Super LPG at Tropang Giga magtutuos na sa Semifinals

ni ATD - @Sports | November 16, 2020

Nakatakdang magharap sa semifinals ang No. 2 seed Phoenix FuelMasters at No. 3 TNT Tropang Giga matapos dispatsahin ang kanilang nakatunggali sa quarterfinals ng Philippine Cup noong Sabado ng gabi sa AUF Sports gym sa Clark, Pampanga.

Hindi na binigyan ng Phoenix at TNT ang kanilang nakaharap na makahirit ng do-or-die game kaya naayos ang kanilang semifinals match.

Parehong may tangan na twice-to-beat advantage, pinatalsik ng Tropang Giga at FuelMasters ang Alaska Aces at Magnolia Hotshots ayon sa pagkakasunod.

Unang sumampa ang Tropang Giga, tinambakan nila ang Aces, 104-83 matapos silang pamunuan ni RR Pogoy sa opensa na nagtala ng 34 points.

Ayon kay TNT head coach Bong Ravena ay depensa ang naging susi ng madali nilang pagsampa sa semis. "It's all about defense. As much as possible, we don't want to break down on defense. We have to rotate especially on the weak side. We managed to do what we wanted to do. It's tough but we pulled through," saad ni Ravena.

Sa panig ng Phoenix, dumaan sila sa butas ng karayom bago tinapos ang Pambansang Manok Magnolia.

Isinalpak ni Matthew Wright ang panelyong tres upang ilista ang manipis na 89-88 panalo sa pangalawang laro.

Tumikada si Wright ng 32 puntos para sa FuelMasters. "It's just so magical for us," tanging nasabi ni Phoenix mentor Topex Robinson.

Samantala, semifinals na kaya lalong hinigpitan ang pagpapatupad ng health protocols sa PBA bubble upang hindi makapitan ng coronavirus, (COVID-19).

Kapansin-pansin na rin na kahit ang mga players na nasa bench ay may suot na face mask habang nakikinig sa instruction ng kanilang coach kaya naman inaasahang hindi na makakapaminsala ang COVID-19 na siyang nagpapahirap sa buong mundo.

At para mas lalong ligtas ang players, coach at staffs sa loob ng bubble ay pinauuwi na rin ang mga teams na laglag na sa kompetisyon upang mas lalong hindi makaporma ang COVID-19.

Q'finals, magsipagpustahan na!... Gin Kings vs. Elasto Painters

ni ATD - @Sports | November 13, 2020

Kalmado na sa loob ng PBA bubble, hindi na gumagambala ang pandemyang coronavirus (COVID-19) kaya nairaos ang elimination round ng Philippine Cup.

Simula na ang quarterfinals at tiyak na mas magiging dikdiakan ang mga labanan.

Pakay ng top seed Barangay Ginebra Gin Kings at No. 4 San Miguel Beer na tapusin ang kanilang kalaban upang dumiretso na sa semifinals.

Parehong tangan ng sister team Gin Kings at Beermen ang twice-to-beat advantage kaya isang beses lang nila tatalunin ang kanilang katunggali.

Makakalaban ng San Miguel Beer, (7-4) ang No. 5 Meralco Bolts, (7-4) sa alas-4 ng hapon habang katapat ng crowd favorite Barangay Ginebra, (8-3) ang Rain or Shine Elasto Painters, (6-5) sa ala-6:45 ng gabi na ilalaro pareho sa AUF Sports gym sa Clark, Pampanga.

Nakahabol sa incentives ang Beermen matapos manalo sa kanilang huling laro kontra NorthPort batang Pier, 120-99.

Kinapitan ng Beermen sina Moala Tautuaa, Arwind Santos at Marcio Lassiter para makuha ang importanteng panalo kaya inaasahang sila pa rin ang sasandalan ng San Miguel Beer laban sa mabangis na Bolts.

Tiyak naman na mapapalaban ang SMB lalo na't pinaghandaan na sila ng tropa ni head coach Norman Black.

"You have to win two games to make it to the semis, that's what it comes down to. Hopefully if you can get that first win, you put a little pressure on the team that has the twice-to-win advantage," hayag ni Black.

Sa panig ng Gin Kings, huhugot ng lakas si coach Tim Cone kina Stanley Pringle, Japeth Aguilar at LA Tenorio upang mapabilis ang pagsampa sa semis.

Samantala, para lalong hindi makaporma ang COVID-19 ay patuloy na ipatutupad ang health protocols sa loob ng bubble.

Ang ibang teams na nakapasok sa magic eight ay ang No. 2 Phoenix FuelMasters, (8-3), No. 3 TNT Tropang Giga, (7-4), No. 6 Alaska Aces, (7-4) at No. 7 Magnolia Hotshots, (7-4).

Start na uli ang PBA, 8 teams ang lalarga

ni ATD - @Sports | November 3, 2020

Balik ang aksiyon sa PBA bubble ngayong araw matapos ihinto ang laban noong Biyernes ang lahat ng mga larong naka-iskedyul.

Dahilan ng pagkansela ay upang masiguro ang kaligtasan ng mga players, coaching staffs at officials sa mapanganib na coronavirus (COVID-19).

Maraming laro na ang nakansela dahil sa COVID-19 kaya para masunod pa rin ang target date ng pagtatapos ng elimination round ng Philippine Cup ay apat na laro ang ilalarga ngayong araw.

Maglalaban sa alas-10 ng umaga ang Blackwater Elite at San Miguel Beer habang kaldagan sa ala-una ng hapon ang Phoenix FuelMasters at TerraFirma Dyip.

Sa pangatlong laro, maghaharap ang NorthPort Batang Pier at TNT Tropang Giga sa alas-4 ng hapon at sa ala-6:45 ng gabi ay banatan naman ng Barangay Ginebra Gins Kings at Alaska Aces. Nasa tuktok ng team standings ang Tropang Giga tangan ang 5-1 karta habang 1-4 ang baraha ng Batang Pier.

Lahat ng laban ay mananatiling sa Clark sa Pampanga ikakasa kung saan ay may bagong protocols ang ipatutupad para maiwasan na makapitan ng coronavirus.

Nagkagulo sa bubble ng mapabalitang nagpositibo sa COVID-19 ang isang referee at isang player ng Blackwater.

Samantala, isa sa aabangan ng fans ang laban ng crowd favorite na Gin Kings. Galing sa dalawang sunod na talo ang Ginebra kaya tiyak na sisikapin nilang tuldukan ang kanilang kamalasan at kunin ang panalo sa Aces.

Subalit determinado ang Aces na talunin ang Ginebra. "If we want to be in the Top Four we're going to have to compete and beat big teams like Ginebra," pahayag ni Alaska head coach Jeff Cariaso.