Kalaban nina Mitchell, Leonard, Butler at Giannis, mga panis

ni Anthony E. Servinio - @Sports | April 10, 2021

Tama na ang dalawang sunod na talo at nagising ang numero unong Utah Jazz sa third quarter upang parusahan ang bisitang Portland Trail Blazers, 122-103, sa pagpapatuloy ng NBA kahapon sa Vivint Arena. Ito na rin ang ika-23 sunod na panalo ng Jazz sa kanilang tahanan matapos matalo sa unang dalawang noong Disyembre at umangat sa kartadang 39-13.

Walang nakapigil kay Donovan Mitchell na lumikha ng 37 puntos sa 33 minuto at sinundan ni Rudy Gobert na may 18 puntos at 21 rebound. Hindi naglaro si Pinoy pride Jordan Clarkson sa unang pagkakataon matapos mapilay sa kanang bukung-bukong noong isang araw.

Lalong humigpit ang karera sa taas ng Western Conference matapos pabagsakin ng Los Angeles Clippers ang bisitang Phoenix Suns, 113-103. Pumukol ng pitong tres si Paul George para sa 33 puntos at sinuportahan ni Kawhi Leonard na may 27 puntos.

Namayagpag ang Miami Heat sa second half upang masugpo ang defending champion Los Angeles Lakers, 110-104, at walisin ang kanilang dalawang tapatan ngayong taon. Bumida si Jimmy Butler na may 28 puntos habang nag-ambag ng 18 si Victor Oladipo bago mapilay ang tuhod na may 5:35 nalalabi sa laro at lamang ang Miami, 95-89.

Kinuha ng Dallas Mavericks ang pagkakataon na wala si MVP Giannis Antetokounmpo at pinadapa ang Milwaukee Bucks, 116-101. Uminit sina Luka Doncic para sa 27 puntos at Kristaps Porzingis para sa 26 puntos at 17 rebound.

Nakamit ng Chicago Bulls ang mahalagang panalo kontra sa Toronto Raptors, 122-113, upang lumaki ang pag-asa na makasama sa playoffs sa susunod na buwan. Parehong gumawa ng 22 puntos sina Nikola Vucevic at Zach LaVine na pumasa din ng 13 assist para sa kartadang 22-28 at ika-10 pwesto sa Eastern Conference.

Patuloy din ang laban ng Cleveland Cavaliers para sa playoffs at nagwagi sa Oklahoma City Thunder, 129-102. Bumuhos ng 27 puntos si Collin Sexton at tinulungan ng reserbang si Taurean Prince na may 12 ng kanyang 22 sa fourth quarter.

Paul, nag-init sa overtime; Durant, balik Nets, nandurog

ni Anthony E. Servinio - @Sports | April 9, 2021

Kinailangan ng overtime bago nanaig ang Phoenix Suns sa numero unong Utah Jazz, 117-113, sa tampok na laro sa NBA kahapon mula sa Phoenix Suns Arena. Naging mahigpit ang tapatan ng dalawang koponan na may pinakamataas na kartada sa liga at umakyat ang Suns (36-14) sa kanilang ika-pitong sunod na tagumpay at nakalapit sa Jazz (38-13).

Nagtrabaho ng husto ang beteranong si Chris Paul sa 16 ng kanyang 29 puntos sa fourth quarter at overtime. Nanguna sa Phoenix si Devin Booker na may 35 puntos.

Nagdiwang ang numero uno sa Eastern Conference Brooklyn Nets sa pagbabalik ni Kevin Durant at dinurog ang New Orleans Pelicans, 139-111. Nagtala ng 17 puntos si Durant bilang reserba upang tulungan sina Kyrie Irving na may 24 at bagong pirmang si LaMarcus Aldridge na may 22 para sa kanilang pang-anim na panalo sa huling pitong laro at kartadang 36-16.

Nakamit ng Boston Celtics ang mahalagang tagumpay sa New York Knicks, 101-99, upang kumalas sa kanilang tabla para sa ika-7 at ika-8 puwesto sa East. Parehong double-double ang mga All-Star na sina Jaylen Brown na may 32 puntos at 10 rebound at Jayson Tatum na may 25 puntos.

Humataw ang Denver Nuggets sa 4th quarter upang mabigo ang San Antonio Spurs, 106-96. Nanguna sina Nikola Jokic na may 25 puntos at Michael Porter Jr. na may 18 puntos.

Matapos gulatin ang Jazz noong isang araw, nag-iba ang timpla ng Dallas Mavericks at pinadapa sila ng Houston Rockets, 102-93. Uminit si John Wall para sa 31 puntos at sinundan ni Christian Wood na may 22 puntos.

Nagtala muli ng triple double si Russell Westbrook upang buhatin ang Washington Wizards kontra sa Orlando Magic, 131-116. Nagtapos si Westbrook na may 23 puntos, 14 rebound habang nanguna si Bradley Beal sa 26 puntos.

Tinambakan ng Memphis Grizzlies ang Atlanta Hawks, 131-113,para sa kanilang ika-apat na sunod na panalo. Nagbagsak ng 30 puntos si Grayson Allen.

Horton-Tucker, Brooks, Green at George, namuno

ni Anthony E. Servinio - @Sports | April 8, 2021

Nahanap ng defending champion Los Angeles Lakers ang susi sa tagumpay laban sa Toronto Raptors, 110-100, kahapon sa Amalie Arena ng Tampa, Florida. Hindi nanalo ang mga kampeon sa Raptors sa kanilang 11 huling tapatan matapos magwagi sa overtime, 129-122, noong Nobyembre 30, 2014 sa Staples Center.

Namuno sa Lakers sina Talen Horton-Tucker na may 17 puntos habang may 15 puntos si Markieff Morris kasama ang buslo na ginawang 34 ang lamang sa second quarter, 66-32. Susunod para sa Lakers ang pagbisita sa Miami Heat, ang tinalo nila para sa kampeonato noong Oktubre.

Bago ang malaking laban, binigo ng Memphis Grizzlies ang Heat, 124-112. Bumida si Dillon Brooks sa kanyang 28 puntos at double-double si Jonas Valanciunas na 20 puntos.

Tahimik na tumabla muli ang Philadelphia 76ers sa Brooklyn Nets sa taas ng Eastern Conference matapos iligpit ang matagal na karibal Boston Celtics, 106-96. Nagsabog ng 35 puntos si Joel Embiid at nag-ambag ng 17 puntos buhat sa limang tres si Danny Green.

Dumagdag din ng panalo ang pangatlo sa Western Conference na Los Angeles Clippers at pinigil ang Portland Trail Blazers, 133-116. Pumukol ng anim na tres si Paul George para sa 36 puntos habang may 29 puntos at 12 rebound si Kawhi Leonard.

Humabol mula sa 10 puntos sa huling apat na minuto ang Golden State Warriors para maagaw ang panalo sa Milwaukee Bucks, 122-121, salamat sa dalawang free throw ni Kelly Oubre Jr. may pitong segundong nalalabi. Nagtapos si Oubre na may 19 puntos upang hindi masayang ang 41 puntos ni Stephen Curry.

Matapos matalo sa kanyang unang apat na laro bilang Chicago Bull ay dalawang sunod na ang panalo ni All-Star Nikola Vucevic at binuhay niya ang koponan kontra sa Indiana Pacers, 113-97.