Distribusyon ng ayuda, by appointment na

ni V. Reyes | February 26, 2023

Idaraan na sa QR code appointment system ang pamamahagi ng ayuda ng gobyerno sa mga benepisyaryo nito.

Ayon kay Gatchalian, sa ganitong sistema ay magiging maayos ang distribusyon ng tulong.

“Kung 700 ‘yung kaya naman i-process. Ibibigay namin ang QR stubs for 700. Kapag naubos ‘yung 700 at may nakapila pa, we’ll do another 700 for the following day,” ayon sa DSWD chief.

“Kapag pumila, sisiguraduhin dapat may dokumento at ID dahil sila lang ang mabibigyan ng QR code,” dagdag nito.

Sinabi pa ni Gatchalian na nakakasa na ring magbukas pa ng karagdagang payout outlets sa Metro Manila sa mga susunod na linggo.

“Maglalagay tayo ng [payout outlet] for CAMANAVA, sa Monumento. Maglalagay tayo sa Pasig or Marikina para sa east. Maglalagay tayo sa Taguig para sa south. Magdadagdag pa tayo ng isang opening sa SM North. Maglalagay din tayo sa San Jose del Monte [Bulacan],” pahayag nito.

“Kaya kami magbubukas ng payout outlets, in the future, magkakaroon na tayo ng territorial na approach. Kapag taga-CAMANAVA, ‘wag na sila magpunta sa malayo, doon na sila sa Monumento [na payout outlet]. Kung ano ang address mo, doon ka na magpunta,” paliwanag pa ni Gatchalian.

Sa ilalim ng AICS program ng DSWD... Mahigit 1K drivers sa Davao, tumanggap ng P3K ayuda

ni Zel Fernandez | May 8, 2022

Mahigit 1,000 public utility vehicle (PUV) drivers ang muling napagkalooban ng ayuda ng Department of Social Welfare and Development (DSWD) Field Office XI at City Social Welfare and Development Office (CSWDO) sa Davao City.

Tinatayang aabot sa 1,300 PUJ at taxi drivers ang tumanggap ng tig-P3,000 sa ilalim ng programa ng DSWD na Assistance to Individual in Crisis (AICS).

Ayon kay Mae Aquino, focal person ng Community Welfare Program ng CSWDO, ito na umano ang ikalawang payout ng mga PUV drivers sa Davao City na lubos na naapektuhan ng pagtaas ng presyo ng mga produktong petrolyo.

Paliwanag ni Aquino, idinaraan sa validation ng mga social workers ng mga barangay ang pagpili sa mga benepisyaryo ng naturang programa upang matiyak na karapat-dapat silang mapabilang sa listahan ng DSWD na mapagkalooban ng ayuda.

Dagdag pa ng focal person, patuloy pa rin aniya ang pagsasagawa ng pre-listing sa mga eligible PUV drivers sa lahat ng barangay sa lungsod ng Davao, kung saan nasa mahigit 3,000 pa lamang aniya ang nakapagpasa ng kanilang mga requirements.

Samantala, target ng AICS program sa Davao City na mabigyan ng tulong-pinansiyal ang halos 8,000 mga PUJ at taxi drivers sa lungsod.

Pamamahagi ng P200 monthly ayuda start na ngayong buwan — Palasyo

ni Jasmin Joy Evangelista | March 17, 2022

Ang mga benepisyaryo ng P200 monthly ayuda mula sa gobyerno ay puwede nang makakuha simula ngayong buwan, ayon sa Malacañang ngayong Huwebes.

Sa isang interview, sinabi ni acting presidential spokesperson Martin Andanar na ang mga benepisyaryo ay ang mga nakakatanggap ng subsidiya sa gobyerno sa ilalim ng Pantawid Pamilyang Pilipino Program o 4Ps.

"That's about 12 million individuals," aniya.

Sa ilalim ng 4Ps program, ang isang household ay maaaring makatanggap ng P1,400 hanggang P3,000 kada buwan bilang health at education grants depende sa bilang ng anak at nakadepende kung pasok sa mga kondisyon ng gobyerno.

Ang monthly P200 subsidy — na ibibigay bilang "unconditional" cash transfer, ayon kay Andanar — ay ipamamahagi sa buong taon.

"Ito pa ay on top of the 4Ps na ibibigay doon sa ating beneficiaries ng Pantawid Pamilyang Pilipino Program," ani Andanar.

Nang tanungin kung kailan sisimulan ang distribusyon, sinabi ni Andanar, "Once na ma-download yung pera na nagkakahalaga ng P33 billion ay ibibigay na po talaga at ang target po ay this month masimulan na."

Kahapon, Miyerkules, nnaprubahan ni Pangulong Rodrigo Duterte ang pagbibigay ng P200 monthly allowance o ayuda sa buong taon para sa mga mahihirap na pamilya sa bansa dahil sa patuloy na pagtaas ng presyo ng petrolyo dahil sa giyera sa pagitan ng Ukraine at Russia.