793,900 doses ng AstraZeneca vaccine dumating na

ni Lolet Abania | November 9, 2021

Nasa kabuuang 793,900 doses ng AstraZeneca COVID-19 vaccine na donasyon ng Germany ang dumating sa bansa ngayong Martes ng hapon.

Ang karagdagang vaccine supply ay lumapag sa Ninoy Aquino International Airport Terminal 3, pasado alas-4:00 ng hapon.

Samantala, halos 30 milyong Pilipino na ang fully vaccinated laban sa COVID-19.

Ayon sa gobyerno, nasa 29,809,085 indibidwal o 38.64% ng 77 milyong target na populasyon ang bakunado na kontra sa virus hanggang nitong Nobyembre 8, kung saan opisyal na inumpisahan ang vaccination program noong Marso 1, 2021.

1M AstraZeneca vaccines na donasyon ng Japan, dumating na

ni Lolet Abania | October 30, 2021

Natanggap na ng bansa ang kabuuang 1,065,600 doses ng AstraZeneca COVID-19 vaccine na donasyon ng Japan ngayong Sabado.

Ayon sa mga awtoridad, dumating ang mga bagong batch ng COVID-19 vaccine doses sa Ninoy Aquino International Airport (NAIA) Terminal 1, pasado alas-12:00 ng tanghali ngayong araw.

Sinalubong naman ang mga doses ng AstraZeneca vaccine nina National Task Force Against COVID-19 special adviser Dr. Teodoro Herbosa, Japan Embassy Economic minister Masahiro Nakata, at mga opisyal mula sa foreign at health departments.

Ayon kay Herbosa, ang mga bagong batch ng COVID-19 vaccines ay ipapamahagi sa iba’t ibang rehiyon sa bansa.

“The vaccination program really worked, those who were still hesitant magparehistro na kayo sa local government units (LGUs) niyo at hindi issue ang kulang sa bakuna. Marami na pong bakuna [for] all 18 years old and up pwede nang bakunahan,” ani Herbosa.

Gayundin, tinatayang nasa 896,000 doses ng AstraZeneca COVID-19 vaccine na dinonate ng Japanese government ang dumating sa bansa nitong Huwebes ng hapon.

Sa isang statement naman nitong Biyernes, sinabi ni vaccine czar Carlito Galvez Jr. na inaasahan na rin ng Pilipinas na makakatanggap ng tinatayang 50 hanggang 60 milyong COVID-19 vaccine doses nitong natitirang dalawang buwan ng taon.

Donasyon ng German gov’t.. 844,800 doses ng AstraZeneca vaccine, dumating na

ni Lolet Abania | October 15, 2021

Dumating na sa bansa ang 844,800 doses ng AstraZeneca COVID-19 vaccines ngayong Biyernes ng hapon.

Lumapag ang bagong batch ng mga bakuna sa Ninoy Aquino International Airport (NAIA) Terminal 3 via Emirates Airlines Flight EK 332, pasado alas-4:00 ng hapon, kung saan donasyon ang mga ito ng German government sa pamamagitan ng COVAX facility.

Labis ang pasasalamat ni vaccine czar Carlito Galvez Jr. sa World Health Organization (WHO) at sa gobyerno ng Germany para sa delivery ng mga AstraZeneca vaccines.

“Over 400,000 Filipinos will benefit from these vaccines and this means more than 400,000 of our countrymen will be saved from severe COVID-19 complications and death,” ani Galvez, kung saan ang mga doses ng bakuna ay dadalhin naman sa mga probinsiya.

Ang representative ng German Embassy in Manila ay nagsabing plano ng kanilang gobyerno na mag-donate ng 100 milyon pang COVID-19 vaccines sa mga papaunlad na bansa.

Plano rin ng German government na magbigay ng donasyon ng isa pang batch na aabot sa 800,000 doses ng COVID-19 vaccines sa Pilipinas aniya pa, “soon.”

Samantala, ayon sa National Task Force Against COVID-19, isa pang batch ng Pfizer vaccine doses ang nakatakdang dumating sa bansa ngayong Biyernes ng gabi.