VisMin Super Cup Visayas, sisimulan ng Talisay vs. Bohol

ni Anthony E. Servinio - @Sports | April 5, 2021

Mga laro sa Biyernes – Alcantara Big Dome

4:00 PM Talisay vs. Bohol

7:00 PM Mandaue vs. Siquijor

Tututok ang mundo ng basketball sa bayan ng Alcantara sa kanlurang baybayin ng Cebu kung saan gaganapin ang pagbukas ng Pilipinas VisMin Super Cup Visayas Division simula Abril 9 sa Alcantara Big Dome. Pitong koponan ang sasalang sa pinakaunang ligang propesyonal buhat sa Katimugang bahagi ng bansa habang pitong iba pa ang lalaro sa Mindanao Division sa susunod na buwan sa Dipolog City.

Ang pitong koponan ay ang Tubigon-Bohol Mariners, Dumaguete Warriors, ARQ Builders Lapu-Lapu Heroes, KCS Computer Specialists Mandaue, Siquijor Mystics, MJAS Zenith Talisay Aquastars at Tabogon Voyagers. Maglalaro sila ng dalawang round robin o 12 beses bawat isa hanggang Abril 29 at ang anim na may pinakamataas na kartada ay tutuloy sa playoffs simula sa Mayo 1.

Ang unang dalawang koponan ay pasok agad sa semifinals at maghihintay ng makakalaban hawak ang twice-to-beat sa mga magwawagi sa mga knockout games na #3 kontra #6 at #4 laban sa #5. Best of three ang serye para sa kampeonato ng Visayas sa Mayo 6 at 7 at kung kailangan, Mayo 8.

Tiyak na aani agad ng pansin ang mga kilalang beterano na pumirma sa mga koponan sa pangunguna ng Talisay na dala sina Paolo Hubalde, Patrick Cabahug, Jan Jamon, Val Acuna at Lester Alvarez. Nasa Mandaue sina Christopher Exciminiano, Gryann Mendoza at Al Francis Tamsi habang lalaro sa Lapu-Lapu sina Jerrick Canada, Reed Juntilla at Jercules Tangkay – ang tanging manlalaro na may karanasan sa Metropolitan Basketball Association na pumatok sa mga lalawigan mula 1998 hanggang 2002.

Ang iba pang mga beterano ay sina Leo Avenido ng Bohol, Harold Arboleda ng Tabogon at ang tambalan na Ryan Buenafe at Erick Rodriguez ng Siquijor. Kahit nandiyan ang mga ito, hindi magpapahuli ang mga kabataan sa pangunguna ng huling dalawang Most Valuable Player ng Cebu Schools Athletic Foundation na sina Jaybie Mantilla ng Dumaguete at Shaquille Imperial ng Mandaue na patunayan na nararapat silang mapabilang sa mga hanay ng propesyonal na atleta.

Agad magbubukas ang aksyon sa Mindanao Division at ang tatanghaling kampeon ay haharap sa kampeon ng Visayas para sa pangkalahatang kampeonato. Nakatakdang maglaro buhat sa Mindanao ang Basilan Peace Riders, Cagayan de Oro Rafters, Ozamiz City, Pagadian Explorers, Roxas Vanguards, Sindangan at Zamboanga City.

Leonard, Clarkson, Barnes at Williamson, umarangkada

ni Anthony E. Servinio - @Sports | March 29, 2021

Talagang ibang klase ang numero uno sa NBA Utah Jazz kapag naglalaro sa Vivint Arena. Pinatikim muli ng Jazz ng talo ang bisitang Memphis Grizzlies, 126-110, para sa kanilang ika-19 na panalo sa 21 laro sa kanilang tahanan at pangkalahatang 34-11.

Umapoy para sa 35 puntos si Donovan Mitchell sa 28 minuto sa sahig. Pumukol ng limang tres si Gilas Pilipinas Jordan Clarkson para magtapos na may 28 puntos sa 29 minuto habang double-double si Rudy Gobert na 16 puntos at 14 rebound.

Sinalubong ng Los Angeles Clippers ang numero uno sa Eastern Conference Philadelphia 76ers at ang kanilang dating coach Doc Rivers ng 122-112 na tagumpay. Walang nakapigil sa mga All-Star na sina Kawhi Leonard na nagsumite ng 28 puntos at Paul George na may 24.

Ipinasok ni Harrison Barnes ang tres sabay sa huling busina para makatakas ang Sacramento Kings sa bisitang Cleveland Cavaliers, 100-98. Nagtapos si Barnes na may 16 puntos at 11 rebounds upang hindi masayang ang 36 puntos ni De’Aaron Fox.

Sinundan ni All-Star Zion Williamson ang kanyang 39 puntos kontra sa Denver Nuggets noong isang araw ng 38 puntos upang buhatin ang New Orleans Pelicans sa Dallas Mavericks, 112-103. Tumulong sina Nickeil Alexander-Walker na may 20 puntos at Brandon Ingram na may 19.

Nabuhay ang kampanya ng Boston Celtics sa tagumpay sa Oklahoma City Thunder, 111-94. Uminit ang All-Star tambalan nina Jayson Tatum at Jaylen Brown para sa 27 at 25 puntos at nanalo muli ng dalawang sunod ang Celtics matapos huling mangyari ito noong Marso 4 bago ang All-Star Game.

Tinalo ng San Antonio Spurs ang bisitang Chicago Bulls, 120-104, at bahiran ang unang laro ni All-Star Nikola Vucevic bilang Bull matapos lumipat galing Orlando Magic. Bumida sa Spurs sina Jakob Poeltl na may 20 puntos at DeMar DeRozan na may 17 para ibigay kay Coach Gregg Popovich ang kanyang ika-1,300 na panalo sa kanyang karera bilang head coach buhat pa noong 1996.

Amsterdam, Champ sa FIBA 3x3

ni Anthony E. Servinio - @Sports | March 29, 2021

Ipinasok ni Serbian Maksim Kovacevic ang 2 puntos na may tatlong segundo sa orasan upang ihatid sa Amsterdam Talent & Pro ng Netherlands ang 21-19 panalo sa kanyang mga kababayan na Novi Sad at mauwi ang kampeonato sa 2021 FIBA 3X3 World Tour Doha Masters sa Al Gharafa Sports Club noong Linggo ng madaling araw sa Pilipinas. Ito ang pinakaunang kampeonato ng Amsterdam sa matagal na paglahok sa World Tour.

Si Kovacevic, na naglaro noong 2020 para sa numero unong koponan na Liman ng Serbia, ay nagtapos na may 13 puntos at sinundan ni Most Valuable Player Arvin Slaughter na may apat, Julian Jaring na may tatlo at Aron Roije na may isa para sa gantimpalang $40,000 (P1.94 milyon). Ang numero unong manlalaro sa buong mundo na si Dusan Bulut ay nanguna sa Novi Sad na may pito habang may anim si Tamas Ivosev.

Winalis ng Amsterdam ang Grupo B sa pamamagitan ng tagumpay sa defending champion Riga ng Latvia, 18-17, at Edmonton ng Canada, 16-12, Sumunod na tinalo nila ang NY Harlem ng U.S. sa overtime sa quarterfinals, 19-18, at Liman sa semifinals, 21-18.

Sinimulan ng Novi Sad ang kanilang kampanya sa Grupo C sa panalo sa Lusail ng Qatar, 21-10, ngunit dumapa sa kapwa-Serbian na Ub, 15-20. Pinauwi nila ang Piran ng Slovenia sa quarterfinals, 20-15, at Riga sa semifinals, 21-16.

Samantala, hindi nalabas ni Chico Lanete ng Manila Chooks TM ang kanyang porma sa Tissot Two-Point Shootout matapos maging numero uno sa qualifier noong Biyernes. Kampeon sa kanyang 13 puntos si Darius Tarvydas ng Sakiai Gulbele na nag-uwi ng bagong relos at $500 (P24,255) at sinundan nina Steve Sir ng Edmonton na may 12, Dejan Majstorovic ng Ub na may 11 at Lanete na may pito sa posibleng 21 puntos.