Gin Kings, kaya bang kuryentehin ang Bolts?

ni ATD - @Sports | November 24, 2020

Halos hindi na sumasagi sa isip ng apat na teams na natitira sa PBA bubble ang coronavirus (COVID-19).

Sapagkat naka-focus sila sa kanilang laro sa semifinals ng Philippine Cup na nilalaro sa AUF Sports gym sa Clark, Pampanga.

Tulad ng elimination topnotcher Barangay Ginebra Gin Kings na walang nasa isipan kundi tapusin ang Meralco Bolts sa kanilang best-of-five semis series.

Tangan ng Gin Kings ang 2-1 bentahe matapos manalo sa Game 3 kontra Bolts, 91-84, isang hakbang na lang at sasampa sila sa championship round.

Bukas ang Game 4 magsisimula ang bakbakan ng Barangay Ginebra at Meralco sa alas-3:45 ng hapon.

Muling sasandalan ng Gin Kings sina Stanley Pringle, Japeth Aguilar at LA Tenorio upang makuha ang inaasam na panalo. "Our main focus was to execute," saad ni Pringle na kumana ng 24 points sa kanilang panalo sa Game 3.

Pinuri rin ni Ginebra head coach Tim Cone si Joe Devance na malaking bagay din sa kanilang panalo sa huling laro. "In big moment like this, we go to Joe (Devance). It's Joe's decision making. He'll not make so many points and get many rebounds but he makes good decisions both on offense and defense," ani Cone.

Puro rin ang Phoenix FuelMasters sa finals matapos nitong talunin ang TNT Tropang Giga, 92-89 at hawakan din ang 2-1 abante.

Sakaling manalo ang Gin Kings at FuelMasters sa Game 4 ay tiyak na mababawasan ang tao sa loob ng bubble dahil lilisanin na ng maliligwak na team ang nasabing lugar.

Ito'y upang mas maging ligtas ang mga natitirang teams at officials sa laban sa COVID-19.

Kahit humupa na ang coronavirus sa bubble ay patuloy pa rin na mahigpit na ipinatutupad ang health protocols.

Kaya naman nakikita tuwing timeout ay nakasuot ang mga players at coaching staff ng face mask upang hindi basta makapitan ng COVID-19.

Bawian sa game 3 ang bakbakan sa PBA Semis

ni ATD - @Sports | November 22, 2020

Umiinit ang semifinals duel sa Philippine Cup habang humuhupa na ang nakamamatay na coronavirus (COVID-19) sa loob ng PBA bubble.

Halos hindi na sumasagi sa isipan ng mga tao sa bubble ang COVID-19 lalo na ngayong tabla na sa serye ang dalawang pares na teams na naglalaro sa semifinals.

Parehong 1-1 ang serye sa best-of-five match, nakabangon ang Phoenix FuelMasters at Meralco Bolts matapos kalusin sa Game 2 ang TNT Tropang Giga, 110-103 at Barangay Ginebra Gin Kings, 95-77.

Muling silang maghaharap ngayong araw sa Game 3, magtatapat ang FuelMasters at Tropang Giga sa alas-3:45 ng hapon habang alas-6:45 ng gabi ang bakbakan ng Bolts at Gin Kings.

Para sa Phoenix, sasandalan nila ang momentum upang makuha ang pangalawang panalo at lumapit sa pagsampa sa championship round. Malaking bagay ang panalo ng FuelMasters ayon kay head coach Topex Robinson. "This is a big win for us, to get our bearings back," hayag ni Robinson. "Hopefully, we could prolong the series."

Inaasahang huhugot ng lakas si Robinson kina Calvin Abueva, Jason Perkins at Justin Chua para masikwat ang panalo.

Nagtala si Abueva ng 20 points at 15 rebounds kaya tiyak na gagawa ng paraan ang Tropang Giga na mapigilan ang binansagang "The Beast". "We just have to give our very best. No guarantee of winning, but as long as we know in our heart of hearts that we gave our best then that's it," ani Robinson.

Samantala, tuwing mayroong timeout sa Game 2 nakikita sa TV na halos lahat ng players na nasa bench ay nakasuot ng facemask, patunay lamang na sumusunod ang mga ito sa health protocols na ipinatutupad ng liga upang hindi basta makapitan ng coronavirus.

Mas magiging ligtas sa COVID-19 ang mga players, coaching staffs at officials pagkatapos ng semis dahil pauuwiin na ang teams na naligwak.

Bagama't humupa na sa loob ng bubble ang COVID-19 ay kailangan pa rin mag-ingat para hindi na maulit ang nangyari noong nakaraan na may nagpositibo sa coronavirus.

Gin Kings, TNT, LPG, at Bolts sa Semifinals

ni ATD - @Sports | November 17, 2020

Kahit namiminsala pa rin sa Pilipinas ang coronavirus (COVID-19) ay hindi naman huhupa ang init ng banatan sa Philippine Cup.

Kumpleto na ang casts ng semifinals, apat na teams na lang ang natitira sa PBA bubble sa Clark, Pampanga dahil pinauwi na ang mga naligwak na koponan sa eliminations at sa quarterfinals.

Bukas ang simula ng semis kung saan maghaharap ang No. 2 seed Phoenix FuelMasters at No. 3 na TNT Tropang Giga sa alas-3:45 ng hapon.

Makakaharap naman ng Meralco Bolts ang eliminations topnotcher Barangay Ginebra Gin Kings sa ala-6:45 ng gabi.

Best-of-five ang serye kung saan maglalaban sa championship round ang dalawang teams na mananalo sa semis.

Kaya naman kahit konti na lang sila sa bubble ay mainit pa rin ang bakbakan, pero patuloy pa rin na ipatutupad ang health protocols upang hindi makapitan ng COVID-19.

Bahagyang nahirapan ang Bolts bago pumasok sa semis dahil kinailangan nilang talunin ng dalawang beses ang No. 4 na San Miguel Beer na may tangan na incentives.

Dikdikan ang laban sa unang paghaharap kung saan tinalo ng Meralco ang SMB, 78-71 pero nakakuha ng momentum ang Bolts at tinambakan nila sa Game 2 ang Beermen, 90-68 noong Linggo ng gabi. "Tonight was really a focus on defense," saad ni Black pagkatapos nilang manalo. "We knew what we wanted to do defensively. We knew that they were a team that posted up a majority of the time so we tried to devise schemes that would try to slow down their post-up (threat), Mo Tautuaa, and their guards."

Pinatalsik ng Bolts sa trono ang Beermen kaya tiyak na mapapalaban sila ng todo sa Gin Kings na sister team ng San Miguel Beer.

Aminado si Black na hindi pa tapos ang laban, mas mabagsik ang kanilang makakaharap kaya kailangan nilang maghanda ng todo para makamit ang inaasam na titulo. "Now I have to regroup them because the job is not finished. It's only the semifinals," ani Black. "Now I'm gonna put our sights on the finals."

Para sa Tropang Giga, FuelMasters at Gin Kings na may mga hawak na twice-to-beat advantage, dinispatsa nila ang kanilang kalaban sa isang laro lang.

Inaasahan din na bakbakang umaatikabo sa pagitan ng Tropang Giga at FuelMasters dahil maghaharap sina Bobby Ray Parks Jr. at Calvin "The Beast" Abueva.

Maaalalang nagkaroon ng alitan ang dalawa bago nasuspendi si Abueva noong 2019, nakaraan lamang ay umugong na nagkaayos na sila. Isa sa pambato ng TNT si Parks Jr. habang huhugot ng lakas ang FuelMasters kay Abueva.

Samantala, ipinapaalala pa rin sa mga nasa bubble na palaging isuot ang kanilang face mask upang manatili ang kanilang kaligtasan laban sa COVID-19.