Angat na sa puwesto ang Heat ni Pinoy Coach Spoelstra

ni Anthony E. Servinio - @Sports | April 13, 2021

Lalong nagiging mahirap na kalaban ang Miami Heat habang tumatagal ang torneo ng NBA at binigo nila ang Portland Trail Blazers, 107-98, kahapon sa Moda Center. Umangat sa ika-limang pwesto na ang Heat ni Pinoy pride Coach Erik Spoelstra sa Eastern Conference sa kartadang 28-25 panalo-talo sabay pasok ng mga ibang resulta.

Nagsumite ng 22 puntos si Bam Adebayo at tinulungan ni Jimmy Butler na may 20 puntos kung saan umabot ng 20 ang lamang ng Miami sa fourth quarter, 93-73. Matatandaan na pumasok ang Heat na pang-lima sa 2020 Playoffs at isa-isang pinauwi ang mga kalaban sa East bago natalo sa Los Angeles Lakers sa NBA Finals.

Nagising ang Los Angeles Clippers sa 4th quarter upang maiwasang mapahiya sa pumalag na kulelet sa East Detroit Pistons, 131-124, at matala ang kanilang ika-5 sunod na panalo. Nanguna si Marcus Morris Sr. na may 33 puntos habang may 32 si Paul George upang takpan ang pagpahinga kay Kawhi Leonard.

Ibinaon ni DeMar DeRozan ang nagpapanalong 2 puntos na may isang segundong nalalabi upang itulak ang San Antonio Spurs kontra sa Dallas Mavericks, 119-117, at wakasan ang kanilang limang sunod-sunod na talo. Nararapat lang itong katapusan sa mahusay na laro ni DeRozan na nagtapos na may 33 puntos at sinundan ni Dejounte Murray na may 25 puntos.

Dominado ang unang tatlong quarter, nagpabaya ang Atlanta Hawks subalit nagising sa huling 7 minuto upang habulin ang 10 puntos at masugpo ang Charlotte Hornets, 105-101. Bumida sa 10 ng kanyang 17 puntos si Lou Williams sa 4th quarter upang tulangan sina Bogdan Bogdanovic na pumukol ng walong tres para sa 32 puntos at Clint Capela na may 20 puntos at 15 rebound.

Bumida sina RJ Barret, Alec Burks at Julius Randle huling limang minuto upang maagaw ang panalo sa Toronto Raptors, 102-96, at pumantay ang kartada sa 27-27. Ipinasok ni Randle ang walo sa 26 puntos sa 4th quarter at sinundan ni Barrett na may 19 habang isinumite ng Burks ang lahat ng 8 puntos sa 4th quarter.

Drummond, angat ang laro; Embiid, tinambakan ang OKC

ni Anthony E. Servinio - @Sports | April 12, 2021

Pinaalala ng Los Angeles Lakers na sila ang defending champion ng NBA at tinalo ang numero uno sa Eastern Conference na Brooklyn Nets, 126-101, kahapon sa Barclays Center. Umangat ang laro ng bagong pirmang si Andre Drummond sa kanyang 20 puntos at 11 rebound para umakyat sa kartadang 33-20 panalo-talo.

Sumunod si Dennis Schroder na may 19 puntos kahit pinalabas siya at si Kyrie Irving ng Nets ng reperi matapos magtalo ang 2 guwardiya na may 9:41 ang nalalabi sa 3rd quarter. Kumuha rin ng lakas ang Lakers sa isa pang bagong lipat na si Ben McLemore galing Houston Rockets na nag-ambag ng 17 puntos.

Kinuha ng Philadelphia 76ers ang pagkakataon at tumabla muli sa Nets sa 36-17 para sa liderato ng East sa bisa ng kanilang 117-93 paglampaso sa Oklahoma City Thunder. Namuno si Joel Embiid sa kanyang 27 puntos at kumuha ng suporta kay Furkan Korkmaz na may 20 puntos.

Nanatili sa tuktok ng buong NBA ang Utah Jazz at pinaluhod ang bisitang Sacramento Kings, 128-112. Talagang hari ang Jazz (40-13) sa sariling tahanan sa likod nina Donovan Mitchell na may 42 puntos at Mike Conley Jr. na may 24 habang lumiban ng pangalawang sunod na laro si Jordan Clarkson bunga ng pilay sa bukung-bukong.

Pangalawa pa rin sa West ang Phoenix Suns matapos nila sunugin ang Washington Wizards, 134-106. Bumanat para sa 27 puntos si Devin Booker habang nag-ambag ng 15 si Mikal Bridges para sa kartadang 37-15.

Double-double si Damian Lillard na 27 puntos at 10 assist sa pagwagi ng Portland Trail Blazers sa kulelat ng East Detroit Pistons, 118-103. Hindi malayo ang mga kakamping sina CJ McCollum na may 26 puntos at Enes Kanter na may 24 puntos at 30 rebound.

Beal ng Wizards, namayani vs. Warriors; Zion, halimaw

ni Anthony E. Servinio - @Sports | April 11, 2021

Nagsilbing bayani si Bradley Beal sa malupit na 110-107 panalo ng bisitang Washington Wizards sa Golden State Warriors sa NBA kahapon sa Chase Center. Kinumpleto ni Beal ang bihirang four-point play na may 6.1 segundo sa orasan para maagaw ang lamang, 108-107, at sinundan ito ng dalawa pang free throw matapos itapon ng Warriors ang bola.

Nagtapos si Beal na may 20 puntos. Bumida rin sa Wizards (19-32) sina Rui Hachimura na may 22 puntos at Russell Westbrook na may triple double na 19 puntos, 14 rebound at 14 assist.

Binigo ng New Orleans Pelicans ang pangarap ng Philadelphia 76ers na bumalik sa taas ng Eastern Conference, 101-94. Halimaw si All-Star Zion Williamson sa kanyang 37 puntos at 15 rebound at sinuportahan ni Brandon Ingram na may 17 puntos.

Hindi rin nakalapit sa nangungunang Brooklyn Nets ang Milwaukee Bucks matapos ipatikim ng bisitang Charlotte Hornets ang 127-119 na talo. Tumira ng 26 puntos si Miles Bridges at sinundan nina Terry Rozier at Devonte Graham na may tig-20 puntos.

Isinalba ng kanilang depensa sa huling 10 segundo ang Denver Nuggets para takasan ang San Antonio Spurs, 121-119. Triple double si Nikola Jokic na 26 puntos, 13 rebound at 14 assist habang may 22 puntos at 10 rebound si Michael Porter Jr. kasama ang mahalagang free throw na tumakda sa huling talaan.

Nanatili ang agwat ng humahabol na Los Angeles sa liderato ng Western Conference matapos iligpit ang Houston Rockets, 126-109. Namuno sa panalo si Kawhi Leonard na may 31 puntos habang dumagdag ng 26 si Reggie Jackson sa gitna ng pagliban ni Paul George.

Matindi ang naging palitan ng puntos nina Trae Young at Zach LaVine subalit nanaig sa huli si Young at ang Atlanta Hawks sa Chicago Bulls ni LaVine, 120-108. Tinapos ni Young ang laro na may 42 puntos.

Nagtrabaho ang mga bituin sa overtime para maiwasan mapahiya ang Boston Celtics sa kulelat na Minnesota Timberwolves, 145-136. Umapoy para sa 53 puntos at 10 rebound si Jayson Tatum.