34 evacuees na infected ng COVID-19 sa Marikina, mino-monitor

ni Ronalyn Seminiano Reonico | November 20, 2020

Nagsagawa ng rapid COVID-19 testing sa evacuation centers para sa mga evacuees sa Marikina City. Ayon kay Mayor Marcelino Teodoro, "Nag-rapid test kami sa iba't ibang evacuation centers.

Sa ngayon, mayroon kaming hinihintay na mga resulta ng PCR then [naging] reactive sila. Una nating sinukat 'yung antibody. Ibig sabihin, tiningnan natin kung reactive sila, kung may infection.

"Mayroon tayong nakitang 34 sa iba't ibang evacuation centers na may infection sila at sumailalim sila kahapon din sa PCR testing, hinihintay natin 'yung resulta.” Noong Huwebes, nagpositibo sa COVID-19 testing ang 68-anyos na evacuee at naka-isolate na.

Samantala, sumasailalim din sa monitoring ang mga residente ng Marikina upang maiwasan ang pagkakaroon ng iba pang sakit. Ipinag-utos na rin ni Teodoro ang pagbili ng mga gamot katulad ng doxycycline capsules bilang paghahanda sa leptospirosis.

Aniya, "Hindi lang COVID, may mga kaso tayo ng cholera, tetanus... marami eh. Ako'y nagpabili ng gamot para sa mga kababayan natin. "May mga doxycyclin tayo na ipinapamigay sa mga health centers, sa mga barangay, sa mga samahan ng komunidad.

Kailangang makainom tayo nito.” Sa kasalukuyan ay patuloy pa ring isinasagawa ang mga clearing operations dahil sa baha na idinulot ng Bagyong Ulysses. Aniya,

"Napakahirap ng kalagayan namin, 'yung hinahakot naming basura 980,000 cubic meters [na] debris. 'Yung street na hinahakutan namin ay 2,452 na kalsada, sabay-sabay na 'yun... 450 kilometers ang haba nito, both major and minor streets.”

Dam, pabubuksan bago bumagyo — Sec. Año

ni Ronalyn Seminiano Reonico | November 15, 2020

Naranasan sa ilang parte ng bansa ang pananalasa ng Bagyong Ulysses at ayon kay Interior Secretary Eduardo Año, nakadagdag sa matinding pagbaha ang pagpapakawala ng tubig ng 6 na dam.

Sa security briefing ni Pangulong Rodrigo Duterte, aniya, "I think we will propose na in times of calamities and typhoon, dapat merong nagkokontrol diyan. Sino, kailan bubuksan ang dam.

"Dapat, before the bagyo, puwede na tayong magbukas lalo na kung meron tayong forecast kung gaano kalaki ‘yung ulan na darating.” Nais din ni Año na ang National Disaster Risk Reduction and Management Council (NDRRMC) ang magdedesisyon kung kailan na maaaring buksan ang mga dam.

Aniya, "I will propose na pag-usapan namin sa NDRRMC na sa times ng calamity o typhoon, ang NDRRMC ang magbibigay ng approval kung kailan puwedeng magbukas, ilang gate, para controlled natin.

"‘Yan ang sinasabi ng ating mga LGUs, katulad sa Region IV, III at NCR na nakadagdag talaga ng pagbaha ang pagbubukas ng dam.”

Roque, nag-videoke, dedma sa mga na-trap sa Cagayan, video kumalat

ni Ronalyn Seminiano Reonico | November 14, 2020

Pinutakti ng kritisismo si Presidential Spokesperson Harry Roque matapos kumalat sa social media ang video kung saan makikitang nagbi-videoke siya habang marami ang nangangailangan ng tulong dahil sa pananalasa ng Bagyong Ulysses.

Ipinost ng isang netizen sa Twitter ang naturang video na may caption na: “THIS WAS TAKEN LAST NIGHT HERE IN BAGUIO. IT GOES TO SHOW THAT THE PEOPLE WHO HAVE THE POWER DOESN’T REALLY CARE ABOUT THEIR FELLOWMEN.”

Biyernes nang gabi umano nang makunan ng video si Roque, kasabay ng pagmamakaawa ng mga residente ng Cagayan at Isabela para maisalba ang kani-kanyang buhay matapos ma-trap dahil sa matinding pagbaha.

Depensa naman ni Roque, “Just when I thought I could unload a little after a hectic week/s, my unremarkable singing as a means of unloading goes public and I get a beating.”

Aniya pa, “Having said this, let us go back to the most pressing matter at the moment, which is providing the much-needed assistance to our distressed brothers and sisters in the aftermath of Typhoon Ulysses. “As I speak, my family and I are preparing/repacking 600 bags of rice for donation in Alcala, Cagayan Valley where my friend and previous law partner and his family reside. Let us unite, help, and be kind to our fellow Filipino.”

Samantala, malaki ang pinsalang naidulot ng pananalasa ng Bagyong Ulysses sa Bicol, Metro Manila, Central Luzon, Cagayan Valley region, atbp. lugar at ayon sa Department of Agriculture, tinatayang aabot sa P1 billion ang agricultural damage.