AstraZeneca, kulang sa supply, 'Pinas abang-abang pa rin

ni Ronalyn Seminiano Reonico | March 1, 2021

Wala pang kasiguraduhan kung kailan darating sa bansa ang 3.5 million doses ng AstraZeneca COVID-19 vaccine mula sa COVAX facility, ayon kay Vaccine Czar Carlito Galvez, Jr. ngayong Lunes.

Sa isinagawang press briefing at official launching ng vaccination drive ng pamahalaan sa Philippine General Hospital (PGH), sinabi ni Galvez na ang global supply shortage ng bakuna ang isa sa dahilan ng pagkaantala ng pagdating nito sa bansa.

Aniya, "Wala pa pong definite date. Nakikita natin ang reality on the grounds, acute po ang global shortage of supply."

Ngayong araw, Marso 1, dapat ang itinakdang petsa ng pagdating ng 525,600 doses ng AstraZeneca sa bansa.

Saad pa ni Galvez, "We understand the challenge COVAX is facing because they are supplying the global community. Ang pagkakasabi nila, indefinite [ang date of arrival] pero hopefully first quarter.”

Samantala, base sa tala ng Philippine Food and Drug Administration, ang efficacy rate ng AstraZeneca ay aabot sa 70% para sa unang dose at tataas pa ito diumano pagkatapos ng ikalawang dose pagkalipas ng 4 hanggang 12 weeks.

AstraZeneca, kulang sa supply, next week pa — DOH

ni Lolet Abania | February 28, 2021

Maaantala ng isang linggo ang pagdating ng 525,600 AstraZeneca COVID-19 vaccines ng COVAX facility na nakatakda sana bukas, Marso 1, ayon kina Department of Health (DOH) Secretary Francisco T. Duque III at Vaccine Czar Carlito Galvez dahil anila sa limitadong supply nito.

“Hindi matutuloy (ang pagdating ng AstraZeneca). Ang sabi ng WHO, nagkakaproblema sila sa supply, maaantala pa raw ng mga isa pang linggo,” ani Duque sa isang interview matapos ang pagdating ng 600,000 doses ng Sinovac COVID-19 vaccine na donasyon ng Chinese government sa bansa ngayong Linggo ng hapon.

“Nakita naman natin na itong AstraZeneca ay pinag-aagawan sa Europe at developing countries. Naiintindihan naman natin, makakapag-antay pa tayo,” sabi naman ni Galvez.

Nakapag-isyu na ang Food and Drug Administration (FDA) ng emergency use authorization (EUA) sa parehong AstraZeneca at Sinovac. Base sa isang FDA evaluation, ang AstraZeneca ay may efficacy rate na 70% matapos ang first dose, at ang rate ay madaragdagan matapos naman ang second dose na maibigay makaraan ang apat hanggang 12 linggo.

Sa Sinovac, lumalabas na ang efficacy rate nito ay 65% hanggang 91% para sa mga malulusog na indibidwal na edad 18 hanggang 59.

Gayunman, ayon sa FDA, hindi nila inirerekomenda ang paggamit ng Sinovac sa mga health workers dahil sa ang efficacy rate nito ay umabot lamang sa 50.4% para sa naturang grupo.

525,600 doses ng AstraZeneca, darating na sa Lunes

ni Mary Gutierrez Almirañez | February 27, 2021

Ikakarga na patungong Pilipinas ang 525,600 doses ng AstraZeneca COVID-19 vaccine at inaasahang darating sa Lunes, Marso 1, ayon sa vaccine czar na si Secretary Carlito Galvez.

Kinumpirma ni WHO Country Representative Rabindra Abeyasinghe na 5.5 million hanggang 9.2 million doses ng Astrazenica ang inaprubahan at mayroon nang emergency use authorization sa bansa.

Sa pagtatapos ng taon ay inaasahang mahigit 70 milyong Pilipino ang mababakunahan kontra COVID-19.