Higit 1M AstraZeneca na donasyon ng Japan, sinalubong ni P-Du30

ni Ronalyn Seminiano Reonico | July 9, 2021

Dumating na kagabi sa Villamor Air Base ang 1,124,100 doses ng AstraZeneca COVID-19 vaccines mula sa Japan.

Si Pangulong Rodrigo Duterte, kasama ang Japanese embassy officials, National Task Force (NTF) Against COVID-19, at Inter-Agency Task Force for the Management of Emerging Infectious Diseases (IATF-EID) executives ang sumalubong sa pagdating ng mga bakuna.

Pinasalamatan ni P-Duterte ang Japan at aniya, “Japan continues to be our strong partner in various development programs, our cooperation in fighting the pandemic is truly an indication of the deep friendship between our two countries.

“Let me assure everyone that throughout our vaccination rollout, we will prioritize the safety and quality of all vaccines that we are distributing across the country.”

Nanawagan din ang pangulo sa publiko na magpabakuna na laban sa COVID-19 at patuloy na sumunod sa mga ipinatutupad na health protocols.

Saad ng pangulo, “I, therefore, urge everyone to get vaccinated and help prevent the further spread of the virus. We should all continue to follow safety rules and health protocols even when fully vaccinated.”

1M plus na AstraZeneca, donasyon ng Japan sa ‘Pinas

ni Lolet Abania | July 8, 2021

Mahigit sa isang milyon doses ng COVID-19 vaccine na AstraZeneca na donasyon ng Japan ang dumating ngayong Huwebes nang gabi, July 8, 2021.

Ayon kay Presidential Spokesperson Harry Roque, ito ay isa sa dalawang batch ng AstraZeneca COVID-19 vaccine shipment na inaasahang maide-deliver ngayong linggo. “We are expecting two batches of AstraZeneca this week. The first one was that donated by the Japanese government which will arrive tonight,” ani Roque sa press briefing kanina.

Nasa 1,124,100 doses ng COVID-19 vaccines ang donasyon ng Japanese government sa Pilipinas. Ang ikalawang shipment na isa ring donasyon sa pamamagitan ng World Health Organization (WHO)-led COVAX Facility ay nasa 2,028,000 doses ng COVID-19 vaccines.

Ang mga donasyong bakuna sa ilalim ng COVAX ay maaari lamang magamit ng mga health workers, senior citizens o mga edad 60 at pataas, mga persons with comorbidities, at indigent o mahihirap na indibidwal.

Gayundin, sinabi ni Roque na 170,000 doses ng COVID-19 vaccine na Sputnik V ng Russia ay inaasahang dumating ngayong linggo.

Sa mga ayaw magpabakuna... ‘Bawal ang tanga’ — Gordon

ni Mary Gutierrez Almirañez | June 6, 2021

Naiturok na ang 85% sa 1.5 million doses ng AstraZeneca COVID-19 vaccines na nakatakdang mag-expire sa ika-30 ng Hunyo, ayon kay Department of Health (DOH) Undersecretary Myrna Cabotaje.

Aniya, "Halos wala na kaming ituturok. We have set the guidelines, sana wala nang expiry ng June 30.” Ilalaan naman aniya sa second doses ang natitirang 500,000 doses na nakatakdang mag-expire sa Hulyo.

Samantala, iginiit ni Philippine Red Cross Chairman Senator Richard Gordon sa publiko na ‘bawal ang tanga’ pagdating sa bakuna kontra COVID-19.

Sabi pa ni Gordon, "Kailangan talaga, magpabakuna kayo. Bawal ang tanga. Kung 'di kayo magpapabakuna, du’n na lang kayo sa bahay habambuhay, 'wag kayong lalabas."

"Kailangang gampanan n'yo ang tungkulin n'yo sa inyong sarili at kamag-anak sa bahay n'yo, at mga makakausap ninyo kung kayo ay lalabas... I’m not going to pull my punches. Bawal ang tanga, bawal ang tamad, magpabakuna kayo," dagdag pa niya.

Sa ngayon ay iba’t ibang pakulo na ang ginagawa ng lokal na pamahalaan para lamang mahikayat ang publiko na magpabakuna. Maging ang mobile at drive-thru vaccination ay isinasagawa na rin upang mapabilis ang rollout.

Tinataya namang 5.38 million indibidwal na ang nabakunahan laban sa virus. Kabilang dito ang 1.2 million na fully vaccinated o nakakumpleto sa dalawang turok, at ang 4,088,422 indibidwal na nabakunahan ng unang dose.