Back-to-back titles kay De Luna; Jiu-jitsu, naghihintay ng vaccine

ni ATD - @Sports | April 7, 2021

Patuloy ang pamamayani ni Pinoy cue artist Jeff De Luna matapos sargohin ang back-to-back titles sa katatapos na 2nd Leg ng Sunshine State Predator Pro Am Tour na ginanap sa Boulevard Billiards sa Ocala, Florida.

Kilala sa bansag na "The Bull" sa Philippine Billiards dahil sa lakas nitong sumargo, nakopo nito ang pangalawang titulo ngayong 2021. Nakalaban muli ni De Luna sa championship round si Anthony Meglino at sa pangalawang pagkakataon ay ginapi niya ito sa bisa ng 9-4 iskor.

Bago nakalaban sa finals ay inilaglag ni De Luna si Meglino sa loser's bracket nang magkalaban sila sa semifinals.

Diretso sa championship round si de Luna habang gumapang sa loser's bracket si Meglino para sumampa sa finals. Kinubra ni De Luna ang $1,100 premyo habang nagkasya sa $710 runner-up purse si Meglino. Una silang nagharap sa finals sa first Leg noong Pebrero at nasilo ng Pinoy ang titulo nang hindi nakatikim ng pagkatalo.

Samantala, gigil nang mag-ensayo si 2019 Southeast Asian Games gold medalist

Margarita Ochoa para mapaghandaan ang mga sasalihang tournaments ngayong taon.

Hindi maawat ang pamiminsala ng coronavirus (COVID-19) kaya naman nasasalto ang mga trainings ng national jiu jitsu artist. “I think makakabalik naman it’s just a question of when," saad ni Ochoa. "Hindi natin alam kung kailan pero ang sport namin is very flexible, nag-a-adjust iyan sa mga sitwasyon,”

Kasama ang jiu jitsu sa sports events na lalaruin sa 2021 SEA Games na gaganapin sa Hanoi, Vietnam sa Nobyembre 21 hanggang Disyembre 2. Umaasa si Ochoa na mabibigyan din ang mga national athletes ng vaccines para sa COVID-19.

Balak ng Jiu jitsu Federation of the Philippines (JFP) na ipasok ang kanilang mga atleta sa isang ‘bubble’ training.

Samantala, sumikwat si Ochoa ng gintong medalya sa women’s under-45kg division sa 2019 SEAG na ginanap sa Pilipinas.

Tutok pa rin sa pag-e-ensayo si Sotto para sa pangarap na NBA

ni ATD - @Sports | March 24, 2021

Walang ibang ninanais si Pinoy cager Kai Sotto sa ngayon ay ang maabot ang pangarap na makapaglaro sa NBA.

Kaya naman patuloy ang pagsasanay at pagpapalakas nito ng katawan, kahit hindi nakalaro sa nakalipas na NBA G League season ay hindi nawawala ang kanyang determinasyon.

Makikita sa social media nitong Lunes na katuwang ng 7-foot-3 big man sa training ang trainer nina NBA stalwarts Andre Drummond, Trevor Ariza at iba pa na si Stanley Remy. "Potential is only potential if you work hard to make it a reality. Great work this weekend @kzsotto, the sky is truly the limit," caption ni Remy sa isang larawan na kanyang pinost sa Instagram kasama si Sotto.

Mababasa rin sa post ng East West Private ang isang imahe kung saan ka-video call ni Sotto si Drummond ng Cleveland Cavaliers.

Samantala, hindi muna babalik sa bansa si Sotto para sa Gilas Pilipinas training bubble sa Calamba, Laguna upang pagtuunan ang kanyang training sa Amerika.

'Bata' Reyes, sinamahan lang niya ang fans sa brgy. hall

ni ATD - @Sports | March 16, 2021

Nilinaw ni Billiards legend Efren "Bata" Reyes na hindi siya inaresto ng mga pulis San Pedro, Laguna matapos makitang naglalaro siya sa isang exhibition game amid sa gitna ng pandemyang dulot ng coronavirus (COVID-19).

Sa panayam ng “24 Oras Weekend,” kay 66-year-old Reyes, sinabi ng billiards icon na sinamahan lamang niya ang mga nanonood na dinala sa Barangay Hall para magpaliwanag sa barangay officials.

Ayon pa kay Pinoy Billiards icon, pinagalitan ng mga awtoridad ang mga tao sa nasabing exhibition match dahil hindi sumunod at lumalabag ang mga ito, pati na rin ang may-ari ng bilyaran, sa health protocols.

Ikinuwento pa ni Reyes na walang permit ang nasabing bilyaran kaya sinita ang mga ito kasama ang may-ari at pinapunta sa barangay, pagkatapos masermunan ay pinauwi na rin ang mga dinalang mga tagahanga ng Billiards champion. "Kaya naman dinala 'yung mga gamit dahil wala daw permit, tinanong kung may permit yung bilyaran, wala palang permit. At hindi rin natimbre," pahayag ni former World Champion, Reyes.

Sinabi rin ni former WPA Eight at Nine Ball Champion, Reyes na hindi sapilitan ang pagdala sa kanya sa Barangay. "Binulungan ako ng pulis, sabi ganon 'idol baka puwede kang pumunta, samahan sila para suporta sa mga tao, eh alam mo naman ikaw naman ang naglalaro rito, sumama ako siyempre para suportahan ang mga tagahanga ko ang mga 'yon eh," saad ni Reyes. Nagpasalamat naman si Reyes sa kanyang mga tagahanga na patuloy siyang sinusuportahan.