PHL Football, sasalang na vs. Timor Leste sa SEAG

ni Anthony E. Servinio - @Sports | May 6, 2022

Unang sasalang sa aksiyon ang Pilipinas sa simula ng 31st Southeast Asian Games Men’s Football Tournament sa Viet Tri Stadium sa Phu Tho sa Vietnam. Haharapin ng Azkals ang hamon ng Timor Leste, isang koponan na nagbigay ng maraming magagandang laban sa mga nakalipas na taon, simula 4:00 p.m.

Pangungunahan ang atake ng Azkals ng beteranong si Stephan Schrock na magbabalik para sa ikalawang sunod na SEAG. Kasama niya sina Jovin Bedic ng Kaya FC Iloilo at Enrique Linares bilang pinapayagang tatlong manlalaro na lampas sa itinakdang edad na 23.

Karamihan sa mga kasapi ng pambansang koponan ay naglalaro para sa Azkals Development Team sa Philippines Football League (PFL) sa gabay ni Coach Norman Fegidero. Mula sa ADT ay nariyan sina Oliver Bias, Scott Woods, Dennis Chung, Jayve Kallukaran, Jaime Rosquillo, Francis Tacardon, Martini Rey, Jermi Darapang, Lance Ocampo at mga goalkeeper Quincy Kammeraad at Enrico Mangaoang.

Kinuha mula sa iba pang koponan sa PFL sina Oskari Kekkonen at Sandro Reyes ng Kaya at Jacob Pena ng Stallion Laguna FC. Magbabalik din sa Azkals sina Yrick Gallantes, Christian Rontini at Miguel Mendoza matapos lumiban sa mga nakalipas na ilang torneo.

Sa huli nilang pagtatagpo sa 2022 AFF Under-23 Championships sa Cambodia noong Pebrero, nagtapos ang Azkals at East Timor sa 2-2 tabla. Asahan na magbabago ang timpla ng laro ngayon at nandiyan na sina Schrock, Linares at Bedic upang palakasin ang opensa.

Samantala, inilabas din ang opisyal na listahan ng Women’s Team na isa sa mga maagang paborito para sa gintong medalya. Kabilang dito ang mga beterana ng 2022 AFC Women’s Asian Cup India na sina kapitana Tahnai Annis, bise-kapitana Hali Long, Sarina Bolden, Quinley Quezada, Camille Rodriguez, Dominique Randle, Inna Palacios, Jessica Miclat, Olivia McDaniel, Eva Madarang, Sofia Harrison, Carleigh Frilles, Isabella Flanigan, Malea Cesar, Anicka Castaneda, Ryley Bugay at mga idinagdag na sina Alisha del Campo, Kaya Hawkinson, Jaclyn Sawicki at Chantelle Maniti.

Herb Cebu FC, sakalam vs. FC 1991 sa Copa Cup

ni Anthony E. Servinio - @Sports | May 4, 2022

Dumurugo at balot ng benda ang ulo, nagtala ng dalawang goal sa second half si forward Arda Cinkir upang itulak ang Dynamic Herb Cebu FC sa 3-1 panalo laban sa Mendiola FC 1991 sa pagpapatuloy ng 2022 Copa Paulino Alcantara, Lunes nang gabi sa PFF National Training Center sa Carmona, Cavite. Sa unang laro, literal na naging bakbakan ang 3-2 tagumpay ng defending champion Kaya FC Iloilo sa Stallion Laguna FC.

Nag-umpugan ang mga ulo nina Cinkir at Alassane Wade ng Mendiola sa ika-49 minuto kaya napilitan silang umupo upang lapatan ng lunas. Bumalik agad si Cinkir at ipinasok ang nagpatablang goal gamit ang ulo sa ika-58 at ang nagpalamang ng goal sa ika-73 minuto.

Nagdagdag ng isa pang goal sa ika-93 minuto si midfielder Mert Altinoz upang mabuo ang tagumpay. Nakaunang goal ang Mendiola matapos ang penalty kick ni Hamed Hajimedhi sa ika-42 minuto subalit hindi ito tumagal at mas mabagsik na Dynamic Herb ang lumabas para sa second half.

Namayani ang beteranong si Jhan Melliza sa first half kung saan pinasahan niya sina Carlyle Mitchell at Shirmar Felongco para sa mga goal sa ika-10 at ika-19 na minuto. Matapos tulungan ang iba, tinulungan ni Melliza ang sarili at sumipa ng isa pang goal sa ika-28 minuto para sa 3-0 lamang.

Dahil sa panalo ng Dynamic Herb, tumalon sila sa ikalawang puwesto na may perpektong siyam na puntos buhat sa tatlong tagumpay. Haharapin nila ang mga Cebuano sa kanilang nalalabing laro sa Mayo 12, ang huling araw ng elimination bago ang semis sa Mayo 16 at finals sa Mayo 22.

Republicans at Delta, hindi patitinag sa NBL

ni Anthony E. Servinio - @Sports | April 30, 2022

Lalong iinit ang karera sa 2022 National Basketball League (NBL) President’s Cup handog ng Converge ngayong Sabado, Abril 30, sa pagharap ng numero unong Pampanga Delta sa bisitang Quezon Barons sa Bren Z. Guiao Convention Center simula 6 p.m. Sisikapin din pagbutihin ng DF Bulacan Republicans at Laguna Pistons ang kanilang pag-asa na mapabilang sa semifinals sa laro nang 4 p.m.

Aasa muli ang Delta sa mahusay na laro ni Michael Jeffrey Garcia na napiling Krooberg Best Player sa tatlo ng kanilang apat na tagumpay. Maliban kay Garcia, malaki ang kontribusyon nina CJ Gania, Jake Munoz , Ronan Santos at Karl Sampang sa tinatamasang tagumpay.

Kilala ang Quezon sa mataas na puntusan sa likod nina Domenick Vera, Christopher Lagrama, Arvine Calucin, Casper Pericas, Alex Ramos at Arjay Dongog na gumagawa ng tig-10 o higit pang puntos bawat laro. Ginulat ng Barons ang Taguig Generals noong nakaraang linggo, 89-87, para sa unang talo ng Generals.

Halos isang buwan ang naging pahinga ng Republicans na huling naglaro noong Abril 3 at binigo sila ng Taguig, 103-91. Lumasap ang Pistons ng 79-94 talo sa kamay ng Delta noong Sabado.

Matindi rin ang handog ng kasabay na 2022 Women’s National Basketball League (WNBL) sa banggaan ng numero unong Taguig Lady Generals at pumapangalawang PSI Air Force Lady Air Defenders sa 2 p.m. Malinis ang kartada ng Taguig sa limang laro habang ganado ang Air Force matapos magwagi sa huling apat na laro.

Samantala, bubuksan ang araw ng susunod na henerasyon ng basketbolista sa unang apat na laro ng 2022 NBL Youth simula 8 a.m. Sisimulan ang aksyon sa Under-14 ng Cabuyao Titans kontra Emeralds Academy at susundan agad ng Pampanga Junior Delta laban sa San Pedro LDG sa 9:15 p.m.