Konti lang naman daw ang nadale… Pagbabakuna ng AstraZeneca, tuloy! — DOH

ni Ronalyn Seminiano Reonico | April 19, 2021

Maglalabas ang Department of Health (DOH) ng guidelines bago ituloy ang pagbabakuna ng AstraZeneca vaccines sa mga edad 60 pababa.

Ayon kay Health Undersecretary Maria Rosario Vergeire kaugnay ng rekomendasyon ng Food and Drug Administration (FDA), “Sinabi na itutuloy ulit natin because ‘yun ang sinabi ng mga eksperto - the benefits outweigh the risk.”

Aniya pa, “[On] the whole, bottomline nito ay tayo ay maglalabas ng isang guideline para sa paggamit ng AstraZeneca to include these different precautions na ibinigay ng FDA.”

Matatandaang noong April 8, ipinatigil ang pagbabakuna gamit ang AstraZeneca sa mga edad 60 pababa dahil sa naiulat sa ibang bansa na pagkakaroon ng pamumuo ng dugo o blood clotting at pagbaba ng platelet count sa mga naturukan nito.

Saad pa ni Vergeire, “Kailangan nating balikan din na napakaliit lang na porsiyento ng populasyon na naapektuhan ng mga ganitong klaseng adverse events for AstraZeneca.”

Nilinaw din ng DOH na wala pang naiuulat na naturang adverse events sa mga naturukan na ng AstraZeneca rito sa Pilipinas.

Noong Marso, nakatanggap ang bansa ng 525,600 doses ng AstraZeneca vaccine doses at una nang inanunsiyo ng awtoridad na ubos na ito at inaasahang darating ang mahigit 900,000 doses sa Mayo o Hunyo ngayong taon.

Umabot naman sa 1.4 million doses ng AstraZeneca at Sinovac COVID-19 vaccines ang naipamahagi na sa bansa.

COVID-19 vaccine, 'di agad-agad tatalab — DOH

ni Mary Gutierrez Almirañez | April 10, 2021

Nilinaw ng Department of Health (DOH) na walang kinalaman ang bakuna kontra COVID-19 sa mga taong nagpopositibo pa rin sa virus matapos mabakunahan, ayon sa pahayag ni DOH Undersecretary Maria Rosario Vergeire.

Aniya, "Hindi po dapat mabahala ang public regarding this matter. Kailangang maintindihan natin ang sitwasyon. Sa pag-a-analyze namin ng datos ng mga nagkakaroon ng COVID-19 ay nakikita po natin na the persons were already incubating during the time they were vaccinating."

Kaugnay ito sa namatay na miyembro ng Manila Police District dahil sa COVID-19, ilang araw matapos mabakunahan ng Sinovac.

Iginiit ni Vergeire na hindi dapat katakutan ang mga bakuna, partikular na ang bakunang gawa ng China sapagkat dumaan 'yun sa masusing pag-aaral ng mga eksperto.

"Kailangan nating alalahanin na ang full effect ng bakuna ay makukuha natin mga 3 to 4 weeks after you get your second dose. Halimbawa, nakakuha kayo ng first dose, hindi pa ganoon kataas ang antibody tighter natin to give or to receive the full protection of the vaccine," paliwanag pa niya.

Matatandaang pinayagan na ring iturok ang Sinovac sa mga senior citizens mula noong naubos ang supply ng AstraZeneca sa ‘Pinas.

Kamakailan lang din nang suspendihin sa ibang bansa ang pagbabakuna gamit ang AstraZeneca COVID-19 vaccines dahil sa hinihinalang blood clot na adverse event na ikinasawi ng ilang nabakunahan nito.

Sa ngayon ay posibleng dalawang linggo pa ang hihintayin bago muling irekomenda ng World Health Organizations (WHO) ang AstraZeneca sa publiko.