Batas ukol sa money muling activities

ni Atty. Persida Rueda-Acosta @Magtanong Kay Attorney | Nov. 22, 2024

Dear Chief Acosta,

Nabalitaan ko na may bagong batas patungkol sa tinatawag na ‘money muling activities.’  Ako ay isang kahera sa isang kumpanya at ako ay karaniwang kumokolekta ng pera mula sa iba’t ibang branch na dinadala sa aming punong tanggapan. Nais kong malaman kung ang ginagawa ko ay sakop ng nasabing batas at kung ako ay gumagawa ng krimen. – Rutherford

Dear Rutherford,

Ang sagot sa iyong katanungan ay matatagpuan sa Republic Act (R.A.) No. 12010, o mas kilala bilang Anti-Financial Account Scamming Act (AFASA). Ayon sa Section 4 (a) ng nasabing batas, ang money muling activities ay tumutukoy sa:

“(a) Money Muling Activities. – A person performing any of the following acts for the purpose of obtaining, receiving, depositing, transferring, or withdrawing proceeds that are known to be derived from crimes, offenses, or social engineering schemes shall be considered a money mule:

1. Using, borrowing or allowing the use of a Financial Account;

2. Opening a Financial Account under a fictitious name or using the identity or identification documents of another;

3. Buying or renting a Financial Account;

4. Selling or lending a Financial Account; or

5. Recruiting, enlisting, contracting, hiring, utilizing or inducing and person to perform  the acts mentioned in items 1 to 4 of this subsection.”

Malinaw sa nasabing probisyon na hindi lahat ng uri ng paghawak ng pera para sa ibang tao ay matatawag na money muling activity. Una, para makonsiderang money muling activity, ang pagkuha, pagtanggap, pagdeposito, paglipat, o paglabas ng pera ay dapat nagmumula sa mga ilegal na gawain, isang krimen o social engineering scheme. Gayundin, inilatag ng batas ang mga partikular na aktibidad na maaaring makonsiderang money muling activity gaya ng paggamit o pagpapahiram ng iyong pinansyal na account, pagbubukas ng isang pinansyal na account sa ilalim ng isang gawa-gawang pangalan, pagbebenta o panghihiram ng pinansyal na account ng ibang tao, at iba pa.

Kaya naman hindi lahat ng uri ng paghawak ng pera para sa ibang tao, tulad ng ginagawa mo sa kumpanyang iyong pinapasukan, ay maituturing na money muling activity na isang krimen sa ilalim ng nabanggit na batas. Ang pangunahing layunin ng batas na ito ay upang maiwasan ang paglaganap ng mga financial scams sa pamamagitan ng mga social engineering schemes.  Karaniwan ay naililipat-lipat ang halagang na-scam dahil ang mga ginagamit na pinansyal na account ay hindi nasa ilalim ng pangalan ng totoong scammer. Bagkus, ito ay karaniwang nasa ilalim ng gawa-gawang pangalan o nabili mula sa ibang tao. Dahil dito, nilagyan ng nasabing batas ng depinisyon ang money muling activities upang ito ay iwasan ng mga tao.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Exemption ng electric vehicles sa number coding scheme

ni Atty. Persida Rueda-Acosta @Magtanong Kay Attorney | Nov. 21, 2024

Dear Chief Acosta,

Nabalitaan ko na ang mga electric vehicle (EV) ay may exemption mula sa pagsunod sa number coding na ipinapatupad ng Metropolitan Manila Development Authority (MMDA) sa mga lansangan. Ano ang legal na basehan ng exemption na ito? — Jared

---

Dear Jared, 

Ang sagot sa iyong katanungan ay matatagpuan sa Section 25 (a), Chapter IV ng Republic Act (R.A.)  No. 11697, o ang “Electric Vehicle Industry Development Act (EVIDA Law),” na naglalahad ng iba’t ibang insentibo para sa mga gumagamit ng electric vehicle, gaya ng:

“Section 25. Non-Fiscal Incentives. - The following non-fiscal incentives shall remain in force for eight (8) years from the effectivity of this Act:

(a) For EV users:

(1) Priority registration and renewal of registration, and issuance of a special type of vehicle plate by LTO;

(2) Exemption from the mandatory unified vehicular volume reduction program, number-coding scheme, or other similar schemes implemented by the Metropolitan Manila Development Authority, other similar agencies, and LGUs;

(3) Expeditious processing by the LTFRB of applications for franchise to operate, including its renewal, for PUV operators that are exclusively utilizing EVs; and

(4) Availment of TESDA Training Programs on EV assembly, use, maintenance, and repair for its employees;” 

Sang-ayon sa nabanggit na batas, isa sa mga insentibong ibinahagi sa mga nagmamay-ari ng electric vehicle ay ang exemption sa number coding scheme na kasalukuyang ipinatutupad ng MMDA. Kaya ang bawat may-ari ng electric vehicle ay maaaring makampante na malaya na silang makakapagmaneho kahit na anong araw.

Para sa kaalaman ng lahat, ang tinukoy ng Section 4(k) ng EVIDA Law ay isang electric vehicle bilang, “a vehicle with at least one (1) electric drive for vehicle propulsion. For purposes of this Act, it includes a BEV, hybrid-electric vehicle, light electric vehicle, and a plug-in hybrid-electric vehicle.”

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Parusa sa doktor na iskolar na bigong tapusin ang mandatory return service

ni Atty. Persida Rueda-Acosta @Magtanong Kay Attorney | Nov. 20, 2024

Dear Chief Acosta,

Nakatapos ako ng medisina at naging isang ganap na doktor dahil sa “Doktor Para sa Bayan Scholarship Program.” Ako ay kasalukuyang nakatalaga sa isang liblib na munisipalidad bilang bahagi ng aking return service. Kamakailan ay nabigyan ako ng oportunidad para makapag-aral ng libre sa ibang bansa. Gayunpaman, kung tatanggapin ko ito, hindi ko matatapos ang aking return service. Mayroon bang anumang legal na implikasyon kung aking tatanggapin ang scholarship sa ibang bansa? Nais ko sanang maliwanagan. Maraming salamat. — Pete Albert

---

Dear Pete Albert,

Para sa layunin na makapagbigay ng wasto at mahusay na pangangalaga sa kalusugan ng mga mamamayan, lumikha ang ating pamahalaan ng programa na nagtatatag ng isang scholarship program at return service kung saan mabibigyan ng pagkakataon ang mga kapus-palad at walang pinansyal na kakayahan na makapag-aral ng medisina.

Ang Republic Act (R.A.) No. 11509, o mas kilala bilang “Doctor Para sa Bayan Act”, ay nagtatag ng medical scholarship at return service programs upang mapag-aral ng libre ang mga kuwalipikadong iskolar ng kursong medisina at makapagbigay sila ng serbisyo sa ating mga mahihirap na kababayan. 

Ang mga nakatanggap ng scholarship na ito ay inaatasan ng batas na magbalik ng serbisyo sa gobyerno. Sa madaling salita, matapos maipasa ang Physician Licensure Examinations, ang isang iskolar ay inaatasan na magtrabaho sa gobyerno. Gayunpaman, ang batas ay nagtatakda ng ilang pamantayan para sa mga hindi makatatapos ng return service. Sa ilalim ng Seksyon 9 ng nasabing batas:

“Section 9. Sanctions. - A physician who has availed of the MSRS Program but fails or refuses to comply with the mandatory return service and integration provided under this Act shall be required to pay two (2) times the full cost of scholarship, including other benefits and expenses incurred by reason of participation in the MSRS Program.

In case of nonpayment, as provided in the preceding paragraph, the PRC shall deny the renewal of the physician’s license: Provided, That the above mentioned penalties shall not apply to physicians who fail to comply with the required return service on account, or by reason of, severe or serious illness.”

Base sa nakasaad na probisyon ng batas, ang isang doktor, na naging iskolar sa ilalim ng programa ng Republic Act No. 11509, na nabigo o tumatangging sumunod sa mandatory return service o pagbabalik ng serbisyo ay kailangang magbayad ng dalawang beses ng buong halaga ng scholarship na kanyang natanggap. Kabilang dito ang iba pang mga benepisyo at gastos na natamo bilang isang iskolar ng gobyerno.

Upang sagutin ang iyong katanungan, ikaw ay maaaring pagbayarin ng dalawang beses ng kabuuang halaga ng benepisyong natanggap mo sa iyong scholarship kung sakaling mapatunayang ikaw ay nabigo sa pagkumpleto ng iyong return service. Kung sakaling hindi mo mabayaran ang nasabing halaga, maaaring hindi i-renew ng Professional Regulation Commission ang iyong lisensya bilang doktor. 

Tandaan lamang na ang nabanggit na parusa ay hindi naaangkop sa mga doktor na nabigong sumunod sa kinakailangang return service dahil sa malubhang karamdaman.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.