3,800, stranded sa Visayas at Mindanao; klase at pasok sa gobyerno, suspendido

ni Mary Gutierrez Almirañez | February 22, 2021

Binaha ang labingpito sa 19 na bayan ng Surigao Del Sur dahil sa walang patid na pag-ulan dulot ng Bagyong Auring kahapon, Pebrero 21, kung saan mahigit 8,000 residente ang naapektuhan at halos 126 barangay ang napinsala at maging ang ilang evacuation centers ay pinasok na rin ng tubig.

Ayon pa sa ulat, mahigit 5,000 pamilya ang inilikas mula naman sa coastal areas ng Surigao Del Norte. Sa Agusan Del Norte ay inilikas din ang 60 residente na nakatira sa tabing-ilog.

Samantala, sa Dinagat Islands kung saan nag-landfall ang bagyo ay umabot na sa mahigit 350 pamilya ang na-evacuate. Nakahanda naman ang lokal na pamahalaan ng Eastern Samar sa forced evacuation kung kinakailangan.

Sa Davao Region, mahigit 40 pamilya ang inilikas kabilang ang mga residente mula sa Mawab at New Bataan sa Davao De Oro, pati na rin sa Mati City, Banaybanay at Caraga sa Davao Oriental.

Ayon sa huling datos ng Philippine Coast Guard, mahigit 3,800 indibidwal ang na-stranded mula sa pantalan ng hilagang Mindanao, hilagang silangang Mindanao, silangang Visayas, kanlurang Visayas, gitnang Visayas at Bicol region dahil sa Bagyong Auring.

Kabilang sa mga stranded ay ang mahigit 2,000 pasahero, mga drivers at mga cargo helpers. Nauna nang inanunsiyo ng pamahalaan ang pagkansela sa klase sa lahat ng antas ng paaralan at kawani ng gobyerno sa Tacloban City at Romblon Province.

Suspendido rin ang klase sa lahat ng antas ng paaralan sa Cantillan, Surigao del Sur, Compostela, Davao de Oro at Madridejos, Cebu.

Samantala, nananatili pa rin sa Signal No. 1 ang mga sumusunod: -Sorsogon -Masbate (kabilang ang Ticao at Burias Islands) -Albay -Catanduanes -Silangang bahagi ng Camarines Sur -Northern Samar -Eastern Samar -Samar -Biliran -Leyte -Southern Leyte -Bohol -Cebu -Siquijor -Hilaga at silangang bahagi ng Negros Oriental -Hilaga at gitnang bahagi ng Negros Occidental -Silangang bahagi ng Iloilo -Silangang bahagi ng Capiz -Dinagat Islands -Surigao Del Norte -Hilagang bahagi ng Surigao Del Sur -Agusan Del Norte Sa ngayon ay wala pang naiulat na nasaktan o nasawi dahil sa pananalasa ng Bagyong Auring.

Bahay sa Surigao del Sur, tinangay ng baha

ni Mary Gutierrez Almirañez | February 21, 2021

Inaasahang magla-landfall ang Bagyong Auring sa Dinagat Islands, Eastern Samar, Leyte mamayang gabi, Pebrero 21 o bukas nang madaling-araw, Pebrero 22.

Ayon sa PAGASA, huli itong namataan sa layong 320 kilometro sa silangang bahagi ng Hinatuan, Surigao Del Sur na mayroong taglay na lakas ng hanging aabot sa 65 km per hour.

Nakataas ang Signal No. 2 sa mga sumusunod na lugar:

• Katimugang bahagi ng Eastern Samar

• Dinagat Islands

• Hilagang bahagi ng Surigao Del Norte (kabilang ang Siargao at Bucas Grande Islands)

Signal No. 1 naman sa mga sumusunod pang lugar:

• Sorsogon

• Mainland Masbate

• Ticao Island

• Northern Samar

• Nalalabing bahagi ng Eastern Samar

• Samar

• Biliran

• Leyte

• Southern Leyte

• Cebu

• Bohol

• Siquijor

• Negros Oriental

• Hilaga at gitnang bahagi ng Negros Occidental

• Silangang bahagi ng Iloilo

• Silangang bahagi ng Capiz

• Nalalabing bahagi ng Surigao Del Norte

• Surigao Del Sur

• Agusan Del Norte

• Agusan Del Sur

• Davao Oriental

• Davao De Oro

• Davao Del Norte

• Davao City

• Camiguin

• Misamis Oriental

• Bukidnon

Samantala, isang bahay sa Tandag City, Surigao del Sur ang tinangay ng baha kaninang umaga kung saan hanggang dibdib na ang taas.

"Although hindi pa nag-landfall si Auring, grabe talaga ang pagtaas ng water level dito ngayon," paliwanag pa ni Chief of the Provincial Disaster Risk Reduction and Management Office Abel de Guzman.

Noong Biyernes ay ipinag-utos na ang preemptive evacuation at kahapon ipinatupad ang forced evacuation sa mga coastal area. Mahigit 5,052 pamilya o 18,590 indibidwal ang mga inilikas sa evacuation centers.

30 pamilya sa Davao Oriental, inilikas dahil kay ‘Auring’

ni Mary Gutierrez Almirañez | February 20, 2021

Inilikas ang mahigit tatlumpung pamilya na nakatira sa dalampasigan ng Barangay Cabuaya sa Mati City, Davao Oriental matapos humampas ang naglalakihang alon sa dagat kaninang tanghali, Pebrero 20, dulot ng Bagyong Auring.

Ayon sa Mati City Disaster Risk Reduction and Management Office, pansamantalang tumutuloy ang mga evacuees sa covered court ng kanilang barangay.

Samantala, nananatili pa rin sa ilalim ng Tropical Cyclone Wind Signal (TCWS) No. 1 ang ilang lugar kahit humina na ang severe tropical storm na Auring bilang tropical storm.

Sa 11 AM weather bulletin ng PAGASA, ang mga sumusunod na lugar ay isinailalim sa TCWS No. 1:

• Northern Samar

• Eastern Samar

• Samar

• Biliran

• Leyte

• Southern Leyte

• Cebu

• Negros Oriental

• Bohol

• Siquijor

• Dinagat Islands

• Surigao del Norte

• Surigao del Sur

• Agusan del Norte

• Agusan del Sur

• Davao Oriental

• Davao de Oro

• Davao del Norte

• Davao City

• Camiguin

• Misamis Oriental

• Misamis Occidental

• Lanao del Norte

• Bukidnon

• Lanao del Sur

“Ine-emphasize natin ang preemptive evacuation para maaga pa lang, hindi na nagmamadali ang mga tao... para maobserbahan pa rin ang minimum health standards sa evacuation centers. Ang guidance, nananatiling hindi magsiksikan,” paliwanag pa ni NDRRMC spokesperson Mark Timbal.