagbaha, pati na ang mga tulay ay inabot na ng pagtaas ng tubig. Gayunman, ayon sa gobernador, ipagpapatuloy nila ang pagbibigay ng cash subsidies sa ilalim ng Social Amelioration Program (SAP) at ng Tulong Panghanapbuhay sa Ating Disadvantaged/ Displaced Workers (TUPAD) program ng Department of Labor and Employment (DOLE) ngayong linggo.

Bagyong Vicky, hanggang sa Linggo pa

ni Thea Janica Teh | December 19, 2020

Magdadala ng malakas na pag-ulan ang Bagyong Vicky sa bansa ngayong weekend habang patuloy nitong binabaybay ang Sulu Sea kasabay ng Tail-End ng Frontal System, ayon sa 5 am Severe Weather Bulletin ng PAGASA ngayong Sabado nang umaga.

Makararanas ng malakas na pag-ulan ang CALABARZON, Bicol Region, Visayas, Aurora, Dinagat Islands, Surigao del Norte, Surigao del Sur, Agusan del Norte, Camiguin, Misamis Oriental, Oriental Mindoro, Marinduque at iba pang parte ng northern at central portion ng Palawan kabilang ang Calamian, Cuyo at Cagayancillo Island.

Mahina hanggang malakas na pag-ulan naman ang mararanasan sa Cagayan Valley, Apayao, Kalinga, Mountain Province, Ifugao, Metro Manila at natitirang bahagi ng Central Luzon, MIMAROPA at Cordillera Administrative Region dahil naman sa northern monsoon o hanging amihan.

Namataan kaninang 4 am ang sentro ng Bagyong Vicky sa 150 kilometers west ng Dipolog City, Zamboanga del Norte na may maximum sustained wind na 45 kilometers per hour (kph) at may bugso ng hangin nang hanggang 55 kph papuntang westward sa 25 kph.

Samantala, nasa Tropical Cyclone Wind Signal (TCWS) No. 1 pa rin ang ilang lugar sa bansa kabilang ang mga sumusunod: Luzon -Northern at central portions ng Palawan (Araceli, Dumaran, Taytay, El Nido, San Vicente, Roxas, Puerto Princesa City, Aborlan, Narra, Quezon) kasama ang Calamian, Cuyo, Cagayancillo at Kalayaan Islands Visayas -Southern portion ng Cebu (Pinamungahan, San Fernando, Carcar, Aloguinsan, Barili, Sibonga, Dumanjug, Ronda, Alcantara, Argao, Moalboal, Badian, Dalaguete, Alegria, Alcoy, Malabuyoc, Boljoon, Ginatilan, Oslob, Samboan, Santander) -Western portion ng Bohol (Loon, Tagbilaran City, Dauis, Panglao, Cortes, Maribojoc) -Siquijor -Negros Oriental -Central at southern portions ng Negros Occidental (San Carlos City, Salvador Benedicto, Talisay City, Bacolod City, Murcia, Bago City, Pulupandan, Valladolid, San Enrique, La Carlota City, La Castellana, Moises Padilla, Pontevedra, Hinigaran, Isabela, Binalbagan, Himamaylan City, Ilog, Kabankalan City, Cauayan, Candoni, Sipalay City, Hinoba-An) -Guimaras -Southern portion ng Iloilo (Barotac Nuevo, Dingle, Anilao, Duenas, Lambunao, Dumangas, Pototan, Zarraga, Mina, Badiangan, Janiuay, Maasin, Cabatuan, New Lucena, Santa Barbara, Leganes, Iloilo City, Pavia, Alimodian, San Miguel, Oton, Leon, Tubungan, Igbaras, Guimbal, Tigbauan, Miagao, San Joaquin) -Southern portion ng Antique (Bugasong, Laua-An, Valderrama, San Remigio, Patnongon, Belison, Sibalom, San Jose, Hamtic, Tobias Fornier, Anini-Y) Mindanao -Misamis Occidental Northern at central portions ng Zamboanga del Norte (Siocon, Baliguian, Gutalac, Kalawit, Labason, Tampilisan, Liloy, Godod, Bacungan, Salug, Sindangan, Siayan, Manukan, Jose Dalman, Sergio Osmena Sr., Pres. Manuel A. Roxas, Katipunan, Dipolog City, Pinan, Mutia, La Libertad, Polanco, Rizal, Sibutad, Dapitan City) -Zamboanga del Sur -Zamboanga Sibugay.

Inaasahan na lalabas na sa Philippine Area of Responsibility (PAR) ang Bagyong Vicky sa darating na Linggo nang hapon o gabi.

Pinaalalahanan ng PAGASA ang publiko lalo na ang mga residenteng naninirahan sa mga lugar na nakapailalim sa signal No. 1 sa posibilidad na pagbaha at landslide dahil sa malakas na pag-ulan.