Cebu Archbishop Palma at dating Auxiliary Bishop Rañola, magaling na sa COVID 19

ni Lolet Abania | March 2, 2021

Nakalabas na ng ospital sina Cebu Archbishop Jose Palma at retiradong Auxiliary Bishop Antonio Rañola, ayon sa report na nai-post sa website ng Catholic Bishops' Conference of the Philippines (CBCP).

Sina Palma at Rañola ay dumating sa tahanan ng mga Archbishop bandang alas-5:00 ng hapon kahapon matapos na manatili sa ospital ng 10 araw kung saan sila ay sumailalim sa gamutan kontra sa COVID-19.

Sa isang video message, nagpahayag ng labis na pasasalamat ang arsobispo sa lahat ng medical workers na gumamot sa kanila at mga nagdasal para sa agaran nilang paggaling.

“It’s nice to be home to resume our duties and ministries,” ani Palma. Gayundin, ang prelate ay humiling ng panalangin para sa iba na nananatiling may sakit at sa mga namatay dahil sa COVID-19.

“For us who are given another opportunity to continue our ministry, we say praise God,” sabi pa niya.

Archbishop Cardinal Advincula, itinalaga ni Pope Francis sa Congregation for the Clergy

ni Lolet Abania | December 18, 2020

Itinalaga ni Pope Francis si Archbishop Cardinal Jose Advincula ng Capiz bilang miyembro ng Congregation for the Clergy, ayon sa Holy See Press Office.

Hinirang din ng Santo Papa si Cardinal Cornelius Sim, ang titular bishop ng Putia sa Numidia at vicar apostolic ng Brunei sa parehong posisyon, kung saan sila ang may pananagutan sa pagbuo, ministeryo at buhay ng mga pari.

Ang Congregation for the Clergy na naka-base sa Vatican City ay kasalukuyang pinamumunuan ni Cardinal Benjamin Stella. Kabilang si Fr. Advincula sa siyam na mga cardinal na binigyan ng takda at mga gawain ni Pope Francis ngayong linggo sa iba’t ibang dicasteries na nasa Roman Curia.

Isang dating seminary formator, si Fr. Advincula ay na-appoint nang bishop ng San Carlos sa Negros Occidental noong 2001 at nailipat sa Capiz bilang archbishop makalipas ang sampung taon.