Celtics, arangkada sa 2-0; Embiid, namayani sa OT

ni Anthony E. Servinio - @Sports | April 22, 2022

Ipinasok ni Joel Embiid ang three-points na may 0.8 segundo sa orasan upang maging bayani sa 104-101 panalo sa overtime ng bisitang Philadelphia 76ers sa Toronto Raptors sa pagpapatuloy ng 2022 NBA Eastern Conference Playoffs, kahapon sa Scotiabank Arena, ang unang playoff sa lugar makalipas ang mahigit dalawang taon. Lamang na ang 76ers sa seryeng best-of-seven, 3-0, at maaaring wakasan na ito sa Game 4 sa Linggo.

Tinabla ng free throw ni OG Anunoby ang laban, 101-101, subalit nagmintis ang sumunod na tira at nasungkit ni Embiid ang rebound na sinundan ng timeout na may dalawang segundo sa orasan. Tinanggap ni Embiid ang pasa ni Danny Green sabay pihit sa harap ng depensa nina Fred VanVleet at Precious Achiuwa para sa nagpapanalong tres.

Sa overtime lang nakatikim ng lamang ang 76ers. Humabol ang mga bisita mula sa 38-21 abante ng Raptors sa second quarter sa likod nina Embiid, Tyrese Maxey at James Harden na nagsumite ng free throw na may 49 segundo sa fourth quarter at hindi na naka-shoot ang parehong koponan upang itakda ang overtime, 95-95.

Muling pinatunayan ni Embiid kung bakit dapat siya ang maging Kia Most Valuable Player ngayong taon sa kanyang 33 puntos at 12 rebound. Sinundan siya nina Maxey at Harden na parehong may 19 puntos habang may dagdag 10 assist si Harden.

Umarangkada sa 2-0 ang Boston Celtics sa Brooklyn Nets sa bisa ng 114-107 tagumpay sa kanilang hiwalay na serye sa East. Hawak ng Nets ang laro hanggang bumigay sa fourth quarter sa gitna ng depensa ng Celtics na nakaangkla sa bagong hirang na 2022 Kia Defensive Player of the Year Marcus Smart.

Binantayan nang mahigpit sina Kevin Durant at Kyrie Irving at unti-unting nabura ang 62-45 lamang ng Nets. Bumanat ng 11 sunod-sunod na puntos ang Boston sa simula ng fourth quarter upang maagaw ang lamang, 96-92, at hindi na nila binitawan ito sa nalalabing pitong minuto, salamat sa pinagsamang 10 puntos nina Jayson Tatum at Jaylen Brown.

Chebet at Jepchirchir, champs sa Boston Marathon

ni Anthony E. Servinio - @Sports | April 21, 2022

Hindi pa rin nawawala ang dominasyon ng mga mananakbong galing Kenya at nag-doble kampeonato sina Evans Chebet at Peres Jepchirchir sa pagwawakas ng ika-50 edisyon ng Boston Marathon noong Linggo. Pinangunahan ng dalawang Kenyan ang pagbabalik sa lansangan ng taunang karera sa kinagawiang petsa na pangatlong Lunes ng Abril matapos ang 2 taon.

Tinapos ni Chebet ang 42.195 kilometrong takbuhan sa oras na 2:06:51 kung saan naging matindi niyang karibal si Gabriel Geay ng Tanzania. Biglang nawala sa eksena si Geay at umakyat sa pangalawa at ikatlong puwesto ang mga Kenyan na sina Lawrence Cherono (2:07:21) at Benson Kipruto (2:07:21).

Nakuntento na lang si Geay sa pang-apat na puwesto sa oras na 2:07:53. Sinundan siya ng dalawa pang Kenyan na sina Eric Kiptanui (2:08:47) at Albert Korir (2:08:50), habang si Scott Fauble ang ika-7 at unang Amerikano na tumawid sa finish line sa oras na 2:08:52.

Pinatibay ni Jepchirchir ang estado bilang pinakamahusay na marathoner matapos magwagi ng gold medal sa Tokyo Olympics noong Agosto at sinundan ng kampeonato sa TCS New York City Marathon noong Nobyembre.

Umoras si Jepchirchir ng 2:21:01 upang talunin ng apat na segundo lang si Ababel Yeshaneh ng Ethiopia na nagtapos sa 2:21:05. Ang tanso ay napunta sa Kenyan na si Mary Ngugi (2:21:32). May 21 nakarehistrong mamayanang Pilipino na nagtapos ng karera sa pangunguna ni Conrado Bermudez na umoras ng 2:57:39. Sa panig ng kababaihan ay pinakamabilis si Donna Duque na umoras ng 3:35:48.

Pelicans, ginulat ang Suns, 1-1 na; Butler, bumomba ng 45

ni Anthony E. Servinio - @Sports | April 21, 2022

Nagulantang ang 2022 NBA Playoffs matapos makuha ng bisitang New Orleans Pelicans ang Game 2 kontra sa numero unong Phoenix Suns, 125-114, kahapon sa Footprint Center. Tabla na ang seryeng best-of-seven, 1-1, salamat sa halimaw na inilaro ni Brandon Ingram sa second half.

Saglit inagaw ng Suns ang lamang, 98-97, at 7:47 ang nalalabi subalit sinagot ito ng shoot ni Ingram at 3-points ni CJ McCollum upang ibalik ang abante sa Pelicans, 102-98. Lalong ginanahan ang New Orleans at dumagdag ng 10 puntos si Ingram at lima kay McCollum upang pigilin ang mga banta ng Phoenix.

Nanguna si Ingram na may 37 puntos, 14 sa 3rd at 12 sa 4th quarter, na may kasamang 11 rebound at siyam na assist at sumunod si McCollum na may 23 puntos. Uminit para sa 31 puntos sa first half si Devin Booker, subalit hindi na nasundan ito matapos mapilay sa hita at lumabas na may 4:35 pa sa 3rd quarter at abante ang Pelicans, 77-74.

Bumomba ng 45 puntos si Jimmy Butler upang maging susi sa 115-105 panalo ng numero unong Miami Heat sa bisitang Atlanta Hawks. Lamang na ang Miami sa serye, 2-0, at lilipat na ang mga laro sa Atlanta para sa susunod na dalawang laro.

Kumilos ang Heat sa 2nd half at inakyat sa 16 ang lamang, 94-78, at 8:50 sa orasan. Mula roon ay nagbagsak ng 9 na puntos si Butler upang alagaan ang lamang at lampasan ang personal na marka sa playoffs na 40 puntos noong Game 1 ng 2020 East semifinals laban sa Milwaukee Bucks. Bumawi sa kanyang 25 puntos si Trae Young ng Hawks, subalit nalimitahan siya ng depensa sa 7 puntos sa second half. Walong puntos lang si Young sa Game 1 at nanalo ang Miami, 115-91.