Pang-4th Olympic gold, pramis nina Durant at Harden

ni Anthony E. Servinio - @Sports | June 23, 2021

Kevin Durant at James Harden - Associated Press

Matapos mabigo sa 2021 NBA Playoffs, sisikapin ng tambalang Kevin Durant at James Harden ng Brooklyn Nets na bigyan ang U.S. ng kanilang ika-apat na sunod na gintong medalya sa Men’s Basketball ng 2020 Tokyo Olympics mula Hulyo 23 hanggang Agosto 8. Ang dalawang bituin ang pinakabagong dagdag sa binubuong listahan ng USA Basketball para sa koponan na hahawakan ni Coach Gregg Popovich ng San Antonio Spurs.

Sasamahan ng dalawang Nets ang mga nauna nang naghayag ng kanilang kahandaan na maglaro na sina Damian Lillard ng Portland Trail Blazers, Jayson Tatum ng Boston Celtics, Bam Adebayo ng Miami Heat, Draymond Green ng Golden State Warriors, Bradley Beal ng Washington Wizards at Devin Booker ng Phoenix Suns. Nakatakdang magsimula ang ensayo sa Las Vegas, Nevada sa Hulyo 6 at inaasahan na kumpleto na ang koponan sa nasabing araw.

Ito ang magiging unang Olympics para kay Lillard, Tatum, Adebayo, Beal at Booker. Sina Durant at Green ay beterano ng Rio 2016 habang magkakampi sina Durant at Harden noong London 2012.

Makakalaban ng Team USA sa Grupo A ang Pransiya, Iran at ang magwawagi sa Olympic Qualifying Tournament na gaganapin sa Canada na magsisimula ngayong Hunyo 29. Simula sa Dream Team sa Barcelona 1992, isang beses lang natalo ang koponan na puro galing NBA at ito ay sa Athens 2004 kung saan nanaig ang Argentina.

Kung hindi pa malinaw ang mga kalalakihan, inilabas na ng USA Basketball ang listahan ng mga kababaihan na binubuo ng isang dosenang bituin ng WNBA sa pangunguna nina Sue Bird, Breanna Stewart at Jewell Loyd ng 2020 WNBA champion Seattle Storm at Coach Dawn Staley ng University of South Carolina.

Samantala, susubukan ni Booker at ng Phoenix Suns ang makamit ang 2-0 lamang sa kanilang seryeng best of seven sa Western Conference Finals ng 2021 NBA Playoffs laban sa Los Angeles Clippers sa Game Two ngayong araw sa Phoenix Suns Arena simula 9:00 ng umaga. Umapoy si Booker para sa 40 puntos, 13 rebound at 11 assist sa 120-114 tagumpay ng Suns sa Game One noong isang araw.

Hawks, entra sa East Final; Suns, nakauna sa West

ni Anthony E. Servinio - @Sports | June 22, 2021

Ginulat ng bisitang Atlanta Hawks ang Philadelphia 76ers, 103-96, upang makuha ang Game Seven ng kanilang Eastern Conference semifinals sa pagpapatuloy ng 2021 NBA Playoffs kahapon sa Wells Fargo Center. Inangat ni Kevin Huerter ang kanyang galing upang makapasok ang Hawks sa East Finals laban sa naghihintay na Milwaukee Bucks simula ngayong Huwebes sa Fiserv Forum ng Bucks.

Nangyari ang inaasahang dikit na laro at walang kabang ipinasok ni Huerter ang tatlong free throw na may 54 segundong nalalabi upang dagdagan ang lamang ng Atlanta, 96-92. Sinundan ito agad ng agaw ni Danilo Gallinari at itinakbo niya ang bola para sa malakas na dunk, 98-92.

Nabantayan ng mabuti si Trae Young buong laro subalit ipinasok niya ang mga mahalagang free throw kasama ni Gallinari upang masiguro ang panalo. Nanguna si Huerter na may 27 puntos at sinundan ni Young na may 21 puntos lang matapos magtala ng 39 at 34 sa Game Five at Six ng serye.

Double-double pa rin si Joel Embiid na 31 puntos at 11 rebound at sinundan ni Tobias Harris na may 24 puntos at 14 rebound. Nasayang ang pinaghirapang kartadang 49-23 panalo-talo ng Philadelphia, ang pinakamataas sa East noong regular season.

Sa Game One ng West Finals, bumida si All-Star Devin Booker sa fourth quarter patungo sa isang triple double at wagi ang Phoenix Suns sa bisitang Los Angeles Clippers, 120-114. Maghaharap muli ang dalawang koponan sa Game Two ngayong Miyerkules sa Phoenix Suns Arena ulit.

Hindi na nakapuntos ang Clippers at nagdagdag ng dalawa pang free throw si Booker sa huling apat na segundo para magtapos na may 11 ng kanyang 40 puntos sa fourth quarter na may kasamang 13 rebound at 11 assist upang takpan ang pagliban ng kanilang beterano Chris Paul bunga ng COVID-19 protocol. Nanguna sa Clippers sina Paul George na may 34 at Reggie Jackson na may 24 at hindi naglaro si Kawhi Leonard dahil napilay ang tuhod sa West semis kontra Utah Jazz.

Bucks, nakapanabla pa; Middleton, bumida

ni Anthony E. Servinio - @Sports | June 19, 2021

Dinurog ng Milwaukee Bucks ang bisitang Brooklyn Nets, 104-89, upang maitabla sa 3-3 ang kanilang seryeng best of seven sa Eastern Conference semifinals ng 2021 NBA Playoffs kahapon mula sa Fiserv Forum. Sinigurado nina Khris Middleton at Giannis Antetokounmpo na magkakaroon ng Game Seven ngayong Linggo sa Barclays Centers.

Lamang ng buong 48 minuto ang Bucks kung saan umabot ng 21 ang lamang sa fourth quarter, 100-79, matapos ang bihirang four-point play ni Middleton at 4:45 sa orasan. Maganda ang simula ng Milwaukee at nakuha ang first quarter, 26-19, sa likod ng 11 puntos ni Antetokounmpo.

Nagtapos si Middleton na may 38 puntos at 10 rebound at sinundan ni Antetokoumpo na may double-double din na 30 puntos at 17 rebound. Nag-ambag ng 21 si Jrue Holiday.

Nanguna sa Nets si Kevin Durant na may 32 puntos at 11 rebound habang literal na naglaro ng pilay si James Harden subalit gumawa pa rin ng 16 puntos sa 40 minuto. Muling lumiban ang isa pang pilay na si Kyrie Irving.

Dalawang serye ang maaaring magwakas sa mga hiwalay na Game Six ngayong araw simula sa tapatan ng ganadong Atlanta Hawks at bisitang Philadelphia 76ers sa 7:30 ng umaga. Bumida si Trae Young sa 106-103 panalo ng Atlanta sa Game Five upang idiin ang 76ers sa East semis.

Sa West semis, susubukang manatiling buhay ang kampanya ng numero unong Utah Jazz sa kanilang pagdalaw sa Los Angeles Clippers sa 10:00 ng umaga. Mainit ang Clippers at nanalo sa huling tatlong laro ng serye, kasama ang 119-111 tagumpay sa Vivint Arena noong Game Five salamat kay Paul George na tinakpan ang pagliban ng pilay na si Kawhi Leonard.

Samantala, inilabas ng NBA ang listahan ng 2021 All-Rookie Teams na pinangungunahan ni 2021 Kia NBA Rookie of the Year LaMelo Ball ng Charlotte Hornets. Kasama ni Ball sa First Team sina Anthony Edwards ng Minnesota Timberwolves, Tyrese Haliburton ng Sacramento Kings, Sadiq Bey ng Detroit Pistons at Jae’Sean Tate ng Houston Rockets.