Cash aid at public transport sa ECQ, ‘di pa sure — Roque

ni Lolet Abania | July 30, 2021

Maglalabas pa lamang ang Malacañang ng guidelines hinggil sa cash aid at public transportation sa Metro Manila kaugnay ng muling pagsasailalim nito sa pinakamahigpit na quarantine protocol sa loob ng dalawang linggo ng Agosto sa gitna ng panganib ng Delta COVID-19 variant.

Ang Metro Manila ay isasailalim sa enhanced community quarantine mula Agosto 6 hanggang 20 na sa nasabing protocol, essential trips at services lamang ang pinapayagan.

“We expect to grant the same amount of cash aid earlier given to Iloilo province, Iloilo City and Gingoog City, and I have talked to Budget Secretary Wendel Avisado and he told me, hahanapan at hahanapan ng paraan,” ani Presidential Spokesperson Harry Roque sa isang interview.

Tinukoy ni Roque ang mga lugar na nasa ilalim ng ECQ mula Hulyo 16 hanggang Agosto 7, na ang tugon aniya ng gobyerno mula sa kasalukuyang polisiya ay magbibigay ng cash aid sa mga mahihirap na pamilya sa ECQ areas.

Nasa P1,000 kada tao o maximum na P4,000 cash aid kada pamilya ang ayuda na inaprubahan nitong Hulyo 29.

“The President will not allow an ECQ implementation na walang ayuda ang mamamayan,” sabi ni Roque.

Matatandaang nang unang ipinatupad ang ECQ sa NCR noong Marso 16 hanggang May 14, 2020, ang mga public transportation ay ipinagbabawal.

Nang ang NCR ay muling isailalim sa ECQ mula Marso 29 hanggang Abril 11, 2021, ang mga empleyado ng essential at non-essential sectors ay pinayagang pisikal na mag-report sa trabaho at naglaan ng public transportation subalit limitado lamang.

Sa ngayon, hindi masabi ni Roque kung papayagan pa rin ang pampublikong transportasyon kapag sumailalim muli sa ECQ.

“We will let the Transportation department decide on this, may panahon pa naman,” wika ng kalihim.

Ayuda sa NCR Plus, hanggang May 15 pa — DILG

ni Ronalyn Seminiano Reonico | April 20, 2021

Pinalawig ang distribusyon ng cash aid o ayuda sa NCR Plus hanggang sa Mayo 15, ayon sa Department of the Interior and Local Government (DILG).

Noong March 29 hanggang April 11, isinailalim sa enhanced community quarantine (ECQ) ang NCR Plus na binubuo ng Metro Manila, Bulacan, Cavite, Laguna at Rizal at 15 araw ang orihinal na target upang maipamahagi ang mga ayuda kung saan hanggang 4 na miyembro ng pamilya ang maaaring tumanggap ng P1,000 cash aid bawat isa.

Ayon naman kay DILG Spokesperson Undersecretary Jonathan Malaya, hindi na muling ie-extend pa ang distribusyon ng mga ayuda.

Inaprubahan nina Interior Secretary Eduardo Año, Social Welfare and Development Secretary Rolando Bautista at Defense Secretary Delfin Lorenzana ang pagpapalawig nito sa isinagawang pagpupulong kasama ang lahat ng NCR mayors at si Metropolitan Manila Development Authority Chairperson Benhur Abalos noong Linggo.

Saad ni Malaya, “It is very challenging to do distribution during a pandemic. Our LGUs cannot go full blast given the grave threat of COVID-19 so their request for more time is justified.”

Samantala, ayon sa DILG, ang top 5 LGUs na may highest distribution rate sa NCR ay ang Mandaluyong City na may 74.32% (P270.9 million), San Juan City na may 63.78% (P98.42 million), Caloocan City na may 63.46% (P848 million), Manila na may 60% (P915.7 million) at Quezon City na may 59.77% (P1.483 billion).

Pamimigay ng P1-K ayuda, start na

ni Mary Gutierrez Almirañez | April 7, 2021

Sinimulan nang i-distribute ang P1,000 na cash assistance sa mga indibidwal na naapektuhan ng ipinatupad na enhanced community quarantine (ECQ) sa NCR Plus, batay sa Department of Social Welfare and Development (DSWD) ngayong araw, Abril 7.

Ayon kay DSWD Spokesperson Irene Dumlao, "We have full trust on our local chief executives, on our local government units that they would be able to distribute the assistance to their constituents within the prescribed period."

Kabilang ang Maynila, Parañaque at Caloocan sa mga nagsimulang mamahagi ng ayuda sa nasasakupang barangay.

Paliwanag pa ni Dumlao, nu’ng nakaraang linggo pa nila hiningi sa bawat local government unit (LGU) ang listahan ng mga benepisyaryo.

Aniya, "This serves as a reference to the local government units. They still have the full discretion in identifying who will be identified and prioritized, provided of course they would follow adhere to the provisions of the guidelines where it was stipulated that priority will be given to low-income sector, including of course the beneficiaries of SAP."

Tinatayang 15 araw ang ibinigay na palugit ng Department of Budget and Management (DBM) sa bawat LGU upang ipamahagi ang cash na ayuda at 30 days naman kung in-kind goods ang ipamimigay.