AFP, gagawing pang-world class

ni Angela Fernando - Trainee @News | October 24, 2023

Sisikapin ng pamahalaang makasabay sa modernisasyon ang Armed Forces of the Philippines (AFP) upang makilala ito bilang "world-class force," saad ni Presidente Bongbong Marcos Jr. sa kanyang talumpati nu'ng Lunes, Oktubre 23.

Ipinunto ni Marcos ang kahalagahan ng militar sa pagpapalaganap ng depensa ng bansa.

Dagdag niya, magpapatuloy ang administrasyon sa pagsulong ng mga pamamalakad para sa ikabubuti ng mga militar at ng kanilang pamilya.

"Rest assured that we will remain steadfast in transforming and modernizing the AFP into a world-class force that is respected by its counterparts and is a source of national pride," saad ng Pangulo sa hapunan para sa AFP Council of Sergeants Major.

Nagpakita rin siya ng tiwala sa mga sergeant major na patuloy paglinangin ang kanilang kaalaman para sa bagong kasanayan ng AFP, para rin maibigay nang maayos ang kanilang serbisyo sa bayan.

Fixed term sa AFP officials, pirmado na

ni Mylene Alfonso | May 19, 2023

Aprubado na ni Pangulong Ferdinand Marcos, Jr., ang batas na nag-aamiyenda kaugnay sa pagtatakda ng fixed term sa mga matataas na opisyal ng Armed Forces of the Philippines (AFP).

Ito ay makaraang lagdaan ni Marcos ang Republic Act No. 11939, o ang An Act Further Strengthening Professionalism and Promoting the Continuity of Policies and Modernization Initiatives in the Armed Forces of the Philippines, and Amending for this Purpose Republic Act No. 11709.

Una nang nilagdaan ni dating Pangulong Rodrigo Duterte, ang Republic Act No. 11709 noong Mayo ng nakaraang taon.

Batay sa inamyendahang Republic Act 11939, mananatili pa rin sa tatlong taon ang fixed term ng tour of duty ng AFP Chief of Staff.

Sa ilalim ng bagong batas, mababawasan ang fixed term ng mga major service commanders sa dalawang taon mula sa tatlong taon.

Kabilang dito ang Commanding General ng Philippine Army; Commanding General ng Philippine Air Force; Flag Officer in Command ng Philippine Navy; at Superintendent ng Philippine Military Academy ay may maximum tour of duty na dalawang magkasunod na taon.

Lahat ng nabanggit na posisyon ay maaaring i-terminate ng Pangulo ang termino nang mas maaga kung gugustuhin niya.

Ang naturang mga opisyal din ay hindi na magiging eligible para sa anumang posisyon

sa AFP, maliban kung ma-promote bilang Chief of Staff.

Habang itinakda naman sa 57-anyos mula sa edad na 56 ang compulsory retirement age ng mga may ranggong 2nd lieutenant o ensign hanggang Lt. General o Vice Admiral at pwede rin silang magrerito kung umabot na sa 30 taong active service anuman ang mauna sa dalawa.

Itinakda naman sa 60 taong gulang ang compulsory retirement age ang mga kinomisyon sa ilalim ng P.D. No. 1908 at maging ang mga itinalaga sa Corps of Professors.

Samantala, sa ilalim din ng bagong batas, itinaas sa limang taon ang dating tatlong taon ang maximum tenure ng mga nasa ranggong Brigadier General/Commodore habang sampung taon naman mula sa dating walong taon para sa mga may ranggong Colonel/Captain.

Matapos ang asasinasyon ni Abe.. P-BBM at VP Sara, protektado nang husto — AFP

ni Lolet Abania | July 10, 2022

Tiniyak ng Armed Forces of the Philippines (AFP) na ang dati at kasalukuyang mga lider ng bansa ay pinuprotektahan nila nang husto, matapos ang naganap na asasinasyon ni dating Japanese Prime Minister Shinzo Abe nitong Biyernes.

Ayon kay AFP Spokesperson Col. Medel Aguilar, in-full force ang dalawang security groups, ang Presidential Security Group (PSG) at ang Vice Presidential Security and Protection Group (VPSPG), para siguruhin ang kaligtasan nina Pangulong Ferdinand “Bongbong” Marcos Jr. at Vice President Sara Duterte.

“We have the PSG and the VPSPG to protect the President and the Vice President, respectively. In coordination with these units, we provide additional security coverages in places of their engagements,” pahayag ni Aguilar ngayong Linggo.

Bukod sa mga naturang units, may karagdagang security personnel na kanila ring idine-deployed sa mga lugar na parehong ang Pangulo at Bise Presidente ay binibisita.

Sinabi naman ni Aguilar, nasa PSG at VPSPG na kung paano at anong security setups ang kanilang ipatutupad para mas tiyakin ang kaligtasan ng mga opisyal.

“It is for the units I mentioned to determine force requirements for the security operations. They are led by competent officers,” saad ni Aguilar.

Nitong Biyernes, si Abe na kilala bilang longest serving prime minister ng Japan ay binaril at napatay habang nagde-deliver ng kanyang campaign speech sa lungsod ng Nara, Japan.