May COVID, dumadami.. Face mask, balik uli

ni Mai Ancheta | May 16, 2023

Ibinalik ang mandatory na paggamit ng face mask sa Baguio City partikular sa mga establisimyento at mga matataong lugar.

Layon nito na makaiwas ang mamamayan ng Baguio City sa peligro ng COVID-19 dahil sa tumataas na naman na kaso ng mga tinatamaan ng virus.

Ayon kay Baguio City Mayor Benjamin Magalong, ang paggamit uli ng face mask ay upang mahadlangan ang pagkalat muli ng COVID-19 at mapababa ang kaso ng mga nagkakasakit.

"Karamihan ng mga cases natin are mild and this is one way of mitigating and at the same time hopefully we will able to reduce the number of cases," ani Magalong.

Wala aniyang dapat ikaalarma dahil mababa ang bilang ng mga naoospital at hindi naman matindi ang pagtama ng virus sa mamamayan.

Kasabay nito, nilinaw ng alkalde na hindi kinokontrol ng city government ang galaw ng mga tao, pati na ng mga turistang umaakyat sa Baguio City, bagkus ay nais lamang makasiguro ng kaligtasan sa kanilang mamamayan.

Pinayuhan din ni Magalong ang publiko na iwasan na muna ang pakikipagkamay upang makaiwas sa virus at sa halip ay gamitin na lamang ang fist bump at elbow bump para sa kanilang kaligtasan.

"Hindi naman natin kinokontrol ang movement ng tao, i-avoid na lang muna natin 'yung handshake, gamitin na lang natin 'yung fist bump at elbow bump," dagdag ni Magalong.

Dahil panahon pa rin ng summer vacation, maraming mga lokal na turista ang umaakyat sa Baguio City para mamasyal at mag-relax sa lungsod.

Baguio Public Market nasunog, P24M tupok

ni V. Reyes | March 13, 2023

Tinatayang nasa P24 milyon ang halaga ng naging pinsala ng sunog na tumupok sa bahagi ng Baguio City Public Market, Sabado ng gabi.

Ayon sa Baguio City Public Information Office, bandang alas-11 ng gabi nang sumiklab ang sunog habang alas-4:38 ng Linggo ng madaling-araw nang tuluyang maapula.

Nabatid naman mula kay Baguio City Fire Marshal Supt. Marisol Odiver na nagsimula ang apoy sa Block 4 ng nasabing palengke na ikinatupok ng lahat ng paninda sa bloke na ito at nadamay din ang malaking bahagi ng Block 3 at Caldero section.

Patuloy pang sinisiyasat ang dahilan ng sunog habang wala namang napaulat na nasugatan o nasawi sa insidente.

Sinabi ni City Market Superintendent Ceasar Emilio na mananatiling bukas ang palengke maliban sa mga bahagi na nasunog.

Tiniyak din nito na mamadaliin ang relokasyon ng mga apektadong nagtitinda upang makabalik agad sa operasyon.

Baguio City, muling maghihigpit sa pagtanggap ng mga turista

ni Jasmin Joy Evangelista | January 3, 2022

Muling maghihigpit ang Baguio City sa pagtanggap ng mga turista dahil sa tumataas na kaso ng COVID-19 sa bansa.

Ang tatanggapin lang ng lungsod ay mga bisita na nauna nang nakakuha ng QR-coded Tourist Pass o QTP.

Ayon sa Baguio Public Information Office, hindi na nila aaprubahan ang mga bagong leisure travel requests sa Baguio Visita website. Ibig sabihin, hindi muna makakaakyat sa lungaod ang mga turista na nagpaplano pa lang o nagbabalak pa lang na bumisita sa Baguio ngayong Enero

Ang mga pre-approved travel na may QTP lang ang maaaring pumasok sa Baguio at lahat ng pending requests ay considered rejected na o ‘di na aprupado. 

Ang mga Authorized Person Outside of Residence (APOR) naman ay papayagang pumasok sa Baguio kabilang ang mga official trips basta't mag-register pa rin online sa Baguio website. 

Matatandaang noong December 26 ay 4 lang ang active cases sa Baguio, pero matapos ang isang linggo lang ay tumaas ito sa 73 active cases kahapon.