Phl Curling team champ sa Div. B C'ships Canada

ni Anthony E. Servinio @Sports | Nov. 11, 2024

Saludo kami sa malakas na performance ng Philippine Women’s Curling Team sa Division B ng Pan-Continental Curling Championships sa Lacombe, Canada, nang masungkit ang fourth overall. (pscpix)

Lumikha ng kasaysayan ang Philippine Curling National Team at nag-kampeon sa 2024 Pan-Continental Curling Division B Championship sa Lacombe, Canada. Dahil dito, aakyat na ang mga Pinoy sa Division A sa 2025 at lalapit sa kanilang ultimong layunin na mapabilang sa 2026 Winter Olympics sa Milan at Cortina d’Ampezzo sa Italya.

Kinailangang lampasan ng #1 Pilipinas ang makapigil-hiningang finals kontra #3 Kazakhstan, 9-3. Tinalo ng mga Pinoy ang #4 Hong Kong sa semifinals, 6-1, habang ginulat ng Kazakhs ang paboritong #2 Jamaica, 10-3.

Walang bahid ang Pilipinas sa 10 laro sa elimination na tumakbo mula Oktubre 26 hanggang 31 kung saan ang unang apat ang tutuloy sa knockout crossover semifinals. Isa-isa nilang pinabagsak ang Saudi Arabia (15-0), India (10-2), Nigeria (18-2), Qatar (12-1), Puerto Rico (11-2), Brazil (8-1), Jamaica (7-5), Kenya (16-0), Hong Kong (9-4) at Kazakhstan (6-5).

Binubuo ang koponan nina Alan Frei, Christian Haller at magkapatid na Marc Pfister at Enrico Pfister at reserba Benjo Delarmente. Sunod nilang paghahandaan ang Ninth Asian Winter Games sa Harbin, Tsina sa Pebrero.

Pagkatapos ng Harbin ay tututok na sila sa Pre-Qualifier sa Oktubre bago ang pagbabalik sa 2025 Pan-Continental sa Nobyembre na qualifier din para sa World Championship. Ang Qualifier sa Olympics ay nakatakda para sa Disyembre at ang Olympics ay sa Pebrero.

Ang Curling ay nilalaro sa pamamagitan ng pagpapadulas ng isang malaking bato sa yelo. Ginagabayan ito habang winawalis ng mga kakampi ang dinadaanan hanggang makapasok at tumigil sa loob ng nakaguhit na bilog.

Nais ng koponan na subukan ng mga kababayan ang Curling lalo na at may mga palaruan sa mga mall. Ang apat na manlalaro ay nakatira sa Switzerland at may naipon na malawak na karanasan sa Europa bago magpasya na magbuo ng pambansang koponan.

Earth Run series ng Takbo Para sa Kalikasan malapit na

ni Anthony E. Servinio @Sports | Oct. 23, 2024

Pagtulong para sa pagpapasigla muli ng mga kagubatan sa mga karatig lalawigan ng Metro Manila ang ikinasa ni Ms. Jenny Lumba (gitna) ng Green Media Events bago idaos ang Earth Run sa huling yugto ng Takbo Para Sa Kalikasan sa Nobyembre 17 sa CCP kung saan una na silang nakapagtanim ng 1,000 puno sa Tanay, Rizal ng Haribon Foundation at nasundan ng P50,000 na donasyon sa Million Trees Foundation sa La Mesa Watershed sa Lagro, Quezon City. Official media partner ang BULGAR sa TPSK. (TPSKfbpix)

Kasado na ang Earth Run, ang huling yugto ng seryeng Takbo Para Sa Kalikasan ngayong Nobyembre 17 sa Cultural Center of the Philippines. Matapos ang unang tatlong yugto, ito na rin ang selebrasyon ng isang buong taong pagpapakita ng malasakit para sa Inang Kalikasan.

Tampok ngayon ang karera sa 25 kilometro. Ang mga nakatapos ng 16 sa Fire Run, 18 sa Water Run at 21 sa Air Run ay tiyak na mag-uunahan para mabuo ang malaking medalya gamit ang apat na medalya.

Pangunahing layunin ng Earth Run ang makapagtanim ng 1,000 puno sa Tanay, Rizal. Napili muling tulungan ang Haribon Foundation na isa sa kanilang proyekto ang pagbuhay muli ng mga kagubatan.

Maliban sa 25 ay may mga karera din sa 10, 5 at 1 kilometro. Ginaganap na ang pagpapalista sa mga piling sangay ng Chris Sports at maaaring dumalaw sa opisyal na Facebook ng Takbo Para Sa Kalikasan para magpalista online. Magkakaroon pa rin ng Virtual Run para sa mga hindi makakapunta sa CCP sa araw mismo ng fun run.

Ang mga magtatapos sa Virtual Run ay makakatanggap ng parehong medalya at t-shirt sa mga tumakbo sa karera mismo. Ang BULGAR ay opisyal na media partner ng Earth Run at ng buong serye. Abangan muli ang makulit pero cute na si Bulgarito na magbibigay ng regalo sa mga masuwerteng mga ka-BULGAR.

Samantala, ipinakilala ng Green Media Events na pinangangasiwaan ang Takbo Para Sa Kalikasan ang kanilang unang patakbo sa bagong taon na pagbabalik ng APO Half Marathon sa Pebrero 23, 2025 sa Mall of Asia.

May pamagat ngayon na “Race To Reforest”, ang pangunahing tutulungan ay ang Million Trees Foundation. Ang mga kategorya ay 21, 10 at limang kilometro. Maaaring bumisita sa Facebook ng Green Media Events o APO Half Marathon para sa karagdagang detalye, katanungan at pagpapalista.

Bantiloc, 28th sa women's individual ng Paralympics

ni Anthony E. Servinio @Sports | August 31, 2024

Hindi nakisama ang lipad ng mga palaso ni Agustina Bantiloc at nagtapos na ang kanyang kampanya nang manaig sa kanya ang Brazilian para archer sa women's individual compound open elimination-round-of-16 kahapon at nagtapos din siya na ika-28 at huli sa Women’s Individual Compound Ranking Round ng 2024 Paris Paralympics Archery Huwebes ng gabi sa Les Invalides.  

Nanaig ang bigatin na si #5 Jane Karla Gogel ng Brazil sa knockout round. Nakapagtala lang ng 51 sa perpektong 60 puntos si Bantiloc sa kanyang unang anim na palaso na katabla ni Jeong Jinyoung ng Timog Korea.  Kung nakabawi si Jeong at umakyat sa ika-18, hindi na nakaahon ang Pinay at nanatili sa pinakailalim at nagtapos na may 618 mula sa 72 palaso na kanyang pinakamataas na iskor ngayong taon. 

Si Gogel ay nagtapos na may iskor na 691.  Ang papalarin ay haharapin ang magwawagi sa pagitan nina #12 Zhou Jiamin ng Tsina (676) at #21 Kerrie Leonard ng Ireland (653) sa Round of 16 sa Agosto 31. 

Numero uno si Oznur Cure Girdi ng Turkiye na nagtala ng bagong World at Paralympic Record na 704.  Inabot ng huling tira kung saan tinamaan niya ang 10 at siyam lang si Sheetal Devi ng India para magtapos sa 703 na hinigitan din ang dating World Record na 698 ni Phoebe Patterson Pine ng Gran Britanya at Paralympic Record na 694 ni Jessica Stretton ng Gran Britanya noong Tokyo 2020. 

Sa lakas ng mga kalahok, linampasan din ng 696 ng pangatlong si Fatemeh Hemmati ng Iran ang Paralympic Record.  Sina Girdi, Devi, Hemmati ang #4 Jodie Grinham ng Gran Britanya (693) ay pasok na sa Round of 16 at maghihintay ng makakalaban mula sa Round of 32.