P20K ayuda sa kada pamilya ng child laborer — DOLE

ni BRT | July 3, 2023

Sa paggunita ng World Day Against Child Labor, namahagi ang Department of Labor and Employment ng livelihood starter kit sa mga pamilya ng child laborer sa Nueva Ecija.

Ayon kay DOLE Nueva Ecija Chief Labor and Employment Officer Maylene Evangelista, pauna pa lamang ito na pagkakaloob ng mga sari-sari store package sa halos 100 target na benepisyaryo sa lalawigan.

Ang nasabing livelihood package ay nagkakahalaga ng P20,000 para sa isang pamilya.

Ayon sa DOLE, layon ng gobyerno na makatulong para mabago ang antas ng pamumuhay ng mga benepisyaryo at matapos na ang maagang paghahanapuhay ng mga menor-de-edad at kanilang masulit at maranasan ang masayang pagkabata.

Magbibigay din umano ang kagawaran ng mga gamit sa eskwela at mga grocery package katuwang ang mga lokal na pamahalaan.

Nagsasagawa rin ang ahensya ng mga talakayan hinggil sa Child Labor.

Gusto trabaho.. Mga Pinoy, ayaw umasa sa ayuda — P-BBM

ni Mylene Alfonso | June 19, 2023

Tinatrabaho na ng administrasyon ni Pangulong Ferdinand Marcos, Jr., na magbigay ng mga livelihood packages para sa mga marginalized dahil mas gusto ng mga Pilipino na magtrabaho para sa kanilang mga pamilya sa halip na humingi ng ayuda mula sa gobyerno.

Sa kanyang vlog, sinabi ni Marcos na ang mga cash grant na ipinamahagi sa mga mahihirap na lugar ay dinagdagan ng livelihood packages.

"Nakikita natin sa panahon ng kahirapan, ang ugali ng Pilipino ayaw nilang umaasa at basta nag-aantay na lang ng ayuda, basta’t nag-aantay na lang,” pahayag ni Marcos.

“Ang Pilipino, nasa ugali talaga natin na masipag tayo. Mas maganda para sa bawat Pilipino na sila ay nagtatrabaho, na mayroon silang aasahang kikitain at nang mayroon silang pag-asa na gumanda pa ang kanilang mga hanap-buhay,” saad ng Pangulo.

"Mas gusto nila na magtrabaho kaysa umasa na lang sa ayuda,” wika pa niya.

Nabatid na matagal nang namamahagi ang gobyerno ng mga farm machineries mula sa Department of Agriculture, mga scholarship mula sa Technical Education and Skills Development Authority (TESDA) at mga livelihood package mula sa Department of Trade and Industry, ayon kay Marcos.

"Lahat ng ito sa isang lugar lang namin inilagay nang sa gayon ay mas madali para sa ating mga kababayan," punto ni Marcos.

“Ito ay hindi lang mga ayuda na salapi kundi ayuda ng pagkakataon para sa mga mamamayang Pilipino nang mabigyan sila ng pagkakataon na makapaghanapbuhay at hindi lang umaasa na tumatanggap ng biyaya,” dagdag pa ng Punong Ehekutibo.

P1K ayuda sa non-stop taas-presyo

ni Mylene Alfonso | February 26, 2023

Plano ng administrasyong Marcos na maglunsad ng panibagong round ng cash aid sa ilalim ng Targeted Cash Transfer (TCT) program upang makatulong sa pagpapagaan ng pasanin sa gitna ng inflation o patuloy na pagtaas ng presyo ng mga bilihin.

Nabatid na nasa 9.3 milyong “poorest of the poor” ang makatatanggap ng P1,000 na hahatiin sa loob ng dalawang buwan.

“Right now, we’re considering the two-month subsidy for consumers,” saad ni Finance Secretary Benjamin Diokno sa sidelines ng 2023 Annual Reception for the Banking Community, nitong Biyernes.

Ayon kay Diokno, ilulunsad sa lalong madaling panahon ang TCT program sa sandaling matukoy na ng gobyerno ang pagkukuhanan ng pondo.

Sa ngayon aniya, hinihintay pa nila ang Palasyo na mag-anunsyo kaugnay sa naturang programa.

“We’re just waiting for the announcement from the Palace,” ayon sa kalihim. Ang kabuuang budget para sa cash aid ay nasa P9.3 bilyon kasama ang 5% administration cost nito.