Malakasan ba ng Toma o patibayan ng Signal sa final?

ni ATD - @Sports | November 29, 2020

Dalawang teams na lang ang natitira sa PBA bubble matapos patalsikin ng Barangay Ginebra Gin Kings at TNT Tropang Giga ang kanilang nakatunggali sa semifinals noong Biyernes ng gabi sa AUF Sports Gym sa Clark, Pampanga.

Nakatakdang magharap ang Gin Kings at Tropang Giga ngayong araw sa Game 1 ng kanilang best-of-seven series ng Philippine Cup finals.

Kinahon ng Gin Kings ang 83-80 panalo kontra Meralco Bolts habang tinalbos ng Tropang Giga ang Phoenix FuelMasters, 91-81.

Parehong nasagad sa kanilang best-of-five semifinals duel ang Ginebra at TNT kaya mananaig ang may mahabang hininga at matibay na tuhod.

Pahirapan ang panalo ng Gin Kings sa Game 5, sa isang broken play, naisalpak ni Scottie Thompson ang panelyong tres habang papaubos na ang oras.

"Tinira ko na lang dahil wala ng oras at si God na ang nag-shoot non," saad ni Thompson sa kanyang winning basket. "Very thankful kami nanalo. Talagang tough game. Lahat ng hard work namin mula sa offseason, sa quarantine break at hanggang sa bubble, nag-pay off,"

Kumana si Thompson ng 20 points, 12 rebounds at pitong assists para sa Ginebra na haharapin ang karibal na TNT sa best-of-seven championship showdown na magsisimula ngayong araw sa alas-6 ng gabi sa parehong venue.

Namuno sa opensa para sa Ginebra si Stanley Pringle na may 22 puntos at walong rebounds habang may 14 at markers sina LA Tenorio at Japeth Aguilar ayon sa pagkakasunod.

Lilisanin na ng Meralco at Phoenix ang PBA bubble kaya mas magiging ligtas sa coronavirus (COVID-19) ang mga natira.

Kasama sa guidelines ng PBA na pauwiin ang mga maliligwak na koponan upang mabawasan ang mga tao at hindi basta makakapitan ang mga players, coaching staffs at officials ng COVID-19.

Naniniguro lamang ang pamunuan ng PBA na hindi na mauulit ang nangyari nakaraan na may referee at player ng Blackwater Elite na nagpositibo sa COVID -19.

Nasagad sa game 5 ang semis, sino na sa finals?

ni ATD - @Sports | November 27, 2020

Dalawang rubber match games ang masisilayan ngayong araw sa Philippine Cup na gaganapin sa AUF Sports Gym sa Clark, Pampanga.

Parehong nasagad sa Game 5 ang bakbakan ng dalawang pares ng semifinals matapos manalo ng Meralco Bolts at TNT Tropang Giga noong Miyerkules at ilista ang 2-2 sa kanilang best-of-five series.

Kinuryente ng Bolts ang Barangay Ginebra Gin Kings, 83-80 habang tinalbos ng Tropang Giga ang Phoenix FuelMasters, 102-101.

Magkaka-alaman kung sino ang pauuwiin sa PBA bubble pagkatapos ng Game 5, magtatapat ang Tropang Giga at Bolts sa alas-3:45 ng hapon habang magbabanatan sa alas-6:30 ng gabi ang TNT at Phoenix.

Muling sasandalan ni Meralco head coach Norman Black sina veteran Reynel Hugnatan, Chris Newsome at Cliff Hodge upang masikwat ang back-to-back wins at sumampa sa championship round. "Just like in our battle with San Miguel, we have to win two games to move to the next stage. We're halfway through," saad ni Black.

Malaking ambag si Hugnatan para makahirit ng do-or-die game ang Meralco, nagtala ito ng 19 points habang bumakas sina Newsome at Hodge ng tig-16 markers.

Tiyak na may plano ang Gin Kings upang sanggain ang mga armas ng Bolts, ibabangga naman ng crowd favorite Ginebra sina Stanley Pringle, Japeth Aguilar at LA Tenorio.

Dalawang teams ang aalis ng Clark pagkatapos ng laban, ito'y upang mabawasan ang tao sa loob ng PBA bubble at mas magiging ligtas sa mapanganib na coronavirus (COVID-19).

Sina Bobby Ray Parks Jr., Jayson Castro at RR Pogoy ang huhugutan ng puwersa ng Tropang Giga.

Ibabandera naman ng FuelMasters sina Matthew Wright, Calvin Abueva at Jason Perkins. Hindi na napapansin ang COVID-19 dahil mas mainit na ang labanan sa semifinals, halos wala na sa isip nila ang pandemya.

Noong nakaraang buwan lamang ay nabulabog ang PBA nang may magpositibo sa coronavirus at mapilitang ihinto muli ang preliminary round. Pero dahil sa mahigpit na ipinatutupad ang health protocols ay humina na ang puwersa ng COVID-19.

Signal at Boltahe, lalakas ba sa game 4 vs. Gins at LPG?

ni ATD - @Sports | November 25, 2020

Konsentrado ang TNT Tropang Giga at Meralco Bolts na manalo sa Game 4 ng Philippine Cup semifinals upang humaba ang kanilang hininga at lumakas ang tsansa na sumampa sa championship round.

Parehong lubog sa 1-2 serye ang Bolts at Tropang Giga, best-of-five lang ang banatan kaya isang pagkakamali na lang at maliligwak na sila sa PBA bubble.

Katapat ng TNT ang Phoenix FuelMasters sa alas-6:30 ng gabi habang kaharap ng Meralco ang eliminations topnotcher Barangay Ginebra Gin Kings sa alas-3:45 ng hapon, ilalaro ito sa AUF Sports gym sa Clark, Pampanga.

Kailangan nilang manalo upang hindi agad mapatalsik sa bubble, kasama sa guidelines ng PBA na pauwiin na ang mga teams na maliligwak upang mas maging ligtas ang mga tao roon laban sa mapanganib na coronavirus (COVID-19).

Ayon kay TNT head coach Bong Ravena, bistado ng FuelMasters ang kanilang galaw kaya naman gumawa sila ng ibang estratehiya para makatabla sa serye.

"Alam na alam nila mga usual na ginagawa namin. Nasasangga na nila," hayag ni Ravena. "Kailangan naming ibahin suntok, kasi kami nasusuntok nila, salag lang kami ng salag."

Mananatiling huhugot ng puwersa si Ravena kina Jayson Castro, RR Pogoy Troy Rosario at Bobby ray Parks Jr. upang makuha ang inaasam na panalo.

Aminado si Ravena na maraming baon sa opensa ang Phoenix tulad nina Matthew Wright, Jason Perkins, Calvin Abueva, Justin Chua, RJ Jazul, Alex Mallari, RR Garcia at Brian Heruela.

Pero hindi nasisindak si Ravena dahil sa dalawang talo nila ay nakakalamang din sila sa laban, kinakapos nga lang sa endgame. "Kasi nalalamangan kami pero nahahabol at nalalamangan pa namin, eh, so hindi malaking diperensiya," wika ni Ravena.

Inaasahan naman na hindi magre-relax ang Fuelmasters dahil determinado silang sumampa sa finals at makuha ang titulo.

Samantala, kahit humupa na ay maingat pa rin ang galaw ng players sa loob ng bubble upang hindi makaporma muli ang makulit na COVID-19. Patuloy ang pagsunod sa health protocols para hindi na maulit na nagpositibo sa coronavirus ang referee at player ng Blackwater Elite sa kalagitnaan ng bubble. Sa ngayon ay kalmado na ang lahat at nawawala na ang takot sa COVID-19.