Mahigit 1.9M doses ng AstraZeneca vaccine, dumating na sa bansa

ni Jasmin Joy Evangelista | December 27, 2021

Dumating na sa bansa ang 1,957,000 doses ng AstraZeneca COVID-19 vaccine, na binili ng gobyerno.

Ito ay lumapag sa bansa kagabi, bago mag-7:00 p.m.

Dahil dito ay umabot na sa 200 million doses ng bakuna ang na-deliver sa bansa, kung saan higit 100 milyon dito ay na-administer na sa mga Pinoy as of December 21.

"Another milestone po, almost 208 million doses po ngayon ang ating natanggap na po, ang arrivals po ng bakuna dito sa ating bansa," ani National Task Force Against COVID-19 Assistant Secretary Wilben Mayor.

Noong nakaraang lingo ay inaprubahan na ng Food and Drug ang pagbabakuna ng Pfizer-BioNTech's sa mga batang edad 5 hanggang 11.

Ayon kay FDA director general Eric Domingo, 90% na epektibo ang nasabing bakuna para sa mga batang nasa nasabing age group na may “very mild” adverse effects.

Plano ng gobyerno na i-roll out na ang pagbabakuna sa mga batang 5-anyos pataas sa Enero 2022. Ang planned dosage na ibibigay sa mga ito ay 10 micrograms, na mas mababa sa itinuturok sa mas nakatatanda.

Higit 500K AstraZeneca doses na donasyon ng Poland, dumating na sa bansa

ni Jasmin Joy Evangelista | November 29, 2021

Dumating na ang 547,100 AstraZeneca COVID-19 doses na bigay ng Poland, nitong Linggo ng gabi.

Dahil dito, umabot na ng 142 milyon ang total COVID-19 vaccine supplies ng Pilipinas.

Ayon kay Polish Embassy Charge d’Affaires Jaroslaw Szczepankiewicz, ang donasyon na ito ay nagpapakita lamang ng pagkakaibigan ng dalawang bansa.

Ito ay maituturing din aniyang “expression” ng solidarity ng Poland sa mga Pilipino.

Lubos ang pasasalamat ni vaccine czar Carlito Galvez Jr. sa mga donasyonh ito na siyang gagamitin sa 3-day vaccination drive.

1.7 M doses ng AstraZeneca, dumating na

ni Lolet Abania | November 27, 2021

Natanggap ng pamahalaan ang kabuuang 1,746,160 doses ng AstraZeneca COVID-19 vaccine na donasyon ng United Kingdom ngayong Sabado, kasabay ng paghahanda ng bansa para sa isasagawang national COVID-19 vaccination drive.

Lumapag ang shipment sa pamamagitan ng UN-led at vaccine-sharing program na COVAX facility sa Ninoy Aquino International Airport (NAIA) Terminal 3 bandang alas-4:00 ng hapon via Emirates Airline flight EK332.

Ang delivery ng bakuna ngayong araw ang nakakumpleto sa 5,225,200 vaccine doses na donasyon ng UK, habang nakatanggap din ang bansa ng AstraZeneca shots nitong Huwebes at Biyernes.

Una nang sinabi ng gobyerno na kanilang babawasan ang target, para sa 3-araw na vaccination drive simula sa Lunes, ng 9 milyon na lamang mula sa inisyal na 15 milyon dahil anila, sa kakulangan ng syringe o hiringgilya.

Ayon sa mga awtoridad para maging fully vaccinated na ang tinatayang 54 milyong Pinoy, isa pang revised target mula sa inisyal na 77 milyong indibidwal, magkakaroon ng isa pang 3-araw na pagbabakuna kontra-COVID-19 na gagawin mula Disyembre 15 hanggang 17.

Umabot na sa halos 35 milyong indibidwal ang fully vaccinated hanggang nitong Huwebes, na nasa 45.3 porsiyento ng target na 77.1 milyon.

Nasa tinatayang 44.5 milyon naman ang nakatanggap ng unang dose ng COVID-19 vaccines.