Pasok pa rin sa semis, kahit talo ang 'Pinas sa Vietnam

ni Anthony E. Servinio - @Sports | May 13, 2022

Dumanas ng mapait na pagkatalo ang Pilipinas sa host at defending champion Vietnam, 2-1, sa pagbabalik ng 31st Southeast Asian Games Women's Football Tournament, Miyerkules nang gabi sa Cam Pha Stadium ng Quang Ninh, Vietnam. Sa gitna ng hindi magandang resulta, pasok pa rin ang Filipinas sa semifinals na gaganapin sa Mayo 18.

Hindi inisip ng mga Pinay na naglalaro sila sa harap ng tinatayang 15,000 Vietnamese at umarangkada agad upang malambat ang unang goal, salamat kay kapitana Tahnai Annis sa ika-15 minuto. Eksakto ang palobong pasa ni Malea Cesar patungo kay Annis na inulo papasok ang bola.

Naging saglit lang ang pagdiriwang ng Filipinas at pinantay ni Nguyen Thi Tuyet Dung ang laban sa ika-38 minuto galing sa pasa ni Tran Thi Thuy Trang. Hindi pa tapos si Tran at lumikha siya ng sarili niyang goal sa ika-50 upang itulak sa lamang ang Vietnam at inalagaan nila ito sa nalalabing 40 minuto.

Pansamantalang nanatili sa liderato ng Grupo A ang Filipinas. Tabla sila sa Vietnam na parehong may tatlong puntos subalit lamang ang mga Pinay sa bisa ng kanilang +4 na goal difference kumpara sa +1 ng Vietnam.

Kahit anong mangyaring resulta sa nalalabing laban sa Grupo A sa pagitan ng Cambodia at Vietnam sa Sabado (Mayo 14) ay pasok na ang Filipinas sa semifinals. Ang tanong na lang ay kung magtatapos sila ng una o pangalawa upang matukoy kung sino ang haharapin nila sa dalawang tutuloy buhat sa Grupo B na kinabibilangan ng 2019 silver medalist Thailand, bronze medalist Myanmar, Laos at Singapore.

Lady Booters, dinurog ang Cambodia; 3x3 at Kurash, lalarga

ni GA / Anthony E. Servinio - @Sports | May 11, 2022

Nagpadala ng malaking mensahe ang Pilipinas at dinurog ang Cambodia, 5-0, sa pagbubukas ng 31st Southeast Asian Games Women’s Football Tournament, Lunes nang gabi sa Cam Pha Stadium ng Quang Ninh, Vietnam. Saglit lang ang pahinga at sasabak muli ang Filipinas ngayong Miyerkules kontra sa host at defending champion Vietnam simula 8 p.m. sa parehong palaruan.

Mabagal ang simula ng mga Pinay hanggang naipasok ni bunso Isabella Flanigan ang unang goal sa ika-27 minuto. Kinailangang magbalasa ng manlalaro si Coach Alen Stajcic sa second half at ito ang nagbigay-buhay sa kanilang laro.

Pumasok si Sarina Bolden sa ika-56 minuto kapalit ni Carleigh Frilles at wala pang isang minuto ay pinasahan si Eva Madarang para sa dapat ay pangalawang goal, subalit hindi ito binilang ng reperi. Bumawi si Bolden at inulo papasok ang bola sa ika-64 minuto upang madoble ang lamang.

Samantala, sisimulan ng PBA 3X3 First Conference champion Limitless App Masters ang misyon na maipagtanggol ang korona ng bansa sa basketball 3X3 event sa paglipad ng quartet patungong 31st SEAG sa Hanoi. Nagtungo na nitong Lunes ang grupo nina Jorey Napoles, Marvin Hayes, Reymar Caduyac at PBA draft No.1 pick prospect Brandon Ganuelas-Rosser kasama si Coach Willie Wilson at ang iba pang mga staff, bitbit ang bandera ng Gilas Pilipinas men's 3x3.

Susubukan ng apat na players na matapatan ang nakamit na tagumpay nina PBA 5-on-5 mainstays na sina Mo Tautuaa at CJ Perez ng San Miguel Beer, Chris Newsome ng Meralco Bolts at Jayson Perkins ng Phoenix Super LPG sa inaugural 3x3 competition sa nagdaang SEAG sa Maynila noog 2019.

Samantala, susubukang makasungkit ng dalawang Kurash athletes ng medalya ngayong Miyerkules sa magkahiwalay na preliminary matches para sa women’s 87kgs at men’s 60kgs category sa Hoia Duc Gymnasium.

Tatangkain ng parehong 2019 SEAG medalists at playing Coach Al Rolan Llamas at Sydney Sy Tancontian na mahigitan ang nakamit nilang mga medalya sa pagsabak sa preliminary rounds ng men’s extra-lightweight category at women’s heavyweight class sa magkahiwalay na tagpo, ayon sa pagkakasunod.

Unang sasalang sa preliminary round ang dating Asian Indoor Martial Arts Game (AIMAG) bronze medalist na si Llamas kalaban ang Thailand fighter at sunod na makakatapat ang host country na ang Vietnam sa kanyang bracket.

Cebu at Manila Chooks, sasabak sa Mongolia

ni Anthony E. Servinio - @Sports | May 6, 2022

Hahanapin ng Cebu Chooks ng Pilipinas ang kanilang ikalawang sunod na kampeonato sa kanilang pagsabak ngayong Biyernes at Sabado sa FIBA 3x3 Ulaanbaatar Super Quest sa Sky Resort sa Mongolia. Kasama ng Cebu ang Manila Chooks na susubukang makamit ang isang tiket para sa World Tour Manila Masters sa Mayo 28 at 29.

Ganado sina Mark Jayven Tallo, Zachary Huang, Brandon Ramirez at Mike Harry Nzeusseu matapos ang tagumpay sa Asia-Pacific Super Quest noong Sabado sa Solenad sa Santa Rosa City, Laguna. Natalo ang Manila sa Cebu sa semis at tiyak na babawi ang kombinasyon nina Mark Yee, Chico Lanete, Dennis Santos at Henry Iloka.

Hinati ang walong kalahok sa dalawang grupo kung saan napunta ang Cebu sa Grupo A kasama ang Ulaanbaatar MMC Energy at Amgalan MMC Energy ng Mongolia at Yokohama Beefman ng Japan. Tatlong kinatawan ng Mongolia ang haharapin ng Manila sa Grupo B na Zavkhan MMC Energy at ang mga lumaban sa Asia-Pacific Super Quest na sumegundang Sansar MMC Energy at pumangatlong Zaisan MMC Energy.

Dalawang tiket ang nakataya para sa Manila Masters. Pasok na sa torneo ang Cebu, Sansar at mga naunang naihayag na Ub Huishan NE at Liman Huishan NE ng Serbia, Antwerp ng Belgium, Warsaw Lotto ng Poland at UIaanbaatar.

Dahil sa kampeonato ng Cebu at pagpasok sa semis ng Manila sa Asia-Pacific Super Quest, umakyat ng isang puwesto ang Pilipinas sa ika-28 sa FIBA 3x3 World Ranking. Layunin pa rin na paabutin sa ika-24 o mas mataas ang bansa upang magkaroon ng pag-asa na mapabilang sa 2024 Paris Olympics.

Mapapanood nang live ang lahat ng laro ng Ulaanbaatar Super Quest sa opisyal na YouTube at Facebook ng FIBA 3x3. Magsisimula ang unang laro sa 4 p.m. habang ang mga laro sa Sabado ay nakatakda para sa 2 p.m.