Sa Araw ng Kalayaan.. Flag-raising at wreath-laying, sabay isasagawa sa mga historical sites

ni Lolet Abania | June 11, 2022

Magkasabay na isasagawa ang flag-raising at wreath-laying sa ilang national historical sites sa bansa sa paggunita ng ika-124 anibersaryo ng Araw ng Kalayaan sa Linggo, Hunyo 12, ayon sa National Historical Commission of the Philippines (NHCP).

Sa Laging Handa public briefing ngayong Sabado, sinabi ni NHCP Senior Researcher Francis Kristoffer Pasion na kabilang sa mga sites na sabay-sabay na gagawin ang flag-raising at wreath-laying ay sa Barasoian Church sa Malolos, Bulacan; Andres Bonifacio Monument sa Caloocan City, at sa Mactan Shrine sa Cebu.

Pangungunahan naman ni Pangulong Rodrigo Duterte ang pagdiriwang ng Araw ng Kalayaan sa Rizal Park.

Ang nasabing okasyon ay maituturing na huling beses na pangungunahan ni Pangulong Duterte ang pagdiriwang bilang presidente dahil magtatapos na ang kanyang termino sa Hunyo 30.

Samantala, isang socio-civic parade, mga cultural shows, at job fair ang magaganap bukas, sa Kawit, Cavite, ang munisipalidad kung saan si Emilio Aguinaldo, ang unang pangulo ng Pilipinas ay nagdeklara ng Independence Day noong Hunyo 12, 1898.

“Isa sa mga paraan para ipagdiwang ang kalayaan ay maging isang mabuting Pilipino, dapat aware tayo sa ating duties and responsibilities bilang isang mamamayan. Sumunod sa patakaran ng ating lipunan,” sabi ni Pasion.

“Ang pagiging makabayan ay nagta-transcend hindi lang sa pagpapakita ng Philippine flag, ito ay nakikita rin sa ating paghahangad na maiangat ang sarili,” dagdag pa ni Pasion.

LRT1 at LRT2, may libreng sakay sa Araw ng Kalayaan

ni Lolet Abania | June 10, 2022

May libreng sakay para sa mga commuters na ipapatupad ang Light Rail Transit Lines 1 (LRT1) at LRT2 sa Hunyo 12, kasabay ng pagdiriwang ng bansa sa ika-124 Araw ng Kalayaan.

Sa isang statement ngayong Biyernes, ayon sa Light Rail Manila Corp. (LRMC), ang private operator ng LRT1, ang mga pasahero ng railway line ay mabibigyan ng free rides sa Hunyo 12, mula alas-7:00 ng umaga hanggang alas-9:00 ng umaga at mula alas-5:00 ng hapon hanggang alas-7:00 ng gabi.

Ayon sa LRMC, ang mga beep card holders ay kailangang dumaan sa karaniwang Automated Fare Collection System (AFCS) gates at i-tap lamang ang kanilang cards upang ma-avail ang libreng sakay at wala itong charge, habang ang mga pasahero na walang beep cards ay maaaring kumuha nang libre ng single journey tickets mula sa LRT1 teller booths.

Sinabi rin ng kumpanya na ang LRT 1 ay magpapatuloy sa kanilang normal operating hours sa Araw ng Kalayaan, kung saan ang first trips na parehong aalis mula sa Baclaran at Balintawak stations ay alas-4:30 ng madaling-araw habang ang last trips naman ay alas-9:15 ng gabi sa Baclaran Station at alas-9:30 ng gabi sa Balintawak Station.

Inanunsiyo rin ng Light Rail Transit Authority (LRTA) na ang free rides ay ipapatupad sa LRT2 mula alas-7:00 ng umaga hanggang alas-9:00 ng umaga at mula alas-5:00 ng hapon hanggang alas-7:00 ng gabi.

Patuloy naman ang MRT3 na nagpapatupad ng free rides para sa buong buwan ng Hunyo upang makabawas sa pinansiyal na pasanin ng mga commuters sa gitna ng nararanasang pagtaas sa presyo ng produktong petrolyo.

Ika-124 Araw ng Kalayaan sa Rizal Park, pangungunahan ni P-Du30

ni Lolet Abania | June 10, 2022

Pisikal na pangungunahan ni Pangulong Rodrigo Duterte ang paggunita ng ika-124 Araw ng Kalayaan sa Hunyo 12 sa Rizal Park, Manila.

Sa isang advisory na ipinadala ng Malacañang sa mga reporters, nakasaad na si Pangulong Duterte ay dadalo nang personal sa Independence Day commemoration rites na may temang “Kalayaan 2022: Pagsuong sa Hamon ng Panibagong Bukas.”

Ang nasabing okasyon ay itinuturing na huling beses na pangungunahan ni Pangulong Duterte ang event bilang presidente ng bansa dahil ang kanyang termino ay magtatapos na sa Hunyo 30.

Noong nakaraang taon, dumalo ang Pangulo sa selebrasyon ng Araw ng Kalayaan sa Malolos City, Bulacan, ang tahanan ng unang Republika ng Pilipinas.

Matapos ng selebrasyon ng Independence Day sa Hunyo 12, dadalo rin ang Pangulo sa paglulunsad o naming and commissioning ng BRP Melchora Aquino sa Port Area, Manila.

Batay pa sa advisory, “[President] Duterte will then proceed to the lowering of the tunnel boring machine, as well as train demonstration and unveiling of the Philippine Railways Institute Interim Simulator Training Center of the Metro Manila Subway Project in Valenzuela City.”