2.1 M ng Moderna vaccine at 660K AstraZeneca vaccine, dumating na

ni Lolet Abania | October 8, 2021

Dumating na ang mahigit sa 2.1 milyon doses ng Moderna vaccine at higit 660,000 doses ng AstraZeneca vaccine kontra-COVID-19 ngayong Biyernes nang umaga.

Lumapag sa Ninoy Aquino International Airport (NAIA) Terminal 1 via China Airlines flight CI 701 ng alas-9:35 ng umaga, ang bagong supply ng COVID-19 vaccine.

Ayon sa National Task Force Against COVID-19 (NTF), ang kabuuang 1,384,280 Moderna doses ay mapupunta sa national government habang ang 747,860 doses ay sa pribadong sektor.

Ang kabuuang 661,100 AstraZeneca doses naman ay nakalaan din sa pribadong sektor.

Sinabi pa ng NTF, hanggang nitong Miyerkules nasa 22.6 milyong Pilipino o 29.37% ng target na populasyon ay fully vaccinated na. Sinalubong naman ang mga naturang COVID-19 vaccine nina NTF chief implementer at vaccine czar Secretary Carlito Galvez Jr., Department of Health (DOH) Secretary Francisco Duque III, Metro Manila Development Authority (MMDA) chairperson Benhur Abalos, at Presidential Adviser for Entrepreneurship Joey Concepcion.

Naroon din sina US Embassy Counselor for Economic Affairs David ‘Chip’ Gamble, A Dose of Hope project lead adviser Josephine Romero, AstraZeneca Philippines president Lotis Ramin, at Zuellig Pharma Corp. chief business officer Janette Jakosalem.

Tiwala naman si Galvez na kayang makamit ng Pilipinas na makapagbakuna ng 50% hanggang 70% ng target na populasyon bago matapos ang 2021.

661K doses ng AstraZeneca vaccine, dumating na

ni Lolet Abania | September 17, 2021

Mahigit sa kalahating milyong doses ng AstraZeneca COVID-19 vaccine ang dumating sa bansa ngayong Biyernes nang umaga.

Lumapag ang kabuuang 661,200 doses ng AstraZeneca vaccine sa Ninoy Aquino International Airport (NAIA) Terminal 1 sa Pasay City via China Airlines flight ng alas-9:14 ng umaga, kung saan binili ang mga naturang bakuna ng pribadong sektor.

Sinalubong ito ni vaccine czar Carlito Galvez Jr. na aniya, 80% ng nasabing batch ng AstraZeneca vaccine ay mapupunta sa local government units (LGUs) sa labas ng National Capital Region (NCR) habang ang 20% ay para sa private sector.

Nakasama rin ni Galvez sa pagsalubong sa mga bakuna si presidential adviser for entrepreneurship at Go Negosyo founder Joey Concepcion.

Dagdag pa ni Galvez, inaasahan na rin ng bansa na makakatanggap ng 190,000 doses naman ng Sputnik V (Component 2) ngayong linggo o sa susunod na linggo.

“This shipment of Sputnik V vaccines shall be used for the second dose,” ani Galvez sa isang statement.

“As per our vaccine experts from the Department of Health, the gap between first and second doses of Sputnik V can be as long as six months, so no need to worry because the vaccines are arriving soon,” dagdag niya.

Sa ngayon, nakatanggap na ang Pilipinas ng mahigit sa 58 milyon vaccine doses ng COVID-19 simula noong Pebrero 28.

Nakalaan daw para sa pribadong sektor…502K doses ng Astrazeneca, nasa bansa na

ni Jasmin Joy Evangelista | September 10, 2021

Nakatanggap ang Pilipinas ng kabuuang 502,000 doses ng AstraZeneca COVID-19 vaccines nitong Biyernes, Setyembre 10.

Binili ang mga ito ng pribadong sektor sa ilalim ng "A Dose of Hope" program.

Ayon sa National Task Force Against Covid-19, ang bagong batch ng AstraZeneca vacccines ay nakalaan para sa pribadong sektor upang mapabilis pa ang pagbabakuna ng mga economic frontliner.

Samantala, sa 13.8 million na mga indibidwal na nakatanggap ng kumpletong bakuna, 242 o 0.0017% lang ang nagpositibo sa COVID-19 matapos mabakunahan.

Kaya hinihikayat ng pamahalaan ang lahat ng eligible na indibidwal na magpabakuna para maprotektahan ang sarili laban sa virus.

Sakaling makaramdam ng adverse reactions matapos bakunahan, hinihikayat ng DOH at FDA na i-report ito sa FDA website o sa inyong City Health Office (CHO).